Ukwishiba Lesa wa Cine Kutungulula ku Mweo
1 Mwi pepo lyakwe kuli wishi, Yesu atile: “Awe uyu e mweo wa muyayaya, ukuti bamwishibe, mwe Lesa wine wine mweka.” (Yoh. 17:3) Mwandi ico cilambu cikalamba! Pa kubomfya ulupapulo lwa Ukwishiba Uko Kutungulula ku Mweo wa Muyayaya, kuti twayafwa bambi ukwishiba cintu balekabila ukucita pa kwikala kuli pe na pe. Cinshi twingasosa pa kubimbula ubuseko bwabo no kubacincisha ukufwaya ukubelenga icitabo ca Ukwishiba?
2 Kuti pambi watambika Baibolo ukuilangisha nge ntulo ya butungulushi bubomba, pa kusoso kuti:
◼ “Tulelanshanya na bena mupalamano besu ukwa kusanga intulo ya butungulushi bubomba pa kuti twingacimfya amafya ya mikalile. Ku numa abantu abengi intanshi balefwayafwaya muli Baibolo. Lelo ino nshita imibele ya mutima iya bantu yalyaluka; abengi baba aba mintelengu pa lwa Baibolo, ukuimona nga icitabo fye icalembwa na bantu. Mutontonkanyapo shani? [Leka asuke.] Kwaliba umulandu usuma uo twingasosela ukuti Baibolo ilabomba mu nshita yesu. [Belenga 2 Timote 3:16, 17.] Ifishinte fya Baibolo filabomba apakalamba ilelo nga fintu fye fyabombele lintu Lesa apuutilemo ukulembwa kwa Baibolo. Alukila kwi bula 16 ilya citabo ca Ukwishiba, kabili mu kwipifya landa pa butungulushi bubomba ubusangwa mu Lyashi lya pa Lupili ilya kwa Yesu. Belenga amashiwi ya ntungulushi ya India ayambwilwe mu paragrafu 11 nelyo amashiwi ya kwa kafundisha ayambwilwe mu paragrafu 13. Tambika icitabo, kabili tantika ukubwelelako ku kuyaasuka icipusho ca kuti, Ni shani fintu pa lwesu twinganonkelamo mu kwishiba kwaba mu Baibolo?
3 Apantu ipepo lyaba lyashi lya buseko ku bengi, kuti pambi wafwaya ukulandapo pa kusoso kuti:
◼ “Mu kuba na mafya yonse ayo tulolenkana na yo mu mikalile ya muno nshiku, bushe mwalisumina ukuti ipepo kuti lyaba ilya kwaafwa mu cine cine kuli ifwe? [Pembelela asuke.] Abengi balisumina ukuti balipalamina kuli Lesa pa kupepa kuli wene no kuti ukupepa muli iyo nshila kwalibakosha lwa nkati, icintu fye ico Baibolo yalaya. [Kupukula icitabo ca Ukwishiba pe bula 156, kabili lyene belenga Abena Filipi 4:6, 7.] Nangu ni fyo, umuntu kuti atontonkanya ukuti amapepo yakwe tayasukwa inshita shimo. Ici cipandwa cilanda pa ‘Ifyo Wingapalama Kuli Lesa.’ [Tambika icitabo pa musangulo wa lyonse.] Ici cipandwa na kabili cilondolola fintu twingakutika kuli Lesa, apantu ukumfwana na wene takuwililila ku lubali fye lumo. Kuti twaisalanshanya pali ico ilyo nkabwela na kabili.”
4 Bushe kuti watemwa ukubomfya inshila ya kulungatika ku kutendeka isambililo? Napamo kuti watunguluka pa kubomfya iyi nshila:
◼ “Tuletambika kosi we sambililo lya Baibolo ilya mu ŋanda ilya pa fye. Bushe mwalibala amusambililapo kosi wa Baibolo? [Leka asuke.] Lekeni mulange ica kwaafwa ukusambilila ico tubomfya.” Langisha icitabo ca Ukwishiba, alukila kwi bula 3 pa kuti mwine ŋanda engamona umutande wa filimo, kabili mwipushe ukuti, “Bushe mwalibala amutontonkanyapo cintu Baibolo isosa pa lwa aya malyashi?” Alukila ku cipandwa citontelwepo ubuseko, kabili belenga utumitwe tunono. Londolola ifyo kuti watemwa ukulangilila mu kwipifya fintu tulanshanya ifi fyebo muli kosi wesu uwe sambililo. Nampo nga isambililo lyatendeka nelyo iyo, tambika icitabo pa musangulo wa lyonse.
5 Ilelo cinkupiti wa bantu baleankula ku kwishiba kwalungikwa ukwa kwa Lesa wa cine. (Esa. 2:2-4) Cili lishuko lyesu ilya kwaafwa abantu abengi apo twingapesha ukusambilila pa lwa kwa Yehova no kutungululwa ku mweo.—1 Tim. 2:4.