Bapainiya ba Kwafwilisha 6,000—Balefwaikwa

Bushe Kuti Mwabombako Bupainiya bwa Kwafwilisha mu March? April? May?

¹ “Bakashimikila 1,000 Balefwaikwa” waali e mutwe wa cipande casabankanishiwe muli The Watch Tower wa April 1881. Icipande calelomba abaume na banakashi bonse abaipeela, “abo Shikulu aseekeshako ukwishiba icine Cakwe,” ukubomfya inshita iili yonse intu bengakwata ku kubombako umulimo wa kwananya icine ca Baibolo. Abo bonse abengapeela citika wa nshita yabo nelyo kucilapo ku kubomba fye umulimo wa kwa Shikulu, balikoseleshiwe ukuitemenwa ukubomba nga bakabila ba mbila nsuma bakolopota—abatangilile bapainiya ba lelo.

² Nangu cingati inshita shalyaluka ukutula muli ba 1800, icishinka cimo citwalilila ukuba cimo cine—ababomfi baipeela aba kwa Lesa bafwaya ukutwalilila ukubomfya inshita yakulilako ukufika apo bengapesha mu kwananya imbila nsuma. Ukubomba pamo nga bapainiya ba kwafwilisha kulaafwa bakasabankanya ba mu filonganino ukuwamyako imibombele yabo ilyo balelundako ukubombesha mu butumikishi bwa Bufumu.—Kol. 4:17; 2 Tim. 4:5.

³ Ukutula fye apo uyu mulimo wa bupainiya bwa kwafwilisha watendekele, imyanda ya makana iya bamunyina na bankashi baliipakisha wene. Ukucincimuka muli iyi mibombele ya butumikishi bwa bupainiya kwalingilishiweko ica kuti icipimo ca pa muulu ica bapainiya ba kwafwilisha 5,823 mu mweshi wa April 1992 califikilwepo mu Zambia! Mu kushininkisha tucili tulemona ifyo kuti twabwekeshapo uku kubombesha mu myeshi ya March ukufika kuli May 1997.

⁴ Tulemukoselesha ukuba no buyo bwa bupainiya bwa kwafwilisha umweshi umo nelyo ukucilapo mu March, April, na May. Mulandu nshi twasanshishako March? Pantu uno mwaka Icibukisho ca mfwa ya kwa Kristu cikabako pa Mulungu, March 23. Takuliko inshila imbi iyawamapo iyo twingabomfeshamo imilungu itangilile Icibukisho ukucila pa kubombako mu kupimpa umulimo wa kushimikila Ubufumu uo Shikulwifwe kabili Umupusushi wesu, Yesu Kristu, aimike. Nga twabombesha apakalamba mu bunte mu March, kuti twalaalika abalesekelela abengi ukuilunda kuli ifwe mu kwibukisha imfwa ya kwa Kristu. March na kabili ukaba mweshi waibela pantu, pa muku wa kubalilapo, tukalashalika icitabo cipya, Icaba Inkaama ku Nsansa sha Lupwa. Mu kulundapo, umweshi wa March wakwata inshiku sha pa Cibelushi ne sha pa Mulungu shisano, icingasuminisha imibombele yaluma iya mulimo wa mwi bala pa mpela ya milungu. Kwena, mu myeshi ya April na May, nga twatwalilila ukubombesha mu kupimpa, tukaba na maka ya kukonkelela abantu balesekelela abo tukasanga no kutendeka amasambililo ya Baibolo aya mu ŋanda ayapya, ukubomfya broshuwa wa Cinshi Cintu Lesa Afwaya Kuli Ifwe? Na kabili tukabomba mu cifulo cesu conse, ukucilisha pa mpela ya milungu, na bamagazini ba Ulupungu lwa kwa Kalinda na Loleni! aba pa nshita yalinga aba ndakai.

⁵ Ni Bani Bafikapo Ukubomba Bupainiya bwa Kwafwilisha?: Icitabo ca Abateyanishiwa ku Kupwilikisha Ubutumikishi Bwesu, ibula 113, cilondolola ukuti: “Iili yonse imibele ya pa lobe, nga walibatishiwa, waliba mu kwiminina kusuma, kuti watantika ukukumanya ififwaikwa fya kupoosa amaawala 60 pa mweshi mu butumikishi bwa mwi bala kabili wacetekele fyo kuti wabomba umweshi umo nelyo iyafulilako nga painiya wa kwafwilisha, baeluda ba pa cilonganino kuti basekelelo kulanguluko kwipusha kobe pali ili shuko lya mulimo.” Bushe kuti mwaba na maka ya kukwata ili shuko mu March? April? May?

⁶ Nga ca kuti baeluda baba ne mibele ya mutima iisuma na bakasabankanya bonse batungilila no mutima onse kuti calenga abengi ukwankulako apakalamba kuli ubu bwite bwa bapainiya ba kwafwilisha 6,000. (Heb. 13:7) Imitwe ya ndupwa yonse ilekoseleshiwa ukumona ni banga mu lupwa lwabo abengailunda ku mitande ya bapainiya ba kwafwilisha umweshi umo nelyo ukucilapo muli iyi myeshi ileisa.—Ilu. 148:12, 13; linganyeniko Imilimo 21:8, 9.

⁷ Mwisuswa mu kusondwelela ukuti te kuti mubombe bupainiya bwa kwafwilisha pa mulandu wa ncito yenu iya ku mubili iya nshita yonse, isukulu, ifishingamo fya lupwa, nelyo ifishingamo fimbi ifya mu Malembo. Kuli bamo, pambi te kuti cibe icayanguka ukubombako; nangu ni fyo, mu kuba no kuteyanya bwino ne paalo lya kwa Yehova, kuti batunguluka. (Ilu. 37:5; Amapi. 16:3) Lekeni ukufwaisha kwa kubombako umulimo wa bupainiya e ko kutungulule imibele yenu; mwileka imibele yenu e yo itungulule ukufwaisha kwenu ukwa kubomba bupainiya. (Amapi. 13:19a) E ico, mu kuba no kutemwa kwakosa kuli Yehova na bantunse banensu, abengi baliba na maka ya kuteulula imibombele yabo iyatantikwa cila mulungu pa kuti bengatanununa ubutumikishi bwabo umweshi umo pa nshita imo. (Luka 10:27, 28) Amapaalo ayengi yalibikilwa abo abapilikita mu mulimo wa Bufumu.—1 Tim. 4:10.

⁸ Fintu Bupainiya bwa Kwafwilisha Bupwishishisha: Ukubombesha kwa mweo onse uko amakana ya babomfi ba kwa Lesa balanga muli bupainiya bwa kwafwilisha kufumamo ukulumbanya Yehova apakalamba. Ilyo aba bakabilisha ba Bufumu balepilikita mu kwananya imbila nsuma ku bantu abengi, balapalamikwa kuli Yehova pa lwabo pantu balasambilila ifya kushintilila pali wene mu kucilapo ku kubapeela umupashi wakwe ne paalo.

⁹ Ukuba na bapainiya ba kwafwilisha, aba nshita yonse, na baibela abacincila mu kati kesu kulalenga umupashi usuma uwa bukose mu cilonganino. Ukucincimuka kwabo kulambukila ilyo baleshimika ifya kukumanya fyabo ifya mwi bala. Ici cilakunta bambi ukupimununa cipya cipya ifyo batangisha pa ntanshi na pantu bengafika mu kutanununa imibombele yabo mu mulimo wa butumikishi uwacindamisha. Nkashi uwabatishiwe pa mushinku wa myaka 70 atendeke ukubomba bupainiya bwa kwafwilisha mu kutwalilila pa numa fye ya lubatisho. Pa numa ya myaka imo iyakonkelepo, lintu aipushiwe icalengele ukuti atwalilile ukupikintika ifyo mu butumikishi pamo nga painiya wa kwafwilisha cila mweshi pa mushinku wakwe, atile, aleyumfwa kwati alyonawile imyaka yakwe iya kubalilapo 70, kabili talefwaya ukonaulapo imyaka yakwe iili yonse iyashalako iya bumi!

¹⁰ Uuli onse uubombako umulimo wa bupainiya bwa kwafwilisha alalundulula ukulamuka kwawaminako mu butumikishi. Nte wacaice umo asumine ukuti: ‘Ilyo naali umwaice nga nshi nalekonka abafyashi bandi mu mulimo wa kushimikila. Umulimo wa mwi bala waali uusuma mu cine cine. Nangu cibe fyo, mu kwangufyanya, naishileishibikwa nga uwapusanako ku basambi bambi abashala pa sukulu. Lyene calishilengafya ukulanda icine ku basambi banandi. Lintu twaleshimikila ukufuma ku ŋanda ne ŋanda, natendeke ukutiina ukukumanya uuli onse untu naishibe pa sukulu. Natontonkenye ukuti icalengele caali kutiina umuntu. [Amapi. 29:25] Pa numa ya kupwisha isukulu, naeseshe ukubomba bupainiya pa nshita inono. Pa mulandu wa ico, naleipakisha umulimo wa kushimikila ukucila na kale lyonse. Nshaumwene na kabili nga imibombele ya musamwe, nangu kuba icisendo cafinisha. Ilyo nalemona abasambi bandi aba Baibolo balelunduluka mu cine, naleipakisha ukwikushiwa mu kushika ilyo nashininwe ukuti Yehova Lesa aletungilila ukubombesha kwandi.’ Uyu musepela akonkeshepo ukubomba pamo nga painiya wa nshita yonse.

¹¹ Ukumwena ifintu mu nshila ibomba, lintu abengi babomba nga bapainiya ba kwafwilisha mu cilonganino, icifulo ca kubombelamo conse cilapwishishiwa. Munyina uubomba ne fifulo fya kubombelamo kuti aipusha bapainiya ba kwafwilisha ukwafwilishako ukupwishishisha ukubomba mu fifulo ifyo fishibombwamo. Kuti bapwishishisha ukubomba muli ifyo fifulo nga ca kuti basendeele libela ica kulya ca kasuba no kubomba akasuba konse mu mulimo ukufika fye na ku ncende shalepa isha cifulo ca kubombelamo.

¹² Baeluda Balekabila Ukupekanishisha Libela: Mu ciputulwa conse ica myeshi itatu iilekonkapo, mulingile ukutantika imibombele yapusanapusana iya kushimikila pa nshita shalekanalekana isha mu mulungu, ukusanshako icungulo kasuba ne cungulo bushiku, pa kuti abafulilako bengabombako. Pa mbali ya mulimo wa ku ŋanda ne ŋanda, sanshenimo ifiputulwa fya nshita ifya kushimikila kwa mu musebo, ukubomba mu matuuka, na mu mayanda yashibapo abantu. Pa kucita ifyo, baeluda balafwilisha abo balebomba bupainiya ukubombako mu mulimo ne cilonganino pa nshita ikaba iisuma ukulingana ne mibombele ya bapainiya. Icilonganino cilingile ukwebwa bwino bwino pa lwa mitantikile ya mulimo wa mwi bala. Ukutungulula ukukumana kwa mulimo kulingile ukuteyanishiwa bwino. Mu kulundapo, kulingile ukubako icifulo ca kubombelamo icakumanina na bamagazini bakumanina ne mpapulo shimbi ukuordwa mu kwangufyanya.

¹³ Pekanyeni Imibombele Yatantikwa iya pa Lwenu: Munyina umo, uyo mu kubalilapo ali no mwenso pa lwa kubomba bupainiya bwa kwafwilisha, atila: “Mu cituntulu cintu cayangukisha nga nshi ukucila fintu natontonkenye ukuti e fyo cali no kuba. Cifwaya fye ukutantika kusuma.” Kwi bula lya ku numa ilya ici ca mu kati, bushe namumona ukutantika kwa bupainiya bwa kwafwilisha ukwa kulangilila uko kwingabomba kuli imwe? Amaawala ya butumikishi 15 cila mulungu e nshita fye iikabilwa kuli bupainiya bwa kwafwilisha.

¹⁴ Pa kuti bengabomba nga bapainiya ba kwafwilisha, bana mayanda, na abo ababomba ifipani fya cungulo kasuba ne cungulo bushiku ilingi line batantika inshita ya lucelo iya mulimo wa mwi bala. Abana be sukulu na abo ababomba ifipani fya nshita ya bushiku pa kati na ku maca ilingi line baipeelesha ukubomba mu mulimo wa kushimikila icungulo. Ababomba incito ya ku mubili inshita yonse balicisanga ukuba icayanguka ukuba pa cuti ubushiku bumo mu mulungu umo nelyo ukupoosa impela sha milungu shonse mu kubomba mu butumikishi, ukulunda pa kubomba ubunte bwa cungulo bushiku. Abengi abengabomba fye pa mpela ya mulungu epela basoobolapo imyeshi iyo yakwatamo impela sha milungu shisano. Uno mwaka, ifyo e fikaba umweshi wa March, pamo pene na August na November. Ukubomfya ukutantika kushilembelwemo akantu pe bula 6 uko kupayanishiwe pamo nga ica kutungulula, tontonkanyenipo mu kusakamanishisha kabili mu kubamo ipepo pa nshila iingabomba ku mulimo wa pa lwenu ukulingana ne mibele yenu.

¹⁵ Ubusuma bumo ubwa kupayanya bupainiya bwa kwafwilisha kukondenkana kwa buko. Kuti mwasala imyeshi iyo mulefwaya ukubomba bupainiya, kabili kuti mwabomba ilingi line ukulingana ne fyo mulefwaya. Nga mwingatemwa ukubomba bupainiya bwa kwafwilisha mu kutwalilila lelo te kuti mube na maka ya kubomba, bushe mwalitontonkanyapo ukulembesha umweshi onse umbi ukupulinkana umwaka? Lubali lumbi, bamo baliba na maka ya kubomba mu kutwalilila pamo nga bapainiya ba kwafwilisha pa fiputulwa fya nshita ifyalepelako.

¹⁶ Ukupekanishisha Bupainiya bwa Nshita Yonse: Abengi abakwata umupashi wa bupainiya kuti batemwa ukubomba nga bapainiya ba nshita yonse, lelo balatwishika nga ca kuti balikwata inshita, imibele nga kuti yabasuminisha, nelyo amaka ya kubomba. Ukwabula ukutwishika abengi nomba abalebomba bupainiya bwa nshita yonse intanshi babomfeshe bupainiya bwa kwafwilisha pamo nga ica kuipekanishishako ku mulimo wa nshita yonse. Ukupitila mu kwingilishako imibombele yatantikwa iya bupainiya bwa kwafwilisha, iawala fye limo ubushiku bumo bumo, nelyo ubushiku butuntulu bumo cila mulungu, kuti mwakumanisha ukufikilisha imibombele mwatantika iya bupainiya bwa nshita yonse. Pa kuti mwishibe nga kuti mwabomba, mulandu nshi te kwesesha ukuipeelesha ukubomba amaawala 90 mu butumikishi mu mweshi umo nelyo imyeshi yafulilako iya bupainiya bwa kwafwilisha? Pa nshita imo ine, mukalalundulula ifipempu fya kubwelelamo na masambililo ya Baibolo, ico cikamwaafwa ukuipakisha ubutumikishi bwa bupainiya ubwashikatala.

¹⁷ Nkashi umo aipakishe ukubomba bupainiya bwa kwafwilisha pa myaka 6 mu kutwalilila. Mu nshita yonse iyo cali buyo bwakwe ukwingila mu mulimo wa bupainiya bwa nshita yonse. Mu kuba no bo buyo, aeseshe ukubomba incito sha ku mubili shine ishapusanapusana mu kusubila ukubomba incito ingamusuminisha ukufikilisha ukubomba amaawala 90 ayafwaikwa kuli painiya wa nshita yonse. Umweshi umo umo, alelemba ukutantika kumo nelyo kubili pa kuti engapenda nga kuti akumanisha ukubomba. Lelo lintu abebetele uko kutantika, ayumfwile ifyo te kuti abombe ubutumikishi bwa nshita yonse. Nalyo line, atwalilile ukwipusha Yehova ku kumutungulula. Lyene bushiku bumo ilintu alepekanishisha Ukulongana kwa Mulimo, abelengele icipande mu Ubutumikishi Bwesu Ubwa Bufumu ubwa September 1991, icalondolwele ukuti: “Ukucila ukubikapo ukukomaila kushalinga pa cifwaikwa ca maawala, mulandu nshi te kutontela ukusakamana pe shuko lya mu nshita ilyaingilishiwako ku kwakana mu mulimo wa kulonganika? (Yoh. 4:35, 36)” Ashimika ukuti: “Nalebwekeshapo ukubelenga uyu sentensi imiku 5 nelyo 6, kabili nalishininkishe ukuti ici caali casuko ukufuma kuli Yehova. Pali iyo nshita nalipingwilepo ukwingila mu mulimo wa bupainiya bwa nshita yonse.” Nangu cingati imitantikile yakwe iya ncito ya ku mubili tayali iyawamisha, alitumine formu wakwe uwa kwipushishapo bupainiya bwa nshita yonse. Umulungu umo pa numa imitantikile yakwe iya mibombele yalyalwike, kabili apeelwe amaawala ya kubombamo incito ya ku mubili ayamulingile fye. Asondwelele ukuti, “Bushe ili lipaalo lya kwa Yehova, nelyo iyo?,” kabili alundilepo ukuti: “Lintu mwaipusha Yehova ukuti amutungulule kabili amutungulula, mwikukaana—kupokeleleni.” Nga ca kuti mulefwaisha ukubomba bupainiya bwa nshita yonse, nakalimo pa mpela ya myeshi itatu iya bupainiya bwa kwafwilisha uno mweshi wa March, uwa April, no wa May, mukashininwa ukuti na imwe bene kuti mwatunguluka mu butumikishi bwa nshita yonse.

¹⁸ Twalishininkisha ukuti Yehova akapaala ukupimpa kabili akatungilila ukubombesha kwa bantu bakwe ilyo balesabankanya imbila nsuma iye pusukilo mu kati ka mibombele ya muli ici ciputulwa ca nshita icaibela ica shinde. (Esa. 52:7; Rom. 10:15) Bushe mukaasuka ubwite bwa bapainiya ba kwafwilisha 6,000 ukupitila mu kubombako mu March? April? May?

[Akabokoshi pe bula 3]

Ifya Kutunguluka nga Painiya wa Kwafwilisha

■ Mucetekele ukuti mukatunguluka

■ Pepeni kuli Yehova ukupaala ukubombesha kwenu

■ Laalikeni kasabankanya umbi uwa kubomba na o bupainiya

■ Tantikeni imibombele ya mulimo iingabomba

■ Ordeni bamagazini bakumanina

■ Afwilisheni imibombele ya cilonganino iya mulimo

■ Fwayeni utushita twa bunte bwa mu lyashi