Kansheni Ukulingulula Kwenu
1 Inshiku sha kulekesha ishilenga ubulanda, isho tulimo nomba, shalileta amafya ayengi na mesho yabipisha kabili ayalekanalekana ku bantu ba kwa Lesa konse fye. (2 Tim. 3:1-5) Bonse tulakabila ukukoseleshiwa pa kuti twiminine ndi mu kutetekela. (1 Kor. 16:13) Kuti twacite fyo pa kwafwilishiwa na Yehova ilyo tuletwalilila ukusambilila Icebo cakwe lyonse, ukushintilila pa mupashi wakwe, no kupalamisha ku kuteyanya kwakwe.—Amalu. 37:28; Rom. 8:38, 39; Ukus. 2:10.
2 Kanshi kwali umulandu usuma kwabelele umutwe waleti “Mu Kumfwikisha Mube Abakalamba” pa kulongana kwaibela umwaka wapwile. Wafumine pali 1 Abena Korinti 14:20, apo tubelenga amashiwi ya mutumwa Paulo ayatila: “Mwe ba bwananyina, mwiba baice mu mitima; ku bubi e ko mube utunya, lelo mu [kumfwikisha, NW] mube abakalamba.” Bushe mwayumfwile shani pali ulya programu?
3 “Ala yali ya kukoselesha!” “Ifi fyebo e fyo fye twalekabila!” Ifi e fimo ifyo abantu balandilepo. Nangu fye ni umo uushili Nte uwaishile ku kulongana kwaibela ku kumona uko umwana wakwe umukashana uuli ne myaka 12 alebatishiwa atile alitemenwe sana programu no kuti alimwene ifyo inganonsha ulupwa lwakwe. Bushe na imwe e fyo mumfwa? Natwibukisheko ifishinka fikalamba fimo ifya ulya programu.
4 Ukwishiba Kwine Kwine Kulakabilwa pa Kukansha Ukulingulula Kwesu: Mu lyashi lya kubalilapo ilyaleti, “Lundululeni Ukumfwikisha Kwenu Nomba,” cinshi kalanda akomailepo ukuti cilakabilwa ku kwansha mafya ya muno nshiku? Tatufwile fye ukuba aba mano. Tufwile ukukansha no kukosha amaka yesu aya kumfwikisha Baibolo, epali twacimfiwa ku bubi bwa mu calo. Pa kuti twingaba no ku kumfwikisha kano twaafwiwa na Lesa. Nga kemba wa malumbo, tufwile ukupepa kuli Yehova no kumulomba ukutulenga ukumfwikisha amafunde yakwe ne fishimiko pa kuti twingamubombela no mutima onse.—Amalu. 119:1, 2, 34.
5 Mu lyashi lyakonkelepo, kangalila wa muputule alondolwele ukutila Yehova, ukupitila mu Cebo cakwe no kuteyanya kwakwe, alatupeela “Ifya Kutwafwa pa Kuba Abakalamba mu Kumfwikisha.” Ukumfwikisha kwalondolwelwe ati “maka ya kumona umulandu no kwiluka ifilimo ukupitila mu kutesekesha ifyo fyampene ku mulandu onse, pa kuti umo engeluka umo ulolele.” Nani engatwafwa ukuba ne yi mibele? Yehova alitupeela ifya bupe ku bantu ku kutwafwa ukulunduluka lwa ku mupashi. (Efes. 4:11, 12) Ukuteyanya kwakwe ukwa pe sonde kutukoselesha ukubelenga Icebo ca kwa Lesa cila bushiku no kusangwa lyonse ku kulongana konse ukwa cilonganino. (Amalu. 1:2) Tulasambilishiwa ifya kubomfya Baibolo ne mpapulo shesu isha Bwina Kristu ilyo tulesambilila fweka nelyo ngo lupwa na lintu tulepekanishisha ukulongana nelyo ubutumikishi bwa mwi bala. Bushe mulebomfya bwino ifi fintu fyonse ifyo twapeelwa? Bushe mulabelenga Baibolo lyonse pa lwenu? Ukucita ici kwalicindama nga tulefwaya ukucingililwa ku kunakila ku nshila sha ku calo, umupashi wa ciko, amano ya bantunse, ne fintu fya longolo.—Kol. 2:6-8.
6 Ukulingulula Kwesu Kulingile Ukukanshiwa: Mu lyashi lyakwe ilya kubalilapo, ilyaleti “Lindeni Bumupashi Ukupitila mu Kukansho Kulingulula Kwenu,” kalanda umutandashi alondolwele ukuti abantu ba mu calo tabengapaatulula ubusuma ukubulekanya no bubi. (Esa. 5:20, 21) Ici ni pa mulandu wa kuti balikaana ukusumina no kukonka ifipimo fya kwa Lesa ifyalungama. Lelo, ifwe fwe bakanshiwa lwa ku mupashi mu kuteyanya kwa kwa Yehova tulakonka ifishinte fya kwa Lesa, ifyo tukonka mu fyo tucita na mu myendele yesu. E co, kuti twalinga icisuma kabili ica kutemuna mu menso ya kwa Yehova kabili icalingana no kufwaya kwakwe ukwapwililila.—Rom. 12:2.
7 Pa kutaluka ku kutontonkanya kwalubana ukwa cino calo ne fibi ififumamo, tufwile ukutwalilila ukukansha ukulingulula kwesu. Kuti twacita shani ici? Nge fyo calembwa pa AbaHebere 5:12-14, umutumwa Paulo akomaile pa kukabila kwa kulya ifyacila pe “shiba” lya cebo. Tukabila ifilyo fya ku mupashi ifyakosa, pamo nge fyo tulepokelela pa kusambilila ukusesema kwa kwa Esaya pe Sambililo lya Citabo ilya pa Cilonganino. Lyene tufwile ukukonka sana ifyo twasambilila. Nga twacite fyo, tulashininkisha ukuti ifishinte ne fipimo fya kwa Yehova fyalilungama. Ici cilakansha ukulingulula kwesu ku kupaatulula bwino bwino ubusuma ukubulekanya no bubi.
8 Ica bulanda ca kuti bamo balinaka lwa ku mupashi. Mulandu nshi? Tabatontonkanya pa fyawama kabili ifyatambalala mu menso ya kwa Yehova. Icacitika ca kuti balakutika ku maprogramu ya pa cilimba no kutamba amaprogramu ya pa TV umwaba ifintu fyapusana ne fyo Amalembo yasambilisha, balakutika ku nyimbo shibi, nelyo ku fyabipa fimbi. Nga twacita ifintu mano mano, tukataluka ku kusongwa ku bantu babula imibele isuma, abapumbu, kabili ababifi.—Amapi. 13:20; Gal. 5:7; 1 Tim. 6:20, 21.
9 Abaice Bafwile Ukuba ‘Utunya ku Bubi’: Programu yakwete amalyashi yabili ayakoseleshe abaice ukukansha ukulingulula kwabo. Bakalanda balondolwele ukuti ukuba ‘utunya ku bubi’ kwalola mu kuba lyonse abashaishiba, e kuti, ukuba ngo tunya, ku fyakowela mu menso ya kwa Yehova. (1 Kor. 14:20) Bonse twakoseleshiwe ukucenjela ifyo tubomfya inshita pa kuti tukaane imisango yonse iya bubi no kutaluka ku kusongwa na yene. (Efes. 5:15-17) Twakoseleshiwe ukupenda inshita tubomfya ukubelenga ifintu fishitwafwa sana ukukula mu maka yesu aya kumfwikisha. Bushe mwalipendele? Mwasangile shani? Ukulunda pa kubelenga Baibolo cila bushiku, pampamineni pa kutwalilila ukubelenga ne mpapulo ukuteyanya kutupeela. Ukucite fi kukatwafwa bonse, pamo na baice, ‘ukunonko mucetekanya.’—Amapi. 4:7-9.
10 “Mwenenimo mu Kubomfya Ifishinte fya mu Baibolo mu Kuba no Kumfwikisha”: Uyu wali e mutwe wa lyashi lya kulekelesha pa kulongana kwaibela. Kalanda umutandashi alondolwele ukuti Yehova e Ntulo ya kumfwikisha kupeela ubumi, ukwacila nga nshi pa kumfwikisha kwa bantunse bonse. Tontonkanyeni pe shuko lya kwishiba bwino Yehova! Mu cikuuku alenga abantu abasokota mu kufumaluka no kumulomba mu kucetekela ukumwishiba. (Amapi. 2:3-5, 9; 28:5) Bushe mulebomfya bwino ici cintu atupeela?
11 Twalikoseleshiwe ukusambilila ukwishiba ifishinte ilyo tulebelenga Baibolo. (2 Tim. 3:16, 17) Fisambilileni bwino ku kumfwikisha bwino ifyo Yehova alelanda. Pooseniko inshita ukutontonkanya pali ifi fishinte no kufisunga mu muntontonkanya wenu na mu mutima. Ukucite fi kukakansha ukulingulula kwenu pa kuti mwingasala bwino ilyo mulepingula pali fimo mu bumi. (Yosh. 1:8) Natumone ifintu fimo ificitikila bamo no kumona ifyo ifishinte fya mu Baibolo fingatwafwa ukutunguluka.
12 ‘Bushe mfwile ukusala umusango umo uwa mifwalile ne mimonekele?’ Imifwalile ne mimonekele yabipa iya muli cino calo ilingi line filanga umupashi wa bucipondoka. Umupashi wa musango yo ulenga abantu ukufwala ifishalolamo kabili ukuba no busanku nelyo ku kubimbula bambi. Fishinte nshi ifyalinga ifya mu Baibolo ifingatwafwa ukucimfya ifya musango yo? Nga twalikansha ukulingulula kwesu, tukatontonkanya pa cishinte caba pali 1 Timote 2:9, 10, ukufwala “no bufuuke no kutekanya . . . , imilimo isuma iiyene [abantu] abatila tutiina Lesa.” Ifishinte fimbi twingabomfya ni filya fisangwa pali 2 Abena Korinti 6:3 na Abena Kolose 3:18, 20.
13 ‘Cinshi ningacita ku kulenga ulupwa lwandi ukuba ulwaikatana lyonse?’ Ukulanshanya kusuma mu lupwa kwalicindama. Yakobo 1:19 itweba ati: “Umuntu onse abe uwayanguka ku kuumfwa, uwakokola ku kulanda, uwakokola ku kukalipa.” Ababa mu lupwa balingile ukukutika kuli bambi no kulanda na bo pantu mu kulanshanya kwa mu lupwa mwaba ukulanda no kukutika. Nangu ifyo tulesosa fya cine, nga twafilanda mu bunkalwe, ne cilumba nelyo ukwabula ukusakamana, kuti caleta fye amafya ukucila ukwafwa. E co nampo nga tuli balume nelyo abakashi, abafyashi nelyo abana, tufwile ukuleka imilandile yesu ukuba ‘pe iya kusenamina, iyalungwamo umucele.’—Kol. 4:6.
14 ‘Bushe ndekonkelela ifyuma ne fikwatwa?’ Ukutemwa ifyuma ne fikwatwa cintu aba mu calo abengi bacita kabili cilapikanya ubumi bwa muntu. Takwafwa umuntu ukusanga insansa sha cine cine. (Luk. Mil. 5:10; Luka 12:15; 1 Tim. 6:9, 10) Ku kutwafwa ukutaluka iciteyo ca kutemwa ifikwatwa, Yesu atusambilishe ici cishinte cacindama ica kuti: Sungeni ilinso ilituntulu. Pa kwikala ubumi busuma, ubushakosa, tufwile no kulenga amenso yesu ukwangwa sana ifya Bufumu, fyonse fimbi ukwisa pa numa.—Mat. 6:22, 23, 33.
15 Ico Tufwile Ukupampaminapo: Icebo ca kwa Lesa ni ntulo ya cine cine iya fishinte fyalungama ifya kutwafwa ukupingulapo bwino. Tulekabila ukusambilila ifi fishinte, ukutontonkanyapo, no kumfwikisha ifya kufibomfya mu bumi bwesu. Nga ‘twakansha ukulingulula kwesu ku kupaatulula ubusuma ukubulekanya no bubi,’ tukainonsha fwe bene no kucindika Yehova.—Heb. 5:14.