Nonkelenimo mu Kusambilila Icitabo ca Palameni Kuli Yehova
1 Pa Kulongana kwa Citungu ukwaleti “Bakabila ba Bufumu Abapimpa,” twalisekelele ukupoka icitabo citila Palameni Kuli Yehova. Abengi babelengele ici citabo lilya line fye bacipokele. Ilembo lya mwaka wa 2003 ilyaleti: “Palameni kuli Lesa, na o akapalama kuli imwe,” nalyo, ukwabula no kutwishika lyalicincishe na bambi abengi ukubelenga ici citabo.—Yako. 4:8.
2 Mu March tukatendeka ukusambilila icitabo ca Palameni Kuli Yehova pe Sambililo lya Citabo. Bushe kuti twanonkelamo shani mwi sambililo lyesu? Ukupekanishisha libela kwalicindama. Icipandwa cimo tukalacisambilila mu milungu ibili. Kanshi cila mulungu tukalasambilila fye amaparagrafu ayanono. Ici cikalenga tukabe ne nshita iikalamba iya kwasukapo amasuko ya kufuma ku mutima no kwetetula pa fyo tulesambilila. Na kabili, tukalasambilila fye amaparagrafu ayanono mu milungu iyo tukalapituluka mu ciputulwa ca kulekelesha ica cipandwa cimo na cimo, pa kuti twingaba ne nshita iya kupituluka mu cipande caibela ica ili buuku.
3 Ukutendekela mu cipandwa 2, mupepi na ku mpela ya cipandwa cimo na cimo kwaliba umukululo uuleti “Amepusho ya Kutontonkanyapo.” Pa numa ya kulanshanya paragrafu ya kulekeleshako mu cipandwa, kangalila we sambililo lya citabo akalanshanya ne bumba ifili mu mukululo. Akakoselesha abali mwi bumba ukulandapo, ukufwaya balanda pa fishinka fisuma ifyo baetetwile mu Malembo. (Amapi. 20:5) Pa numa ya kwipusha amepusho yaba mu mukululo, inshita shimo nalimo kuti aipusha amepusho pamo nga aya: “Cinshi ifi fyebo fya musambilisha pali Yehova? Bushe filekuma shani ubumi bwenu? Bushe kuti mwafibomfya shani kukwafwa bambi?” Ubuyo bwakwe kulenga ibumba ukwasuka amasuko ayalefuma ku mutima, te kwipukisha fye ibumba amepusho pa kuti balandepo pa fyebo fishicindeme sana.
4 Icitabo ca Palameni Kuli Yehova calipusanako ku fitabo fimbi ifya masambililo. Nangu ca kuti impapulo shonse isha “musha wa cishinka kabili uwashilimuka” shilacindika Yehova, ici citabo cena capekanishiwilwa maka maka ku kulanda pa mibele ya kwa Yehova. (Mat. 24:45-47) Mwandini tukakwata ishuko lishaiwamina! Tukanonkelamo apakalamba mu kusambilila sana pa mibele ya kwa Yehova. Shi ukusambilila tukasambilila ici citabo kukatwafwe ukupalama sana kuli Shifwe wa mu muulu. Kabili shi tukabombe bwino ukwafwa bambi ukucita cimo cine.