Ufwile Ukutamba Vidio wa No Blood—Medicine Meets the Challenge
Finshi mwaishiba pa nshila shabako isha kundapilamo ukwabula ukubikwamo umulopa? Bushe mwalishiba inshila sha kundapilamo ukwabula ukubikwamo umulopa ne fyo shibomba? Tambeni uyu vidio, no kumona ifyo mwalasambilila pa kwasuka aya mepusho. Moneni: Apo muli uyu vidio balilangisha ukuundapa kwa kulepula kumo kumo pa nshita inono, abafyashi balingile ukulingulula nga kuti batamba uyu vidio na bana banono.
(1) Mulandu nshi uukalamba uo Inte sha kwa Yehova bakaanina ukubabikamo umulopa, kabili ni kwi ici cishinte cisangwa muli Baibolo? (2) Pa lwa kuundapwa, cinshi tufwaisha? (3) Ni nsambu nshi ishacindama isho umulwele akwata? (4) Cinshi cabelamo amano kabili icalinga ukukaana ukubikwamo umulopa? (5) Nga ca kuti umulopa wasuuma, fintu nshi fibili ifyacindama ifyo badokota bafwile ukucita bwangu bwangu? (6) Malwele nshi yafuma mu kubikwamo umulopa? (7) Ni nshila nshi badokota babomfya pa kucefyako umulopa uusuma ilyo balelepula? (8) Cinshi mufwile ukwishiba pa lwa kuundapa kumbi ukushili kwa ku kubikamo umulopa? (9) Bushe ukulepula ukukalamba kuti kwacitwa ukwabula ukubikamo umulopa? Finshi badokota abengi baleya baleitemenwa ukucitila Inte sha kwa Yehova, kabili cinshi kuli pele pele cingalakonkwa pa kuundapa abalwele?
Ukwabula no kutwishika, mukafwiwa nga mwatamba uyu vidio wa No Blood pamo na basambi ba Baibolo abali bonse, na bena mwenu abashili baNte, abo mubomba nabo, bakafundisha, na bana be sukulu banenu abengakwata ifipusho pa fyo twasumina pa mulopa. Umuntu umwine e ulingile ukusalapo ukuundapa engatemwa pa ko vidio yalandapo ukulingana ne fyo kampingu ilemusuminisha.—Moneni “Ifipusho Ukufuma ku Babelenga” mu Ulupungu lwa kwa Kalinda ulwa June 15 na October 15, 2000.