Kuuleni Ubumi Bwenu pa Mulimo wa kwa Yehova

¹ Yesu apashenye abaleumfwa kuli wene ku misango ibili iya bakakuula. Umo akuulile imikalile yakwe pa mwalala wa cumfwila ca kuli Kristu kabili alishipikishe amesho ya kukaanya no bucushi. Umusensenga kakuula umbi aakuulilepo wali kubulwa icumfwila ukwa kaso kabili alifililwe ukushipikisha lintu amafya yaishile. (Mat. 7:24-27) Apo tuleikala ku mpela ya ino micitile ya fintu, tulakumanya amesho ayengi ayabipisha. Ifishibilo fya kutiinya ifya bucushi bukalamba filefulilako lubilo lubilo. Bushe tukashipikisha impela ukwabula ukuti icitetekelo cesu cipungaile? (Mat. 24:3, 13, 21) Ifingi fyashintilila pa fyo tulekuula ubumi bwesu pali nomba. E co, nacipamfya ukuipusha ukuti, ‘Bushe ndekuula ubumi bwandi ubwa Bwina Kristu mu kushangila pa kubombela Lesa mu cumfwila?’

² Cipilibula nshi ukukuula ubumi bwesu pa kubombela Yehova? Cipilibula ukuleka Yehova aletutungulula mu mikalile yesu. Cipilibula ukutonta pa Bufumu nge cintu ico twayangwako sana. Cisanshamo ukumfwila Lesa muli fyonse ifyo tucita cila bushiku. Cikabila ukuipeela no mweo onse ku kubelenga Baibolo ukwa pa lwesu, ukwa lupwa, no kwa cilonganino na mu mulimo wa mwi bala, ukuleka ifi e fyo tutangishe. (Luk. Mil. 12:13; Mat. 6:33) Ukukonka iyo nshila ya cumfwila, kukafumamo icitetekelo cakosa ndi icishakawishiwe lintu kwaimako amafya ayali yonse ayabipisha.

³ Ca nsansa ukumona ifyo abantu abengi abashileitwishika balekuula ubumi bwabo na masubilo yabo aya ku ntanshi pa kubombela Lesa, nge fyo na Yesu acitile. (Yoh. 4:34) Balakakatila ku milimo ya teokrasi iyatantikwa ukwabulo kuputawisha kabili balamwenamo amapaalo mu kucite fyo. Nyina umo alondolwele fintu ena no mulume wakwe batungulwike mu kukusha abana babo babili abaume ku kulabombela Yehova pa kusoso kuti: “Twaiswishe ubumi bwesu ne cine—ukuya ku mabungano yonse, ukupekanishisha no kusangwa ku kulongana, no kulenga umulimo wa mwi bala inshila ya lyonse iya bumi bwesu.” Umulume wakwe alundilepo ukuti: “Icine tacili lubali lwa bumi bwesu, caba e bumi bwesu. Icili conse cimbi cishunda pali cene.” Bushe na imwe mwatangisha ukubombela Yehova mu lupwa lwenu?

⁴ Tantikeni Imibombele ya Cila Mulungu Iingabomba Bwino: Ukuteyanya kwa kwa Yehova kulatwafwa ukukonka imitantikile isuma iya ku mupashi pa kutubikilako ukulongana kusano cila mulungu. Abena Kristu abalekuula ubumi bwabo pa kupepa Yehova balateyanya incito shabo isha ku mubili ne fya lupwa mu nshila ya kuti fyabashilako inshita ya kusangwa kuli uku kulongana konse ukwacindama. Tabaleka ifintu ifishicindeme fipumfyanye ukusangwa ku kulongana lyonse.—Fil. 1:10; Heb. 10:25.

⁵ Abena Kristu bakosoka balishiba ukuti filya fine cacindama ukulya lyonse pa nshita shaimikwa cila bushiku, e fyo cacindama no kutantikila bwino bwino isambililo lya pa lwabo ne lya lupwa, ukusanshako no kupekanishisha ukulongana. (Mat. 4:4) Bushe kuti muleshako amaminiti 15 nelyo 20 cila bushiku aye sambililo lya pa lwenu? Inkaama yaba kukaanaleka ifintu fimbi ukupumfyanya inshita mwaimika ukusambililamo. Belesheni ukulacite fyo lyonse. Ici kuti cakabila ukulashibukako bwangu cila lucelo ukucila ifyo mushibuka pali nomba. Abantu 17,000 ababa mu lupwa lwa Bethel mwi sonde lyonse balashibuka bwangu ulucelo pa kuti bengalanshanya ilembo lya ubo bushiku. Kwena, pa kuti muleshibuka bwangu cikabila ukusendama bwangu pa kuti ubushiku bwakonkapo mukashibuke na maka.

⁶ Nga ni mwe mutwe wa lupwa, itendekeleniko ukupekanya no kuteyanya imitantikile ya mibombele ya teokrasi iya lupwa lwenu. Indupwa shimo shilabelenga Baibolo, Yearbook, nelyo ulupapulo lumbi capamo lintu baletuusha pa numa ya kulyo mulalilo. Abafyashi abengi abaakusha abana babo ukuba Abena Kristu bashangila lwa ku mupashi basoso kuti cimo icalengele ukuti batunguluke ca kuti ulupwa lwabo lwalibeleshe ukushako inshita ya cungulo bushiku cila mulungu intu baleipakisha ifya ku mupashi capamo. Wishi wa musango yo umo atile: “Ndemone fyo icikalamba icalengele abana besu ukulunduluka lwa ku mupashi lisambilo lya lupwa ilyatendeke imyaka 30 iyapitapo ilyalecitwa lyonse pali Citatu ubushiku.” Abana bakwe bonse batatu babatishiwe ilyo bali abaice, na pa numa bonse batatu batendeke ubutumikishi bwa nshita yonse. Ukulunda pe sambililo lya lupwa, kuti mwaipakisha ukupituluka mu filangililo fya kubomfya mu mulimo wa mwi bala nelyo mu malyashi ya mu kulongana capamo ne milimo imbi iisuma.

⁷ Mu mitantikile yenu iya cila mulungu, bushe ‘mulabomfya inshita’ ku kushimikilo Bufumu? (Kol. 4:5) Fwe bengi twalipamfiwa, pa mulandu ne ndupwa tusunga ne milimo ya cilonganino twapeelwa. Nga tatupekenye bwino ukubombako mu kushimikila no kusambilisha cila mulungu, ifintu fimbi kuti fyapumfyanya uyu mulimo wacindama ukwabulo bwafya. Umwaume uwatekele ing’ombe ishingi atile: “Muli ba 1944 naishileiluka ukuti inshila yeka fye iyali no kunenga ukuya mu kushimikila yali kutantikapo ubushiku bumo ubwa kushimikilamo. Ukufika ne lelo ndashako ubushiku bumo mu kati ka mulungu pa kuti ningalashimikilako.” Eluda wa Bwina Kristu umo alisanga ukuti ukutantika bwino inshita ya kushimikila kulamulenga ukubombako amaawala 15 nga kwaakanya cila mweshi muli uyu mulimo. Nga ca kuti akalabomba umulimo wa ku mubili uuli onse pa Cibelushi, autantika ukubombwa icungulo pa numa ya kushimikilako mwi bala ulucelo. Bushe imwe no lupwa lwenu te kuti mutantikeko fye nangu bushiku bumo cila mulungu ubwa mulimo wa mwi bala, ukuleka iyi mitantikile ibe mu mikalile yenu iya ku mupashi?—Fil. 3:16.

⁸ Bebeteni Ifyo Mucita Cila Bushiku: Kwalibako ificilikila ukukuula ubumi bwesu pa kubombela Yehova. Ifya mankumanya kuti fyapumfyanya isambililo, ukulongana, no kushimikila ifyatantikwa bwino nga nshi. Satana, Umulwani wesu, kuti acite cili conse ku ‘kutulesha’ no kufulunganya amapange yesu. (1 Tes. 2:18; Efes. 6:12, 13) Mwileka ifi fipindami fimufuupule, ica kuti no kutompoka mutompoke. Teulukeni umulekabilwa pa kuti mubombe imilimo ya teokrasi iyatantikwa. Umupampamina no mukoosha filakabilwa pa kubomba ifintu ifyacindama.

⁹ Tatufwile kuleka ukusonga kwa ku calo no kusonga kwaluma ukwa mubili wesu uushapwililika ukutwingisha mu milimo ishili ya ku mupashi iingatendeka ukutupwila inshita iikalamba no kutulafya. Ukuibebeta kulekabilwa, ukulaipusha ifipusho pamo nga: ‘Bushe imikalile yandi panono panono naifuma mu nshila, atemwa ukupumbulwa? Bushe nintendeka ukukuula ubumi bwandi pa fintu fya muli cino calo ifileya? (1 Yoh. 2:15-17) Yakula shani inshita mpoosa ku fintu fya pa lwandi, ku nyendo sha kukokoloka, ku mangalo, nelyo ku fya kusekesha fimbi—na ku kutamba televishoni nelyo ifya pali bakompyuta, ukucila intu mpoosa ku fya ku mupashi?’

¹⁰ Nga mwamona ukuti mwaba abapamfiwa mu kucishamo ne milimo ishacindama mu bumi bwenu, cinshi mwingacita? Nga fintu fye Paulo aapepele kuli Yehova ukuti bamunyina ‘bengateululwa,’ nelyo ukuti “balengwe ukutontonkanya bwino,” cinshi mushingapaapaatila Yehova ukuti amwaafwe ukwangwa ku mulimo wakwe nga kale? (2 Kor. 13:9, 11, NW, utumashiwi twa pe samba.) Lyene pampamineni pa kulacita ifyo mupingwilepo ukucita kabili teulukeni umulekabilwa. (1 Kor. 9:26, 27) Yehova akamwaafwa ukukanayalukila ku kwa kulyo nelyo ku kwa kuso lintu mulemubombela mu cumfwila.—Linganyeniko Esaya 30:20, 21.

¹¹ Pamfiweni mu Mulimo wa kwa Lesa uwa Buseko: Abantu abengi balafwaya insansa icine cine lelo ilyo baba mupepi no kufwa basanga fye ukuti, ifikwatwa baletukuta ukukwata tafyabaletela nsansa shibelelela. Cali “kufuluko mwela.” (Luk. Mil. 2:11) Lubali lumbi, nga twaangwa kuli Yehova mu mikalile yesu, ‘ukubika Yehova ku ntanshi yesu pe,’ tukekushiwa icine cine. (Ilu. 16:8, 11) Caba pa mulandu wa kuti Yehova e walengo kuti tubeko. (Ukus. 4:11) Ukwabula uyu Kalenga Mukalamba uwa Mifwaile, ubumi kuti bwaba fye icibebebe. Ukubombela Yehova kutulenga ukukwata umulimo wine wine, uwakwata imifwaile uo ifwe na bambi twingamwenamo ku ciyayaya conse.

¹² Calicindama ukukanasenda ifintu buyefyabuyefya no kumona kwati impela ya calo ca kwa Satana iileisa lubilo lubilo taili iyapamfya. Imikalile yesu cila bushiku isongwa no musango tumwenamo ifya ku ntanshi. Abaikeleko pa nshita ya kwa Noa, abashacetekele ukuti kukabako ilyeshi lye sonde lyonse, “tabaishibe,” baangilwe fye ku fintu fya pa lwabo, uko e kuti ukulya, ukunwa, ukuupwa no kuupa, lyasukile ilyeshi lyaisa no “kusenda bonse.” (Mat. 24:37-39) Ilelo, abo abayangwa ku fya pano isonde bali no kumona ukuti ifyo benekela ku ntanshi fyaonaulwa mu bonaushi bwakulisha ubushatala abucitikilapo abantu, ubo ‘bushiku bwa kwa Yehova.’—2 Pet. 3:10-12.

¹³ E co twalilileni ukukuula ubumi bwenu pali Lesa wa mweo, Yehova na pa kucito kufwaya kwakwe. Takuli umulimo mwingatendeka muli buno bumi uwingakwata Katungilila wacetekelwa nga Yehova. Tabepa, akafikilisha amalayo yakwe. (Tito 1:2) Tafwa, conse ico mwaseekesha kuli wene tacakalube. (Hab. 1:12; 2 Tim. 1:12) Ubumi tulekuula pali nomba ubwa cumfwila ne citetekelo ni ntendekelo fye iya bumi ubukabako umuyayaya ubwa kubombela Lesa wesu uwa nsansa mu buseko!—1 Tim. 1:11; 6:19.

[Amashiwi pe bula 3]

“Icine tacili lubali lwa bumi bwesu, caba e bumi bwesu. Icili conse cimbi cishunda pali cene.”