‘Lekeni Ulubuuto Lwenu Lubalike’
1. Lishuko nshi twakwata ililenga tulefwaya ukubombesha?
1 Tulamona ulubuuto ukufuma ku maca ukufika inshita ya cungulo kabili lulenga tulelumbanya Yehova Lesa. Lelo Yesu alefwaya abasambi bakwe ukukwata ulubuuto lumbi, e kutila alefwaya bakwate “ulubuuto lwa mweo.” (Yoh. 8:12) Ukukwata ulu lubuuto lwa mweo lishuko sana kabili nga twalukwata ninshi tulingile ukubombesha. Pa kuti abantu na bambi bakamwenemo muli ulu lubuuto, Yesu atufundile ukuti: “Lekeni ulubuuto lwenu lubalikile ku bantu.” (Mat. 5:16) Apo muno calo muli imfiifi ya ku mupashi, tulingile ukupeelako bambi ulu lubuuto, pantu na kuba ino nshita e lyo abengi balelukabila sana! Bushe kuti twalenga shani ulubuuto lwesu ukubalika nga filya Kristu acitile?
2. Bushe Yesu alangile shani ifyo cacindeme ukupeelako bambi ulubuuto lwa ku mupashi?
2 Ukushimikila: Yesu abomfeshe inshita yakwe na maka ku kulenga ulubuuto lwa cine ukwishibikwa ku bantu mu mayanda yabo, mu lubansa, pa muulu wa mpili, no kuli konse uko alesanga abantu. Alishibe ukuti calicindeme ukwafwa abantu ukwishiba ulubuuto lwa ku mupashi ulwa cine cine. (Yoh. 12:46) Pa kuti afwilishe abantu abengi nga nshi, Yesu, alengele abasambi bakwe ukuba “ulubuuto lwa ba muli ici calo.” (Mat. 5:14) Balelenga ulubuuto lwabo ukubalika ilyo balecitila abena mupalamano ifisuma na lintu baleshimikila icine.
3. Bushe kuti twalanga shani ukuti tulatasha sana pa lubuuto lwa mweo?
3 Abantu ba kwa Lesa balacindika umulimo wabo uwa ‘kwenda nga bana ba lubuuto,’ kabili balashimikila ukuli konse uko basanga abantu. (Efes. 5:8) Nga mulebelengela Baibolo nelyo impapulo shimbi apa kutila na bantu balemona, maka maka pa nshita ya kutuusha ku ncito nelyo ku sukulu, abantu bambi kuti bafwaya ukulalanshanya na imwe ifyaba mu Baibolo. Nkashi wacaice uwalecita ifi, alitendeke isambililo lya Baibolo kabili alishalike ifitabo ku bana be sukulu banankwe 12!
4. Bushe ukuleka ‘ulubuuto lwesu ukubalika’ kumfwana shani no kuba ne mibele isuma?
4 Ku Milimo Isuma: Ukulenga ulubuuto lwesu ukubalika na kabili kumonekela mu fyo tucita cila bushiku. (Efes. 5:9) Ilyo bali ku ncito, ku sukulu, na mu fifulo fimbi ifya cintubwingi, Abena Kristu ba cine balaba ne mibele iisuma kabili abantu bambi abamona iyi mibele isuma balasumina ukubashimikila icine ca mu Baibolo. (1 Pet. 2:12) Ku ca kumwenako imibele isuma iya kalumendo kamo aka myaka isano yalengele kafundisha ukutumina abafyashi ba aka kalumendo foni. Atile: “Nshatalamona umwana uwakwata imibele isuma ngo uyu!” Ca cine, umulimo wesu ne fyo tucita filalenga abantu kupokelela “lubuuto lwa mweo” no kuleta ilumbo kuli Lesa wesu.