Umukululo wa Fipusho

◼ Fyebo nshi fifwile ukulandwapo pa kukumana kwa kuya mu mulimo wa mwi bala?

Ico ukukumana kwa kuya mu mulimo wa mwi bala kwabelako kulanda pa mulimo twalaya mu kubomba, uwa kushimikila. E co, uuletungulula afwile ukuipekanya bwino no kulanda ifyebo fya kukoselesha, ifya kulungatika kabili ifingabomba. Nga ca kutila ilembo lya bushiku lilelanda mu kulungatika pa mulimo wa kushimikila, kuti lyabelengwa no kulanshanyapo mu kwipifya. Lelo ukukumana kufwile ukukomaila pa mulimo wa kushimikila, ukwafwa bonse abaleya mu kucitilo bunte ukuba abaipangasha bwino ukufishapo bukapyunga bwabo pali ubo bushiku.—2 Tim. 4:5.

Ifishinka ifingabomba ukufuma mu Ubutumikishi Bwesu Ubwa Bufumu kuti fyalandwapo ku kulenga bonse baishiba ulupapulo luleshalikwa ne fya kulushalika. Pa Bushiku bwa Magazini kuti mwacitako icilangililo pa fyebo fya mu mukululo wa kuti “Ifya Kulanda Pali Bamagazini.” Ku musango umbi uwa kushimikila, kuti mwakomaila pa mitubululo imo mu citabo ca Ukupelulula iilekuma icifulo cenu ica kubombelamo. Kuti mwalanshanyako pa musango umo uwa kushimikila nelyo ukucitako icilangililo, ifili nga ifya kubomfya Baibolo ilyo umo afika pa ng’anda ya muntu, ifya kwasuka abapindikapo fimo pa kufwaya ukuti tuleke ukulanshanya na bo, ifya kutendeka isambililo lya Baibolo nelyo ifya kulundulula ukufwaisha kwa muntu umo uulefwaya ukusambilila icine.

Ukukumana kwa kuya mwi bala takufwile ukucila pa maminiti 10 ukufika ku 15, ukusanshamo ukupaatula abantu, ukubalanga ukwa kubombela ne pepo. Ilyo ukukumana kwapwa, bonse bafwile ukwishiba uo balebomba nankwe no ko baleya mu kubombela kabili bafwile ukuya ku kubomba ilyo line. Apo ukukumana kuba fye kwa maminiti yanono, calicindama kuli bonse ukukanacelwa. Ilyo ukukumana kwa kuya mwi bala kwabako pa numa ya kulongana kwa cilonganino, pamo nga pa numa ye Sambililo lya Ulupungu lwa kwa Kalinda, takufwile ukukokola sana. Takufwile ukuba kulanshanya pe lembo lya bushiku, pantu ninshi namuipakisha kale ukulanshanya kusuma ukwa fya ku mupashi.

Bamunyinefwe babatishiwa abafikapo bafwile ukwebelwa libela ubushiku bakatungulula ukukumana kwa kuya mwi bala. Nga ca kutila ubushiku bumo tapali munyinefwe uwa kutungulula ukukumana, baeluda bafwile ukusontako bankashi bamo ababatishiwa ukutungulula ilyo kwaba uko kukabila. Ninshi naikala, nkashi kuti atendeka ukulanshanya kwe lembo lya bushiku nelyo ifyebo fimbi ifilelanda pa mulimo wa mwi bala. Ukulandapo kwakwe kufwile ukuba fye ukwipi. Afwile ukufwala icitambala.

Ukukumana kwa kuya mwi bala lishuko lyaibela ku kukoseleshiwa no kuipangasha ukubomba umulimo wa kushimikila. Uuletungulula nga napekanya bwino, bonse abasangilweko bakamwenamo nga nshi.