Programu wa Bushiku bwa Kulongana Kwaibela Ukupya

Programu wa bushiku bwa kulongana kwaibela ukatendeka mu September 1999 ali no mutwe uuleti: “Ukusokota mu Fyashika fya kwa Lesa.” (1 Kor. 2:10) Fintu nshi ifyacindama tukasambilila?

Mu kufwaya ukwishiba, abantu abengi tabapembesulwa ku fyo basanga. Baibolo ilatukosha, nga fintu cikalangililwa kuli kangalila wa muputule mu lyashi lyakwe ilya mutwe uuleti “Ukusokota mu Cebo ca kwa Lesa Kulapembesula.” Pa kwasuka icipusho icileti “Mumona Shani Umulimo wa Kushimikila pa lwa Bufumu?” kalanda umutandashi akalondolola fintu ukusokota mu fyashika fya kwa Lesa kwayampana no kushimikila imbila nsuma.

Abafyashi kuti baafwilisha shani abana babo ukusokota mu fyashika fya mu Cebo ca kwa Lesa? Imitubululo ibomba ikapayanishiwa mu lyashi ilileti “Fundeni Abana Benu Icebo ca kwa Lesa.” Abacaice ba Bwina Kristu balambukilwa mu nshila isuma ukupitila mu kubishanya na bakosoka lwa ku mupashi mu cilonganino. Ifya kumwenako pa fyo bambukilwa fikakomailwapo mu lyashi ilileti “Abacaice Abasambilila ku Bakalamba.”

Mulandu nshi ino nshita tulingile ukusokota mu mukoosha icuma ca ku mupashi icashikama? Yehova ni Kasokolola wa fya nkama. Mu lyashi ilileti “Yehova Alasokolola Ifyashika Panono Panono,” kalanda umutandashi akalondolola fintu Yehova asokolola mu nshita sha ku kale ne sha ndakai. Ici cikakosho kupingulapo kwesu ukwa kutwalilila “ukusokota mu fyashika fya kwa Lesa.”

Pekanyeni nomba pa kuti mukasangweko. Abalefwayo kulangisha ukuipeela kwabo kuli Yehova ukupitila mu lubatisho balingile ukwishibisha kangalila wa kutangilila mu kwangufyanya. Umukoosha wesu uwa kufwaisha ukusokota mu Cebo ca kwa Lesa ukakoshiwa ku fyo tukomfwa. E co mwikapuswako kuli ubu bushiku bwaibela ubwa kufundwa ifya ku mupashi!