“Mube Abatootela”
1 Fwe bengi twalikanshiwe ku bwaice ukusosa ukuti “mukwai” na “natootela” lintu umo aali uwa cikuuku kuli ifwe nelyo uwa congwe. Paulo atukonkomeshe ‘ukuba abatootela,’ lyonse kabili tulingile ukucilisha ukutasha Yehova. (Kol. 3:15, 16) Lelo ni shani fintu twingalumbulula ukutootela kuli Kabumba wesu Wakulisha? Kabili milandu nshi iyaibela iyo twakwata iya kumutootela?
2 Umutumwa Paulo alembele ukuti: “Kube ukutootela kuli Lesa, uuletupeelo kucimfya muli Shikulwifwe Yesu Kristu!” (1 Kor. 15:57) Pa Cibukisho umwaka umo umo, tulacinkulwako ulwa kutemwa kwakulisha uko Lesa na Kristu balangishe mu kupayanya icilubula ico citupeela isubilo lya bumi bwa muyayaya. (Yoh. 3:16) Apantu mupepi no uli onse uwa ifwe twalilufyapo abatemwikwa mu mfwa, fintu twaba aba kutootela ku bulayo bwa kwa Yesu ubwa kubuusha! Imitima yesu ilafukaukamo ukutasha lintu twatontonkanya pa cilolelo ca kupusunsuka impela ya iyi micitile ya fintu ukwabula ukufwapo. (Yoh. 11:25, 26) Calikosa ukusanga amashiwi ya kubomfya pa kulumbulula ukutootela pa lwa mapaalo yonse ayawamisha ayo tukaipakisha ukufuma kuli Yehova muli Paradise wa pe sonde uuleisa. (Ukus. 21:4) Milandu nshi imbi iyawamapo intu uuli onse engakwata iya ‘kuba uutootela’ kuli Lesa?
3 Ifya Kulumbulula Ukutootela Kuli Lesa: Caliba lyonse icalinga ukuti tulumbulule ukutasha mwi pepo kuli Yehova pa busuma bwakwe. (Ilu. 136:1-3) Tulakuntwa, na kabili, ukulangilila ukuti tulamutootela mu nshila shimbi ishisuma. Ku ca kumwenako, ukwabula ukutwishika tukasangwako ku Cibukisho ca mfwa ya kwa Kristu pa Mulungu, March 23. Pa kuti twingafwilisha ukukumanisha ifisolobelo filekabilwa mu cilonganino ca cikaya no mulimo wa mwi sonde lyonse, mu kwanga ‘tulacindika Yehova ku fyuma fyesu.’ (Amapi. 3:9) Tulatungilila baeluda mu kufikapo no kubombela pamo na bene, muli fyo ukulanga ukuti tulatasha Yehova pa kwaafwa kuntu apayanya ukupitila muli bene. (1 Tes. 5:12, 13) Cila bushiku, tulatukusha ukusungilila imyendele yatambalala iyo icindika ishina lya kwa Lesa. (1 Pet. 2:12) Yehova alatemunwa kuli ubu bushinino bonse ubwa kutasha kwesu.—1 Tes. 5:18.
4 Ukulumbulula Ukutootela Kwesu Ukwawamisha: Ukubombako umulimo wa kushimikila Ubufumu no mweo onse, ukucindika ishina lya kwa Yehova, ukulumbulula ukutasha mwi pepo, no kucingilila icine muli bucishinka fyaba pa kati ka kulumbulula kwawamisha ukwa kutootela kuli Kabumba wesu ukufuma ku mutima pa fintu fyonse ifyo atucitila. Yehova alabekwa pa kutumona tulemubombela umulimo washila ukwafwilisha ukufwaya kwakwe ukwa kuti ‘abantu bonse bapusuke.’ (1 Tim. 2:3, 4) Uyo e mulandu wine bakasabankanya abengi abengatantikila uyu mulimo baleitabila ku bwite ubo bwali mu Ubutumikishi Bwesu Ubwa Bufumu ubwa February ubwa kulembesha pamo nga bapainiya ba kwafwilisha mu mweshi umo nelyo iyafulilako mu March, April, na May. Ukubombesha ukufika apo umo engapesha mu butumikishi yaba ni nshila yawamisha iya ‘kubelamo abatootela’ kuli Lesa. Bushe mukaba na maka ya kuilunda ku mitande ya bapainiya mu April? mu May?
5 Twalipeelwa isubilo lyashininkishiwa ilya kwikala kuli pe na pe. Lintu tukalimona ukufikilishiwa, tukakwatilapo imilandu na imbi iyapaka cila bushiku iya kutwalilila ukutootela kuli Yehova mu kwanga.—Ilu. 79:13.