‘Bombeleni Yehova ne Nsansa’
1. Ni kwi ababomfi ba kwa Yehova basanga insansa ishingi?
1 Umutumwa Paulo alembele ati, “Sekeleleni lyonse muli Shikulu. Ndetila kabili, Sekeleleni!” (Fil. 4:4) Ukubilisha imbila nsuma no kwafwa abapale mpanga ukupepa Yehova kulaleeta insansa icine cine. (Luka 10:17; Imil. 15:3; 1 Tes. 2:19) Lelo ni shani nga ca kutila inshita shimo insansa tulesanga mu butumikishi bwesu shinono, cinshi twingacita?
2. Bushe ukulatontonkanya lyonse pa ntulo ya mulimo wesu kuti kwatulenga shani ukuba ne nsansa?
2 Umulimo Wafuma Kuli Lesa: Ibukisheni ukuti umulimo wesu uwa kushimikila wafuma kuli Yehova. Cine cine twalishuka pa kuba “bakabomba banankwe aba kwa Lesa” mu kubilisha ubukombe bwa Bufumu no kupanga abasambi! (1 Kor. 3:9) Lyonse Kristu Yesu alaba na ifwe muli uyu mulimo ushakabwekeshiwepo. (Mat. 28:18-20) Bamalaika na bo balabombako kabili babombela pamo na ifwe mu kulobolola kukalamba ukwa ku mupashi ukulecitika nomba. (Imil. 8:26; Ukus. 14:6) Amalembo, ne fya kukumanya fya bantu ba kwa Lesa, filanga apabuuta ukuti Yehova aletungilila uyu mulimo. E ico ilyo tushimikila, tuya “nga batumwa na Lesa, tulandila muli Kristu pa menso ya kwa Lesa.” (2 Kor. 2:17) Ala twalikwata umulandu wine wine uwa kubela aba nsansa!
3. Mulimo nshi ipepo libomba nga tulefwaya ukutwalilila aba nsansa mu mulimo wa kwa Lesa?
3 Ipepo lyalicindama nga nshi nga tulefwaya ukutwalilila aba nsansa mu mulimo wa kwa Lesa. (Gal. 5:22) Apo ni ku maka ya kwa Lesa twingabombela umulimo wakwe, tulekabila ukulomba umupashi wakwe, kabili akacishamo ukupeela umupashi wakwe ku bamulomba. (Luka 11:13; 2 Kor. 4:1, 7; Efes. 6:18-20) Ukupepela ubutumikishi bwesu kukatwafwa ukutwalilila aba nsansa ilyo tulepita mu mafya. Cikatwafwa ukutwalilila ukushimikila mu kushipa kabili mu nsansa.—Imil. 4:29-31; 5:40-42; 13:50-52.
4. Bushe ukupekanya bwino kutwafwa shani ukulundulula insansa mu kushimikila, kabili ni nshila nshi shimo ishisuma twingaipekanishishamo?
4 Pekanyeni Bwino: Inshila isuma iya kulundulwilamo insansa ilyo tulebombako ubutumikishi, kupekanya bwino. (1 Pet. 3:15) Ukupekanya bwino takukabila inshita ikalamba. Pa kupituluka mu fya kulanda pali bamagazini nelyo pa lupapulo mulepanga ukushalika kuti mwapoosa fye amaminiti ayanono. Nga mulefwaya imitendekele yalinga, kuti mwabomfya icitabo ca Ukupelulula nelyo Ubutumikishi Bwesu Ubwa Bufumu ubwapita. Bakasabankanya ba Bufumu bamo balangukilwa nga balemba ifyebo ifipi ifya kulanda pa kapepala. Mu nshita mu nshita, balalolesha pali ili pepala pa kuti baleibukisha ifyo balefwaya ukulanda. Ukucite fi kulabafwa ukukanaba no mwenso kabili kubalenga ukuicetekela pa kuti bashimikile no kushipa.
5. Bushe ukuba ne nsansa kutunonsha shani pamo na bantu bambi?
5 Insansa shilaleeta ifisuma ifingi. Nga tuli ne nsansa, ubukombe bwesu bulawama kuli bambi. Ukusekelela kulatwafwa ukushipikisha. (Nehe. 8:10; Heb. 12:2) Ne cacila pali fyonse, ukubomba umulimo ne nsansa kulacindika Yehova. E ico, ‘natubombele Yehova ne nsansa.’—Amalu. 100:2.