Mwe Bafyashi—Kansheni Abana Benu Ukufuma ku Bwaice
1 “Kanshisho mwaice umo afwile ukubela, ilyo akakota takafumemo.” (Amapi. 22:6) Mwe bafyashi, nga tamulefwaya abana benu ‘ukufuma’ mu cine, ni lilali mufwile ukutendeka ukubakansha? Kufuma ku bwaice!
2 Ilyo Paulo atile Timote asambilishiwe ifya ku mupashi “ukufuma ku bwaice,” ukwabula ukutwishika aloseshe mu kuti ukutula ku bunya. (2 Tim. 3:14, 15) E co, Timote alilundulwike no kuba umwaume musuma uwa bumupashi. (Fil. 2:19-22) Mwe bafyashi, na imwe bene mufwile ukutendekela “ku bwaice” ukupeela abana benu ukukansha uko bakabila pa ‘kukulila kuli Yehova.’—1 Sam. 2:21.
3 Bapeeleni Amenshi Bakabila pa Kukula: Nga filya fine umuti unono ukabila ukutapililwa lyonse pa kuti ukule no kuba umuti uukalamba, na bana bene aba mishinku yonse bakabila ukupeelwa amenshi ayengi aya cine ca mu Baibolo pa kukula no kuba ababomfi ba kwa Lesa abakosoka. Ica kubalilapo pa kusambilisha abana icine no kubafwa ukupalama kuli Yehova kusambilila lyonse isambililo lya Baibolo ilya lupwa. Lelo mwe bafyashi, ishibeni ubutali bwa nshita cila mwana apoosako amano. Ku baice sana, ukusambilila ifinono kabili libili libili kuti kwabomba bwino ukucila ukusambilila ifingi nomba limo limo.—Amala. 11:18, 19.
4 Te kwesha ukumona ati umwana wenu teti asambilile. Bashimikileni amalyashi pa bantu balembwa mu Baibolo. Bebeni balenge ifikope pa fyalecitika ifyaba mu Baibolo nelyo ukupanga ifisela pa malyashi ya mu Baibolo. Bomfyeni bwino bavidio na batepu ba mu cilimba, na ba filangililo fya mu Baibolo. Pekanyeni isambililo lya lupwa ukulingana ne mishinku ya bana no kucenjela kwabo. Ukukansha kwa kubalilapo kube ukwayanguka, ukwalinga; lelo lintu umwana aya alekulilako, ukukanshiwa kwakwe kufwile ukulundwako no kulunduluka. Lengeni ukusambilila Baibolo kube ukwa kucincimusha kabili ukwapusanapusana. Apo mulefwaya abana benu ‘ukufuluka’ Icebo, bombesheni ukulenga isambililo lyenu ukuba ilya kucincimusha.—1 Pet. 2:2.
5 Basanshenimo mu Cilonganino: Imikileni abana benu ubuyo bwa kubalenga ukulunduluka pa kuti bengalaisansha sana mu milimo ya cilonganino. Cinshi cingaba e buyo bwabo ubwa kubalilapo? Abafyashi bakwata abana abanono babili batile: “Bonse babili batendeke ukukanshiwa ukwikala tondolo mu Ng’anda ya Bufumu.” Mu kuya kwa nshita, afweni abana ukulayasukapo pa kulongana ukwabula ukubelenga no kubemikila ubuyo bwa kulembesha mwi Sukulu lya Butumikishi bwa Teokrasi. Amabuyo yasuma ayengalinga ukufikapo mu mulimo wa mwi bala kuti yaba kutambika trakiti pa ng’anda, ukubelenga ilembo, ukutambika magazini, no kulanshanya bwino na mwine ng’anda.
6 Beni ica Kumwenako ca Kukoselesha: Bushe abana benu cila bushiku balomfwa uko mulelanda pali Yehova no kupepa kuli wene? Bushe balamona uko mulesambilila Icebo cakwe, ukusangwa mu kulongana konse, ukubombako mu mulimo wa mwi bala, no kusekelela ilyo mulecita ukufwaya kwa kwa Lesa? (Amalu. 40:8) Calicindama ukuti mulecita ifyo kabili mulecitila pamo na bo. Umwana mwanakashi umukalamba ilyo alelanda pali banyina abakushishe abana 6 abo baishileba baNte aba cishinka, atile: “Ico twatemenwe sana ca kumwenako cisuma ica bamayo—cacilile fye na pa kutweba ifya kucita.” Umufyashi wa bana bane atile: “ ‘Tatwalelanda fye ati Yehova e o tubalilapo’ lelo imikalile yesu e yalelanga ifyo fine.”
7 Mwe bafyashi, tendekeni bwangu ukukansha abana benu, basambilisheni icine mu Cebo ca kwa Lesa, bemikileni ubuyo ubwingabalenga ukulunduluka, kabili beni ica kumwenako cisuma. Mukasekelela pa kucite fyo fintu!