“Twalibombela mu Cifulo Cesu Imiku Iingi!”
1 Bushe mwalitala amutontonkanyapo ukuti icifulo cenu cilabombelwamo sana ica kuti tamuli abapale mpaanga abashalamo? Napamo mutila: ‘Ninjishiba ifyo abantu bali no kwankulako. Mulandu nshi uwa kulabwelelabwelela ku bantu abashilefwaya no kufwaya?’ Ca cine ukuti ififulo ifingi filabombelwamo libili libili. Lelo, ici tacibipile iyo, cisuma. Mulandu nshi? Moneni imilandu ine iilondolwelwe pe samba.
2 Amapepo Yesu Yalyasukwa: Yesu atile: “Ukulobolola kwena nakukula, lelo ababomfi nabacepa; e ico lombeni Umwine kulobolola ukuti atume ababomfi ku kulobolola kwakwe.” (Luka 10:2) Pa myaka iingi twalipaapaata kuli Yehova ukututumina aba kutwafwa. Mu fifulo ifingi, nomba natukwata ababomfi na bambi abalekabilwa, kabili tulebombela mu cifulo cesu libili libili. Bushe ukwishiba ukuti Yehova nayasuka amapepo yesu takulingile ukutulenga ukusekelela?
3 Ukuba no Mukoosha Kulatwala Ifisabo Ifisuma: Abantu baleankula ku bukombe bwa Bufumu no kufika ku kwishibe cine na mu fifulo fye ifyabombelwamo libili libili. E ico, tulingile ukutwalilila ukulayamo libili libili pa kusubila ukusanga aba mitima yafumaluka na bambi. (Esa. 6:8-11) Nga basambi ba mu kubangilila aba kwa Yesu, ‘muleya’ ku bantu baba mu cifulo cenu, esheni na maka yonse ukubafwa ukutemwa Ubufumu bwa kwa Lesa.—Mat. 10:6, 7.
4 Mu Portugal ifilonganino ifingi fibombela mu fifulo fyabo cila mulungu, lelo bacili balesangamo abapale mpaanga. Nkashi umo ena tafuupulwa nangu panono. Atila: “Cila lucelo ilyo nshilafumina mu mulimo, ndapepa kuli Yehova ukungafwa ukusanga uulefwaisha ukusambilila Baibolo.” Bushiku bumo apangene ukusambilila na babomfi ba mu cikuulwa umo bawamisha umushishi. Nangu cali fyo, ilyo aileko umuntu fye umo e waishile ku kusambilila. Ulya muntu asosele ati: “Bambi tabalefwaya, lelo ine ndefwaya.” Mu mweshi fye umo uyu muntu atendeke ukutungulula pa lwakwe amasambililo ya Baibolo yabili. Bwangu bwangu pa numa ya ici alibatishiwe, kabili mu kuya kwa nshita atendeke na bupainiya!
5 Umulimo Ulebombwa: Imbila nsuma ileshimikilwa, nga fintu Yesu asobele ukuti yali no kushimikilwa. (Mat. 24:14) Nangu fye ni mu fifulo umo abantu ‘bashilefwaya ukukutika kuli ifwe,’ balesokwa ukupitila mu kushimikila. Tuleenekela abengi ukukanaankulako nelyo fye ukukaanya icine. Lelo, aba musango yo bafwile ukusokwa pa lwa bupingushi bwa kwa Yehova ubuleisa.—Esek. 2:4, 5; 3:7, 8, 19.
6 Tatulapwa Umulimo: Te ifwe tuli no kupingula ilya kuleka ukushimikila. Yehova alishiba bwino bwino ilyo tulingile ukuleka. Alishiba nga ca kutila mu cifulo cesu mucili abantu abengankula ku mbila nsuma. Pali lelo, bamo batila tabalefwaya, lelo ifya kucitika fikalamba mu bumi bwabo pamo ngo kutamfiwa incito, ukulwalisha, nelyo ukufwilwa, kuti fyabalenga ukwankula bwino pa nshita imbi. Pa mulandu wa mpatila nelyo pa mulandu fye wa kucepelwa inshita ya kukutika, abengi tabatala abomfwa uko tuleshimikila. Ukubwelelako libili libili ne cikuuku kuti kwabalenga ukwangwako no kukutika.
7 Abakulile fye nomba line kabili abaikwatile amayanda yabo abene balekatamika sana ifintu kabili baleipusha amepusho ayo Icebo ca kwa Lesa epela e cingasuka. Umukashana umo uwaba na bana asuminishe baNte babili mu ng’anda mu mwakwe no kubeba ukuti: “Ilyo nali akakashana, nalefilwa ukumfwikisha umulandu bamayo baletamfisha ba Nte no kubeba ukuti tabalefwaya ukusambilila, ilyo ico fye balefwaya kulanda pali Baibolo. Nasalilepo ukuti nga nakula, naupwa, no kuikwatila ing’anda, nkasuminisha Inte sha kwa Yehova mu mwandi pa kuti bakanondolweleko Baibolo.” Ici e co acitile kabili casekeshe baNte abamutandalile.
8 Bushe Kuti Mwawamyako Ifyo Mushimikila? Te lyonse ciba ukuti abantu tutandalila e balenga cilekosa ukubombela mu cifulo cesu libili libili. Limo limo ni fwe fwe bene. Bushe tuya mu kushimikila ninshi tuletwishika? Ico kuti cakuma imintontonkanishishe yesu e lyo fye ne shiwi lyesu na fintu tulemoneka pa menso. Mulemoneka abashininwa kabili abamwentulamwentula. Esheni ukushimikila ukubomfya inshila imbi. Landeni pa fyalekanalekana, kabili esheni na maka yonse ukuwamyako. Napamo kuti mwayalula icipusho cenu ica kutendekelapo nelyo ukubelenga ilembo limbi mu kulanshanya kwenu. Ipusheni bamunyina na bankashi bambi bamwebeko ifyo basanga ukubomba bwino ilyo bali mu cifulo ca kubombelamo. Bombeni mu mulimo na bakasabankanya na bapainiya balekanalekana, kabili moneni icilenga ubutumikishi bwabo ukuba bwino.
9 Yehova alasenamina no kupaala umulimo wa kushimikila Ubufumu, kabili ilyo tulebombako uyu mulimo tulanga ukutemwa kwesu kuli wene na ku banensu. (Mat. 22:37-39) E ico natubombe umulimo wesu ukufika ku mpela, ukwabula ukunenuka pa kubombela mu cifulo cesu libili libili.