Shimikileni Imbila Nsuma mu Kucincila
1 “Ndefuluko kumona imwe . . . Ndi no mutima uwasantuka ukubile mbila nsuma na kuli imwe.” Aya e mashiwi ya kwiswila ayo umutumwa Paulo alembele muli kalata kuli bamunyina mu Roma. Cinshi calengele Paulo ukuba uwacincila ukufwaya ukuyabatandalila? Atile: “Ukuti imoneko ifisabo na muli imwe . . . Pantu nshili na nsoni ku mbila nsuma; pantu e maka ya kwa Lesa aya kupusushisha.”—Rom. 1:11-16.
2 Paulo alangile ukucincila kumo kwine lintu alelanda ku bakalamba ba mu Efese. Abacinkwileko ati: “Ukufuma ku bushiku bwa ntanshi umo nanyantile mu Asia . . . , nshakwindile . . . kumusambilisha pa bantu na mu ng’anda ne ng’anda, pa kushimikila ku baYuda, na ku bena Hela pamo.” (Imil. 20:18-21) Mu cifulo conse ico Paulo alebombelamo, alefwaisha ukushimikila imbila nsuma ye pusukilo no kulobololamo ifisabo fya Bufumu. Mwandi mupashi usuma uwa kupashanya!
3 Kuti twaipusha atuti: ‘Bushe na ine e fyo nacincila mu kubilisha imbila nsuma uko njikala? Ukucila ukulashimikila fye kulila ndebomba, bushe nalicincila mu kwebako abantu abengi imbila nsuma ukulingana na maka yandi? Bushe nintontonkanya pa lwa mibele ndimo no kupepelapo? Bushe nalyesha inshila shonse isha kushimikilamo ishingabomba mu cifulo cesu ica kubombelamo, pamo nga ukushimikila ku ng’anda ne ng’anda, mu misebo, mu ncende sha makwebo, pa telefoni, na mu lyashi fye?’
4 Shimikileniko mu Kucincila mu April: April mweshi uusuma uwa kuti tukalundeko ukushimikila kwesu. Apo nomba amaawala yafwaikwa nayacefiwako abengi kuti babombako bupainiya bwa kwafwilisha. Nalimo ifintu filiko bwino ica kuti kuti mwabombako bupainiya bwa kwafwilisha mu April na May. Atemwa kuti mwalembesha bupainiya bwa nshita yonse, apo nomba amaawala yafwaikwa nayacefiwako. Nga nimwe bakasabankanya pa cilonganino, bushe uno mweshi no ukonkelepo te kuti mucishepo pa nshita mupoosa mu kushimikila, pa kuti mwingatungilila abengabomba bupainiya? Nga mwacite fyo mukalenga umutima wa kwa Yehova ukusamwa!
5 Bakasabankanya ba Bufumu, ukupala Paulo, bafwile ukutwalilila ukucincila ukupitila mu kufwaya ukubombako umulimo wa kushimikila. Nga twabomba ukufika apo twingapesha mu butumikishi tukasanga ubuseko bwa cine cine. Paulo alisangile ubu ubuseko mu mulimo wakwe uwashila. Tufwile ukupashanya ica kumwenako cakwe icishaiwamina.—Rom. 11:13; 1 Kor. 4:16.