Mwe Misepela—Mabuyo Nshi Mwakwata aya ku Mupashi?

¹ Yehova alishiba fintu umulimo walondoloka na mabuyo yayanguka ukufikapo fyaba ifyacindama mu kutulenga ukuba aba nsansa. (Moneni Ukutendeka 1:28; 2:15, 19.) Ilelo, Yehova alipeela abantu bakwe umulimo wa kushimikila no wa kusambilisha. Na kabili twalikwata ubuyo bwa kupelako ubwa kunonka umweo wa muyayaya muli Paradise. Ilyo tulebomba, tulekabila ukwimika amabuyo ya ku mupashi ayalunduluka nga twingasengauka ukubomfya amaka yesu ne fikwatwa mu cimfulumfulu.—1 Kor. 9:26.

² Amabuyo Yalinga ku Bacaice: Imisepela ifwile ukukwata amabuyo ya teokrasi ayo bengafikapo ukulingana na maka yabo umo umo. (1 Tim. 4:15) Abana banono nga nshi bamo balifika pa buyo bwa kusungila amabuuku ya mu Baibolo ku mutwe nelyo fye ni lintu bashilaishiba ukubelenga. Ukupitila mwi sambililo lya lupwa, abana baleshiba ifya kupekanishisha ukulongana pa kuti bengafika pa mabuyo ya kulandapo ifyebo fyabamo ubupilibulo no kulembesha mwi Isukulu lya Butumikishi bwa Teokrasi. Ilyo abana baleya na bafyashi babo mu mulimo wa mwi bala, balasambilila ifya kubombako umulimo wa kushimikila ilyo balelunduluka ukulola ku buyo bwa kuba bakasabankanya bashabatishiwa. Abafyashi balingile ukukomaila pa buyo bwa kuipeela no lubatisho ku bana babo abanono.

³ Nga ca kuti uli mupungwe, bushe amabuyo yobe aya ku mupashi yasanshamo finshi? “Lelo ibukisha Kalenga obe” ukupitila mu kutontomesha pa mabuyo yacindama mu cine cine mu bumi. (Luk. Mil. 12:1; Ilu. 71:17) Mulandu nshi te kuti ubombeleko bupainiya mu myeshi intu amasukulu yesalwamo? Bushe walibala autontonkanyapo ukubomba mu butumikishi pamo nga painiya wa nshita yonse? Ni shani pa lwa kusambilila ululimi lupya pa kuti ku ntanshi kuti wayafwilishako abantu balanda indimi shimbi nelyo ifilonganino mu ncende wikalamo nelyo ku cifulo cimbi? Abengi nomba abalebombela pa Bethel nelyo pamo nga bakangalila benda nelyo bamishonari baimike ubuyo bwabo ubwa kubomba umulimo wa nshita yonse uwaibela ilintu bacili ku sukulu. Mulandu nshi na iwe ushingacitila cimo cine?

⁴ Ilintu ucili umunono, bombesha ku kupashanya ica kumwenako ca kwa Yesu. Nangu fye ni pa mushinku unono uwa myaka 12, alandile mu kulongoloka pa lwa fintu fya ku mupashi. (Luka 2:42-49, 52) Ukuimikila amabuyo ya kunonsha mwe bene aye sambililo lya pa lwenu, ukubelenga Baibolo lyonse, no kubishanya lyonse na Bena Kristu bakosoka pa kulongana na mu mulimo kukamwaafwa ukunonka ukulamuka kwa kusambilisha bambi pa lwa Bufumu bwa kwa Lesa mu nshila Yesu asambilishishemo.