“Abanakashi Abacucutika Muli Shikulu”
1 Paulo atile bankashi babili abalebombesha mu cilonganino ca ku Roma Trufaena na Trufosa bali “[banakashi, NW] abalecucutika muli Shikulu.” Kabili alandile pali Persida ukuti: ‘Alicucutike apakalamba muli Shikulu.’ Alilandile ifintu ifisuma pa lwa kwa Foibe ukuti ali “kaafwa wa bengi.” (Rom. 16:2, 12) Amalembo yalanda pa lwa kwa Dorka ukuti ali “uwaisulamo imilimo isuma ne fya nkumbu ifyo alecita.” (Imil. 9:36) Fintu cawama ukukwata aba banakashi ba bumupashi mu cilonganino!
2 Bushe tulatasha bankashi ababombesha mu cilonganino cesu? E bashimikila sana, balatungulula amasambililo ya Baibolo ayengi, kabili e bafwa abapya abengi. Kabili balapoosa inshita iikalamba ukwafwilisha abana ukulunduluka lwa ku mupashi. Abanakashi ba Bwina Kristu balafwilishako ukuti imibele ya kutemwa, ukusekelela, umutende, no kupimpa ibe mu cilonganino. Balafwilisha na mu nshila ishingi pa kuti abalume babo na bambi aba mu lupwa bengalabomba imilimo iingi mu mulimo wa kwa Yehova.
3 Bankashi Ababa mu Mulimo wa Nshita Yonse: Bankashi bamishonari baba pa babombesha sana mu mulimo wa kwa Shikulu, kabili abengi balibombako ukulundulula umulimo mu fyalo fimbi. Bamuka bakangalila benda balabombesha mu mulimo wa butumikishi no kukoselesha bankashi mu filonganino ifyo abalume babo balebombela. Kabili tatufwile ukulabako bankashi ba pa Bethel, ababomba umulimo washila mu kupimpa ku kwafwilisha ukuteyanya kwa kwa Yehova. Na bankashi bapainiya ba nshita yonse abaleafwa abantu abengi ukusambilila icine ukupitila mu kubombesha kwabo ukwa busumino mu kulumba Lesa.
4 Aba banakashi ba busumino balekushiwa nga nshi mu mikalile yabo iya kuipusula. (1 Tim. 6:6, 8) Balilinga ukutashiwa no kukoseleshiwa no kwafwilishiwa mu nshila ili yonse iyo twingabafwilamo no kubakoselesha.
5 Abanakashi ba Bwina Kristu balicindama mu kuteyanya kwa kwa Yehova, kabili balabomba umulimo wa busumino uwafwilisha bonse. Shi natutwalilile ukutasha aba banakashi no kubapepelako ukuti Yehova alebapaala ilyo ‘balecucutika muli Shikulu.’