Cinshi Tulingile Ukutangishako Ilyo Tulepekanya Ifya ku Ntanshi?
1 Ifwe bonse tulatontonkanyapo pa fyo tupanga ukucita ku ntanshi. Abakwata isubilo lya pe sonde balelolela ukwikala kuli pe na pe mu calo cipya ica bulungami ica kwa Lesa. Lelo kwaliba ifintu ifingafumyapo ilyo isubilo lya pa mutima. Ukubombesha kulakabilwa ku kulenga ubumi bwesu bwashimpwa pa fya Bufumu no kukanapumbulwa ku lunkumbwa lwa mubili ulututunka.—1 Yoh. 2:15-17.
2 Icalo te kuti cumfwikishe ififwaya abantu ba bumupashi. (1 Kor. 2:14) Ilyo abantunse bambi batukuta ukulumbuka, ukukwata amaka nelyo icuma, ifwe tutukuta ukukwata ifyuma fya ku mupashi. (Mat. 6:19-21) Nga ca kuti twayalula amatontonkanyo yesu ku kumfwana ne mimwene ya calo pa lwa nshita ya ku ntanshi, bushe kuti twafishapo ubuyo bwesu ubwa ku mupashi? Imitima yesu kuti yasendwa ne fya calo. Ni shani twingalenga ica musango yu ukukanacitika?
3 “Fwaleni Shikulu Yesu Kristu”: Inshila imo iya kwishibilamo nampo nga mapange yesu yashimpwa pa fya Bufumu kubebeta ifyo tulanda. Bushe lyonse tulanda fye pa fikwatwa ne fya calo? Nga e fyo, tufwile ukumona nga ca kuti umutima wesu nauleka ukutontomesha pa fya ku mupashi. Kuti twakabila ukupoosa sana amano ku ‘kufwala Shikulu Yesu Kristu no kukanalangulukila bumubili umwa kufishishapo ulunkumbwa lwa buko.’—Rom. 13:14.
4 Abacaice kuti ‘bafwala Kristu’ ukupitila mu kuipekanishisha kabela ku nshita ya ku ntanshi ilyo bakatendeka ubutumikishi bwa nshita yonse. Uwacaice uwalefwaya ukubomba bupainiya bwa nshita yonse akuulile ku ncende yakwata umwata wa kuti abalumendo balingile ukukwata indalama. E co, aliyobeke sana mu bukwebo ica kuti ukulongana no kubombako ubutumikishi fyasangwike fye ngo mulimo. Ilyo atendeke ukucetekela amashiwi ya kwa Yesu ayaba pali Mateo 6:33 alekele ukuyobeka mu bukwebo, kabili atendeke umulimo wa nshita yonse. Nomba, apo alikwata kampingu musuma, alebombela Yehova, nga fintu asosa, ‘apapelela amaka yakwe.’
5 Baibolo itila cisuma ukupekanishisha ifya ku ntanshi. (Amapi. 21:5) Shi ifwe bonse natulecite fyo fine ilyo tuletangisha ukufwaya kwa kwa Lesa.—Efes. 5:15-17.