Bushe Icilonganino Cenu Cakwata Icifulo ca Kushimikilamo Icikalamba?

¹ Yesu alishimikishe mu cifulo icikalamba ica mu Israele wa pa kale, atendekele mu misumba ya mu Yudea no kuyafika ku mishi ya Galili. (Marko 1:38, 39; Luka 23:5) Na ifwe bene tufwile ukushimikila abantu abengi imbila nsuma ukufika apapela amaka yesu. (Marko 13:10) Nalyo line, uyu kuti waba mulimo wayafya. Mulandu nshi?

² Ifilonganino ifingi mu Zambia fishimikila mu mishi, ifi fifulo fikalamba nga nshi. Bakasabankanya abalanda ululimi lwa ku calo cimbi kuti bashimikila mu misumba yabamo abantu abengi, ukufwayamo abantu balanda ululimi lwabo. Cinshi twingacita pa kwafwa abantu bekala mu fifulo ifikalamba umusango yo ukusambilila icine pa lwa kwa Yehova, Yesu, no Bufumu?

³ Pekanyeni Bwino: Kangalila wa mulimo no mubomfi wa cifulo ca kubombelamo bafwile ukutungulula imibombele ya cilonganino pa kuti icilonganino cingabomba bwino. Nalimo kuti batantikako Ifibelushi fimo ilyo abengi bengabomba nga nshi ubushiku bonse. Nga mulebombela ukutali, tantikeni ukubomba amaawala ayengi mwi bala, nga cingacitika sendeni ifya kulya fya kasuba ifyo mwingalya pa kati ka kasuba. Kuti mwabangilila ukukumana pa kuya mu mulimo wa mwi bala ukucila ifyo mukumana lyonse pa kuti mwingashako inshita ya kwenda ukuya ku cifulo ca kushimikilamo nelyo kuti mwayakumanina lwa mupepi na ku ncende mulebombela. Citeni amabumba ayanono pa kuti bonse bakwate amayanda yalinga aya kushimikilako. Teyanyeni ukubombela mu ncende sha mu mishi pa nshita ya mwaka ilyo imiceele ne misebo fiba bwino.

⁴ Abo abalefwaya abalanda ululimi lwa ku calo cimbi kuti bapususha inshita ya mutengo nga nabakwata apalembelwe amashina ne fifulo na mapu wa nomba line. Teyanyeni ififulo fya kushimikilamo pa kuti ibumba lileshimikila lingatandalila ifi fifulo fyonse muli iyo ncende.

⁵ Shininkisheni ukuti mwasenda impapulo shalinga. Nga ca kutila icifulo tacibombelwamo ilingi line, kuti calinga ukusha ka trakiti nelyo magazini wa kale apashili bantu. Tambikeni trakiti utila Bushe Kuti Mwatemwa Ukwishiba na Fimbi Pali Baibolo? kuli onse uo mwakumanya kabili sheni na pashili bantu.

⁶ Bombeleni Sana Capamo: Ukushimikila mu cifulo icikalamba kufwaya bonse ababa mu cilonganino ukubombela capamo. Nga mulebomfya motoka unono nelyo basi, bonse abanininemo kuti basangwilako isha kulipila. Ukushilimuka kulakabilwa ilyo mwasanga abene ng’anda abalefwaya ukulanda ne mwe. Lyonse ibukisheni ulwa bucindami bwa kulanda na bonse ababa mu cifulo ca kushimikilamo, kabili mulelangulukilako bambi abalemulolela nga ca kuti inshita ya kubwelelamo yakumana. Nga mulefwaya ukukonkanyapo ukulanda na balefwaya ukusambilila, bushe kuti mwapangana bwino pa kuti tamulindike bambi abo muli na bo mwi bumba?

⁷ Pangeni amapekanyo yashininkishiwa aya kubwelelamo ku balefwaya ukusambilila. Nga ca kuti imisebo ya mu mishi tayakwata mashina nelyo amayanda tayalembwapo inambala, shileni mapu bwino bwino nelyo lembeni ifya kwenda pa kusanga uulefwaya ukusambilila ilyo mukabwela.

⁸ Mwandi lishuko lishaiwamina twakwata ilya kucita ifyo Yesu alandile ukuti: “Mu mushi ukalamba onse nalimo mu unono umo muleingila, fwayenimo uwayana”! (Mat. 10:11) Ukwabula no kutwishika Yehova akapaala ukubombesha kwenu ilyo muleipeelesha ukubomba uyu mulimo uukaleta icilambu!