‘Lengeni Ulubuuto Lwenu Ukubalika’
1 Icalo catushinguluka caba mu mfifi ku mibele na ku mupashi. Ulubuuto lwa cine lusansalika “imilimo iishitwala” iya mfifi no kutulenga ukusengauka ifya kuipununako fingalete mfwa. E mulandu wine, umutumwa Paulo akoseleshe Abena Kristu ukuti: “Endeni nga abana ba lubuuto.”—Efes. 5:8, 11.
2 “Ifisabo fya lubuuto” fyalipusana sana ne mfifi yaba mu calo. (Efes. 5:9) Pa kutwala ifi fisabo tulingile ukuba ifya kumwenako fisuma mu mikalile ya Bwina Kristu, abantu abo Yesu abekelwamo. Na kabili tulingile ukulanga imibele ya kubomba no mutima onse, ubufumacumi, no kucincimuka pa kukwata icine. Ifi fisabo filingile ukulangwa cila bushiku mu mikalile yesu na mu butumikishi bwesu.
3 Balikeni Apali Ponse: Yesu aebele abasambi bakwe ati: ‘Lengeni ulubuuto lubalike ku cinso ca bantu.’ (Mat. 5:16) Pa kupashanya Yesu, tusanika ulubuuto lwa kwa Yehova ukupitila mu kushimikila pa lwa Bufumu bwa kwa Lesa ne mifwaile yakwe. Tubalika nge fyengelo ilyo tuletandalila abantu pa mayanda yabo na lintu tuletandanya icine ku ncito, pa sukulu, ku bena mupalamano besu, nelyo apali ponse apo twaba ne shuko.—Fil. 2:15.
4 Yesu atile bamo bakapato lubuuto. (Yoh. 3:20) E co, tatufuupulwa ilyo abengi bakaana ukubalika kwa “lubuuto lwa mbila nsuma ya bukata bwa kwa Kristu” muli bene. (2 Kor. 4:4) Yehova alamona mu mitima ya bantu kabili tafwaya abacita ifyabipa ukuba pa bantu bakwe.
5 Ilyo twakonka inshila sha kwa Yehova no kuipakisha ulubuuto lwa ku mupashi, bambi na bo kuti bamona ulubuuto. Lintu imibele yesu yabalenga ukumona ukuti twalikwata “ulubuuto lwa mweo,” na bo kuti bayalula imibele yabo pa kuti babe bakasenda wa lubuuto.—Yoh. 8:12.
6 Ilyo twaleka ulubuuto lwesu ukubalika, tulumbanya Kalenga wesu kabili tulafwa abafumaluka ukumwishiba no kunonka isubilo lya mweo wa muyayaya. (1 Pet. 2:12) Apo twalikwata ulubuuto, natulusanike pa kuti twafwe bambi ukufuma mu mfifi ya ku mupashi no kwisa mu kubomba imilimo ya lubuuto.