Fikeni Umusambi Wenu pa Mutima
1 Ilyo Yesu ashilanina ukuya ku muulu, aebele abasambi bakwe ukusambilisha bambi “ukubaka” fyonse ifyo abebele. (Mat. 28:19, 20) Umuntu nga ali no “kubaka” ifyo Kristu alandile, ifyebo fifwile ukumufika pa mutima. (Amalu. 119:112) Bushe kuti mwafika shani pa mutima wa muntu musambilisha Baibolo?
2 Pepeni Kuli Yehova Ukuti Amutungulule: Ukupanga abasambi mulimo wa kwa Lesa. Pa kuti tutunguluke, ipaalo lyakwe lilafwaikwa, te maka yesu iyo. (Imil. 16:14; 1 Kor. 3:7) E ico cilafwaikwa sana ukupepa kuli Yehova ku kulomba ubwafwilisho mu kusambilisha bambi icine.—Esa. 50:4.
3 Ilukeni Ifyo Umusambi Asuminamo: Ukwishiba ifyo abantu basuminamo no mulandu basumininamo kuti kwalenga twashilimuka no kumona ifyo twingasosa pa kubafika pa mitima. Mulandu nshi umusambi atemenwe co cisambilisho? Cinshi camushinine ukuti ico cisambilisho ca cine cine? Ukwishibe fyo kuti kwatwafwa ukuba no mucetekanya pa kulanda.—Imil. 17:22, 23.
4 Landeni Ifyebo fya Mano, Ifya mu Malembo: Umusambi afwile ukumona ukuti icine calibamo amano. (Imil. 17:24-31) Tufwile ukulanda umulandu waumfwika uwa kucetekela kwaba muli ifwe. (1 Pet. 3:15) Lelo, lyonse londololeni cikuuku cikuuku, kabili mu kutekanya.
5 Ikasheni Ifishinka ku Filangililo: Ifilangililo filalenga umusambi ukumfwikisha e lyo filacincimuna. Filalenga amantontonkanya no mutima ukubimbwamo. Yesu alefibomfya libili libili. (Marko 4:33, 34) Lelo kwena, pa kuti ifilangililo fibombe bwino, fifwile ukulingana ne cishinka cilelandwapo, kabili cifwile ukukuma ubumi bwa musambi.
6 Londololeni Ubusuma Bwaba mu Kupokelela Icine: Abantu bafwaya ukwishiba ubusuma bwaba mu kucita ifyo basambilila. Afweni umusambi wenu ukumona amano yaba mu mashiwi ya kwa Paulo aya pali 2 Timote 3:14-17.
7 Mwifuupulwa nga ca kuti bambi tabapokelele isambilisho lyenu. Te mitima yonse iluka. (Mat. 13:15) Lelo, abantu bamo balatetekela. (Imil. 17:32-34) Shi ukubombesha kwenu ukwa kufwaya ukufika abantu pa mitima ne mbila nsuma kwafwilishe abengi ukumfwa no “kubaka” ifyo Yesu alandile.