Programu wa Bushiku bwa Kulongana Kwaibela Ukupya

Ukulongana kwaibela ukwa bushiku bumo ukukatendeka mu September 2000 kukaba no mutwe uleti: “Mu Kumfwikisha Mube Abakalamba.” (1 Kor. 14:20) Mulandu nshi cicindamine kuli ifwe ukuti tukasangweko? Twikala mu calo caisulamo bubifi. Pa kubucincintila, tufwile ukulundulula amaka yesu aya kumfwikisha ifya ku mupashi pa kuti tucimfishe ububi ku kucite cisuma. Ico e cintu ukulongana kwaibela kukatwafwa ukucita.

Mu ciputulwa ca kubalilapo, kangalila wa muputule akalanda ilyashi lya kuti “Ifya Kutwafwa pa Kuba Abakalamba mu Kumfwikisha Baibolo.” Akatulondolwela ifya kucita pa kuti tukose mu citetekelo ca Bwina Kristu. Kalanda umutandashi akakomaila pa bucindami bwa kubomfya nelyo ukucita umwabela ifishinte fya mu Baibolo pa kulundulula ukulingulula kwine kwine. Akalanda pali ifi mu lyashi lya kuti “Lindeni Bumupashi Ukupitila mu Kukansho Kulingulula Kwenu.”

Abacaice na bo bene bafwile ukulundulula amaka yabo aya kumfwikisha. Ico cikalandwapo mu malyashi ya kuti “Mulandu Nshi uwa Kubela Utunya ku Fibi?” ne lya kuti “Abacaice Abanonko Mucetekanya Nomba.” Iseni mumfweko ilyo abacaice balelondolola ifyo bacita pa kuti baikoshe lwa ku mupashi pa kulama ukufwaisha ukwishiba ifyaba mu misango yabipa iya ku calo, kabili nga bailama, tabaipoosa mu macushi.

Ni shani twingasanga insansa sha cine cine mu bwikalo bwesu? Kalanda umutandashi akalondolole ci mu lyashi lya kusondwelela ilya kuti “Mwenenimo mu Kubomfya Ifishinte fya Baibolo mu Kuba no Kumfwikisha.” Akalanda pa fya kumwenako fya kulangilila ukuti ukucita ifyaba mu Cebo ca kwa Lesa kulenga twaishiba ifya kucita pa bwafya bumo, twaishiba ifya kupingula pali fimo, no kumwenamo nga nshi mu fyo Yehova aletusambilisha.

Abalefwaya ukuyailanga ukuti nabaipeela kuli Lesa ukupitila mu kubatishiwa mu menshi pali uku kulongana, bepoosa na nshita ukweba kangalila wa kutangilila. Ilyo fye babilisha ubushiku bwa kulongana kwaibela, bikeni icishibilo pali kalenda wenu pali ubo bushiku, kabili ipekanyeni bwino ku kusangwa kuli uyu programu musuma. Mwikapuswa ku lyashi nangu limo ilya pa kulongana kwaibela! Mukakoshiwa ku kushipikisha muli buno bwikashi bwabipa no kutwalilila aba busumino kuli Yehova.