Pekanishisheni Libela!
1 Ukuteyanya kwa kwa Yehova kulapayanya programu wa lyonse uwa milimo ya teokrasi uwabelako ku kwikusha ukukabila kwesu ukwa ku mupashi. Ukutasha kutulenga ukushukila fyonse ifitantikwa, pamo ngo kutandala kwa kwa kangalila wenda, ukulongana kukalamba, na mabungano, ne milimo imbi iyaibela iitantikwa pa cilonganino. (Mat. 5:3, NW) Lelo, bamo pa mulandu wa mapange yabo, balapuswako ku fingi ifya ku mupashi ifipayanishiwa. Cinshi bengacita pa kuti belapuswako? Bushe kuti twashininkisha shani ukuti imilimo iishili ya teokrasi taipumfyenye “ifyacilamo”?—Fil. 1:10.
2 Ukupekanya Mano Mano Kulakabilwa: Amapinda 21:5 yakonkomesha ati: “Amapange ya wacincila yatwala ku [bunonshi, NW]; lelo onse [uwasuswa, NW] alola ku kubulwa.” Pa kukwata “ubunonshi” bwa ku mupashi tulekabila ukulapekanishisha libela mu kucincila, ukulaibukisha imilimo ya teokrasi iyatantikwa. Tulingile ukutantika imilimo yesu pa nshita lintu ishingatupusula amapaalo ya ku mupashi. Nga twasuswa mu mapange yesu, ukwabulo kutontonkanya pa fya teokrasi ifikabako, tukalola ku “kubulwa” kwa ku mupashi.
3 Mwilapuswako! Bonse tulapangila libela, pamo ngo kuya pa cuti, ku makwebo, ukutandalila balupwa, na fimbi. Ilyo mushilasondwelela amapange yenu, bebeteni programu wa milimo ya ku mupashi iikabako. Nga mwasango kuti tamwakabepo ilyo kangalila wa muputule akesa nelyo ilyo kukaba ukulongana kukalamba, tukuteni ukuteulula amapange yenu pa kuti mukasangweko. Balatwishibisha libela pa fikalamba ifikabako ku ntanshi. Baeluda mu cilonganino cenu kuti bamweba ifyatantikwa pa mwenu.
4 Ukupitila mu kumwena libela no kupekanishisha libela ifintu ifyacilamo, tukaba ‘abaisulamo ifisabo fya bulungami . . . ku bukata no kutasha kuli Lesa.’—Fil. 1:11.