Pashanyeni Ubusuma bwa kwa Yehova
1 Pa numa ya kuipakisha ukutamba ukuyemba kwa kuwa kwa kasuba nelyo ukulya ica kulya cisuma, bushe tatucincishiwa ukutasha Yehova, Intulo ya fisuma fyonse? Ubusuma bwakwe bulalenga tulefwaisha ukumupashanya. (Amalu. 119:66, 68; Efes. 5:1) Lelo ni shani fintu twingalangisha ubusuma?
2 Ku Bashasumina: Inshila imo iyo twingapashanya Yehova mu kucite cisuma ya kwangwa abashasumina. (Gal. 6:10) Ukucita icisuma kuli bene kuti kwa-alula ifyo bamona Inte sha kwa Yehova no bukombe tushimikila.
3 Ku ca kumwenako, ilyo munyina wacaice uuli painiya alelolela ukumonana na dokota pa cipatala, aikele mupepi no mwanakashi umukalamba uwalemoneka ngo walwalishe ukucila bonse. Ilyo inshita yakwe iya kumonana na dokota yafikile alekele umwanakashi walwalishe ukubalilapo. Pa numa lintu bakumene pa mushiika, ulya mwanakashi alitemenwe sana pa kumumona. Nangu ca kuti kale alekaana ukukutika ku mbila nsuma, atile nomba alishininkishe ukuti cine cine Inte sha kwa Yehova balitemwa abantu banabo. Kabili isambililo lya lyonse ilya Baibolo lyalitendeke.
4 Ku ba Bwananyina: Na kabili tulapashanya ubusuma bwa kwa Yehova ilyo twafwilisha abasumina banensu. Mu nshita sha tuyofi, tuba pa ba ntanshi ukwafwilisha bamunyinefwe. Tulalangisha umupashi umo wine na lintu twafwa bambi mu fya myendele pa kuti basangwe ku kulongana, ukupempula abalwele, kabili na mu nkumbu ukukushe mitima kuli abo tushilaishiba sana mu cilonganino.—2 Kor. 6:11-13; Heb. 13:16.
5 Inshila na imbi Yehova alangishishamo ubusuma ya kuba ‘uwaiteyanya ukulekelela abamufwaya.’ (Amalu. 86:5) Mu kumupashanya, tukalangilila ifyo twalitemwa ubusuma ilyo tulelekelela bambi. (Efes. 4:32) Ici cilenga ukubishanya na basumina banensu ‘ukuwama kabili ukuba ukwa nsansa.’—Amalu. 133:1-3.
6 E ico shi ubusuma bwa kwa Yehova ubwafulisha nabulenge tulepongolwela amalumbo kuli wene no kusaminwo bu bwine busuma. Kabili shi nabutulenge ukutukuta ukupashanya ubusuma bwakwe muli fyonse ifyo tucita.—Amalu. 145:7; Yer. 31:12.