Umukululo Wa Mepusho
◼ Malembo nshi tulingile ukulaibukisha nga tulefwaya ukubomfya foni ilyo tuli mu kulongana nelyo tuleshimikila?
“Icintu Conse Calikwata Inshita ya Ciko.” (Luk. Mil. 3:1): Umuntu nga nakwata foni ya kwenda nayo, kuti atuma foni nelyo meseji inshita fye iili yonse. Lelo kwaliba inshita shimo isho Abena Kristu bashilingile ukupumfyanishiwa na foni. Ku ca kumwenako, inshita ya kulongana ni nshita ya kupepa Yehova, ukusambilila Baibolo no kukoseleshanya na ba bwananyina. (Amala. 31:12; Amalu. 22:22; Rom. 1:11, 12) Bushe te kuti ciwame ukushimya foni nga twafika fye pa kulongana e lyo nga kuli abatutumine amameseji twaisayamona pa numa ya kulongana lilya twayasha foni? Nga kuli fimo ifipamfishe sana ica kuti te kuti tushimye foni, kuti cawama ukuibika mu musango wa kuti taipumfyenye bambi nga yalila.
“Ifintu Fyonse Ncitila Imbila Nsuma.” (1 Kor. 9:23): Limo kulaba fimo ifyacindama ifilenga bamo ukubomfya foni ilyo baleshimikila. Ku ca kumwenako, ilyo tuleshimikila, munyinefwe uuletungulula nalimo kuti abomfya foni pa kuti eshibe ifilecitika ku balebombelela ku lubali lumbi ulwa cifulo mushimikilamo. Limo bakasabankanya balatuma foni ilyo bashilaya ku fipempu fya kubwelelamo nelyo ku masambililo ya Baibolo pa kuti beshibe nga abo baleya mu kumona balabasanga maka maka nga bekala ukutali. Na lyo line, tulingile ukushininkisha ukuti foni tailetupumfyanya ilyo tulelanda no mwine wa ng’anda. (2 Kor. 6:3) Ilyo tulelolela bakasabankanya bambi, kuti cawama twabika sana amano ku kushimikila na ku bo tulebomba nabo mu nshita ya kulatumina bambi amafoni nelyo amameseji.
Mulelangulukilako Bambi. (1 Kor. 10:24; Fil. 2:4): Twilacelwa ku kukumana kwa kuya mu mulimo wa mwi bala pantu fye na twishiba ukuti twalatumina umo foni nelyo meseji pa kuti atwebe uko aba mwi bumba lyesu balebombela. Ilingi nga twacelwa kulaba ukwakanya ibumba cipya cipya pa kuti na ifwe batufwaile uwa kubomba nankwe. Kwena limo limo kulaba ificitika ifilenga ukuti tucelwe. Lelo nga tule-esha na maka ukulafika bwangu ninshi tulelanga ukuti twalicindika ifyo Yehova atantika ifintu, kabili tulalangulukilako katungulula e lyo na bakasabankanya banensu.