Baibolo—Ubutungulushi bwa kwa Lesa ku Bantu Bonse
1 Calipimwo kuti amaBaibolo amabilioni yane yalipulintwa mu ndimi ukucila pali 2,100, ukulenga Icebo ca kwa Lesa ukubako ku maperesenti 90 aya bekashi ba pe sonde bonse. Lelo nalyo line, mu calo muli icipowe “ica kuumfwe cebo ca kwa Yehova.” (Amose 8:11) Abantu abengi abakwatako Baibolo nalimo tabaibelenga nelyo tabomfwikisha ifyabamo. Ni shani twingabakunta ukubomfya Baibolo nge ca kutungulula icingabomba mu bumi bwabo?
2 Mu December tukalatambika icitabo Baibolo—Cebo ca kwa Lesa Nelyo ca Muntu? Kuti na kabili twatambika ubupilibulo bwa Baibolo ubwatunonsha pa myaka 47 iyapita—ubwa New World Translation. Ici kuti cacitwa pa kulangilila ululimi lwa iko ulwalengama, ulwa muno nshiku. (Moneni icitabo ca “Amalembo Yonse,” ibula 328, paragrafu 6.) Tukalangilila ukutesekesha kwesu ukwaswatuka kuli ubu bupe ubwafuma kuli Yehova pa kwaafwako bambi mu kucincimuka ukuti bengapokelela Baibolo pamo ngo butungulushi bwa kwa Lesa ku bantu bonse.
3 Kuti mwatendeka inshila ya kulandilamo pa kubomfya trakiti wa “Umulandu Wingacetekela Baibolo.” Kuti mwatila:
◼ “Nangu line Baibolo ilasangwa ku bantu ba mu calo abacila pa maperesenti 90, banono fye e baibelenga lyonse. Cinshi muletontonkanya e calenga?” Belengeni amaparagrafu ya kubalilapo yabili aya trakiti, capamo na 2 Timote 3:16. Tambikeni icitabo ca Icebo ca kwa Lesa pa musangulo wa lyonse. Nga icitabo cakaanwa, ebeni mwine ng’anda akabelenge trakiti onse. Ebekesheni akamutwe ka kulekelesha, “Ukusobela Inshita ya ku Ntanshi.”
4 Lintu mulebwelela ku bantu abo mwashalikeko trakiti wa “Umulandu Wingacetekela Baibolo,” kuti pambi mwaeshako iyi nshila:
◼ Pa numa ya kuilondolola na kabili, belengeni amaparagrafu yabili aya kulekelesha muli trakiti. Ipusheni mwine ng’anda nga alitala atontonkanyapo pa kucitikako kwa kwikala kuli pe na pe pe sonde. Nga ayasuka, mutile: “Inte sha kwa Yehova shalishininkisha ukuti amasesemo yonse ayasangwa muli Baibolo yakafikilishiwa, ukusanshako na yasobela inshita ya ku ntanshi iishaiwamina iya bantu bonse abacite fifwaya Lesa.” Mulangeni icikope cili pe bula 13 muli broshuwa wa Cintu Lesa Afwaya, bweleleni kwi sambililo 5, kabili lanshanyeni pa fyasuko fitantikwe, muli fyo ukutendeka isambililo.
5 Mu fifulo fya kubombelamo umo abantu bakongamina ku kupepa, kuti pambi mwaeshako iyi nshila ya kutendekelamo:
◼ “Tulekoselesha abantu ukucilapo kubomfya Baibolo. Indupwa ishingi shalikwata Baibolo, lelo baloleshamo fye limo limo lintu bakumanya amafya. Bushe ico na imwe mwalicimona? [Lekeni asuke.] Nakalimo basumino kuti Baibolo yalileko kubomba. Ici citabo, Baibolo—Cebo ca kwa Lesa Nelyo ca Muntu?, cilashinina mu kufikapo ukuti Baibolo yalilungika mu fya sayansi no kuti ilapayanya inshila shibomba isha kupikulwilamo amafya ya lelo ayatitikisha.” Ebekesheni ifishinka finono fimo ukufuma mu cipandwa 8 nelyo 12 muli ici cine citabo, kabili lyene citambikeni.
6 Lintu mwabwelela uko mwashalike icitabo ca “Icebo ca kwa Lesa,” kuti mwatila:
◼ “Umuku wafumako ilyo namutandalile, twalanshenye ifyo Baibolo itwaafwa ukupikulula amafya yapikana aya lelo. Abaisumina nge Cebo ca kwa Lesa na kabili balyafwiwa ukwikalo bumi bwacilapo insansa, no bwacilapo kwikusha. Kuti natemwa ukumulangako cimo ica fishinte fibomba ifya mu Baibolo icalondololwa mu citabo namushiliile.” Lanshanyenipo cimo ica fishinte fya mu Malembo ifisangwa mu cipandwa 12, amaparagrafu 3-6, no kusondwelela pa kubelenga paragrafu 7. Nga asekelela, tambikeni isambililo atemwa mu citabo ca Ukwishiba nelyo muli broshuwa wa Cintu Lesa Afwaya.
7 Inshila ya kulandilamo ili pano kuti pambi abacikalamba baitemwa:
◼ “Kwaliko inshita imo lintu Baibolo alebelengwa mu mayanda ayengi kabili lintu indupwa shaleikalila ku fishinte fya iko. Bushe na imwe e fyo cali mu lupwa lwenu? [Lekeni asuke.] Ilelo cilemoneke fyo abengi bali abapuusaulwa nga nshi ica kuti tabengapeeleshako inshita ku kubelenga Baibolo nalimo bayumfwe fyo ifishinte fya iko pa lwa mibele isuma tafibomba. Icipandwa 13 ica cino citabo, Baibolo—Cebo ca kwa Lesa Nelyo ca Muntu?, cilashimika ifyacitike mu bumi bwa bantu batatu abo imyeo yabo yawamineko pa numa ya kusambilila Baibolo. Nga mwingatemwa ukubelenga fintu amaka ya Cebo ca kwa Lesa yabaafwile, kuti natemwa ukumushiila ici citabo.”
8 Pa cipempu ca kubwelelamo kuti mwatila:
◼ “Ilyo twalekelesheko kulanshanya, twalisuminishenye ukuti ifishinte fya Baibolo pa lwa mibele isuma nafisuulwa mu mikalile ya lelo. Bushe iyo misuula ilingile ukutusakamika? [Lekeni asuke.] Yesu Kristu alikatamike nga nshi ukupokelela ukwishiba Baibolo.” Belengeni Yohane 17:3. Lyene lanshanyeni paragrafu 5 iya mu cipandwa 1 ica mu citabo ca Ukwishiba. Londololeni programu wesu uwa kusambilila Baibolo apa fye, kabili langilileni fintu cicitwa.
9 Pepeni ukuti Yehova akapaale ukubombesha kwenu ukwa kubomfya Baibolo—Ubutungulushi bwa kwa Lesa ku bantu bonse.