Umukululo wa Fipusho

◼ Finshi tufwile ukulaibukisha ilyo tulebomfya amafoni ya kwenda na yo na ba pager?

Ifi fintu kuti fyatwafwa ukulanda na bambi ukuli konse twingaba. Ilyo ici cilaafwa, tatufwile ukubomfya aya mafoni na ba pager pa nshita iishalinga ica kuti twapumfyanya ubutumikishi bwesu nelyo ukulongana kwa Bwina Kristu. Bushe ici kuti cacitika shani?

Moneni ifyo cingaba nga ca kuti foni nelyo pager yalila ilyo muleshimikila mu butumikishi bwa mwi bala. Cinshi mwine ng’anda engatontonkanya? Cinshi mwine ng’anda engashala aletontonkanya lintu twaasuka iyo foni? Ukwabula no kutwishika tatwingafwaya ukucita icili conse icingalesha abantu ukukutika ku bukombe bwa Bufumu. (2 Kor. 6:3) E co, nga natusenda foni nelyo pager, tufwile ukuiteulula pa kuti taitupumfyenye nelyo ukupumfyanya bambi ilyo tulebomba mu butumikishi bwa mwi bala.

Ni shani nga ca kuti tulelolela ilyo bambi baleshimikila? Nga ca kuti natupaatulako inshita ya kubomba umulimo wa mwi bala, bushe tatufwile ukutonta pali uyu mulimo? Ku kucindika umulimo wesu uwashila, twapaapaata mulelanshanya ifya makwebo nelyo ifintu fimbi pa nshita imbi. (Rom. 12:7) Kwena, ici tacilepilibula ati tamufwile ukubomfya foni ku kushimikila uyo muntu na kabili nelyo ukupangana ubushiku mwingayamushimikila na kabili.

Tufwile ukucenjela sana pa lwa kubomfya amafoni ya kwenda na yo maka maka ilyo tuleensha, pantu ukufwailisha kumo kulanga ukuti ukucite co ilingi line sana kulalenga amasanso ya pa musebo. Tufwile ukukonka amafunde yonse ayalesha ukubomfya foni ilyo tuleensha.

Twisa ku kulongana kwa Bwina Kristu, ukulongana kukalamba, na mabungano ku kupepa Yehova no kusambilishiwa na wene. Bushe ukutasha pa kushila kwa uku kulongana takufwile ukutulenga ukuteulula amafoni yesu na ba pager pa kuti tafitupumfyenye nelyo ukupumfyanya bambi? Nga ca kuti kuli ifipamfishe ifilekabilwa ukubombelwapo ilyo line, tufwile ukuyalandila pa nse ya ncende ya kulongana. Nga te ifyo, tufwile ukupekanya ukusakamana ifya pa lwesu ne fintu fimbi ifishikumine ukupepa pa nshita shishili sha kupepa.—1 Kor. 10:24.

Shi ifyo tubomfya amafoni ya kwenda na yo nelyo ifili fyonse ifya malaiti filelanga ukuti tulalangulukilako bambi no kuti twalikatamika nga nshi ifya ku mupashi.