Ukusansa kwa ba Pali Bakabalwe Ukwamukuma
1, 2. Bushe ababomfi ba kwa Lesa basanshiwamo shani mu kufishapo icimonwa ca kusesema icaba pa Ukusokolola 9:13-19?
1 “Malaika walenga mutanda (6) alishishe ipenga lyakwe.” E lyo kwafumine “[aba] pali bakabalwe” abali “amakana amakumi yabili ukufushiwa ku makana ikumi.” Aba te mulalo wa fita fya bulwi uo na ifwe twaishiba. “Imitwe ya bakabalwe yali nge mitwe ya nkalamo.” Umulilo, icushi ne libwe lya mingu fyalefuma mu tunwa twabo, kabili “imicila yabo yapala insoka.” Uku kusansa ukwa ba pali bakabalwe ukwa mampalanya kusha kwaonaula konse uko bapita. (Ukus. 9:13-19) Bushe namwishiba ifyo mwakumwako mu kufikilisha kwa ici cimonwa ca kusesema ica kutiinya?
2 Abashalapo pa basubwa mu kubombela pamo ne fibusa fyabo, impaanga shimbi, balikatana mu kwishibisha ubupingushi bwa kwa Lesa. Ici cilenga kwaba ukusansalika imibele yafwa iyo Kristendomu abamo lwa ku mupashi. Natubebete imbali shibili isha cimonwa ca mu kusesema ishilangilila fye apabuuta icalenga ababomfi ba kwa Lesa ukufishapo umulimo.
3. Kukanshiwa nshi mwapokelela ukwa kulanda ubukombe bwa kwa Lesa mu kufikapo?
3 Abakanshiwa no Kupangashiwa Ukulanda Ubukombe bwa kwa Lesa: Mu Isukulu lya Butumikishi Ilya Bulesa na mu kulongana kumbi, ababomfi ba kwa Lesa balakanshiwa ukulanda ubukombe bwa kwa Lesa na maka. Ukukonka icilangililo babemikila kuli Yesu na basambi bakwe, balaya ku kufwayafwaya abayana, ukushimikila ubukombe konse fye ukwingasangwa abantu. (Mat. 10:11; Marko 1:16; Luka 4:15; Imil. 20:18-20) Ala iyi nshila ya kushimikilamo ubukombe iya mu Baibolo yaba iyafikapo icine cine!
4. Fibombelo nshi ifyo bakasabankanya abengi bakwata ifibalenga ukufikapo ukubomba umulimo bapeelwa?
4 Ababomfi ba Bwina Kristu balisabankanya imintapendwa ya maBaibolo, ifitabo, amabroshuwa, na bamagazini muli uyu umulimo wa kwa Lesa uwa kushimikila. Ishi mpapulo, shapekanishiwa mu ndimi mupepi na 400, kabili shilanda pa malyashi yalekanalekana ukubomfya imisambilishishe yapusanapusana iilenga abantu ba mitundu iingi ukufwaisha ukukutika. Bushe mulebomfya bwino ishi mpapulo?
5, 6. Cinshi cilanga ukutila abantu ba kwa Yehova balatungililwa na Lesa?
5 Ubutungulushi no Kutungilila kwa kwa Lesa: Cimbi ico icimonwa ca kusesema cilangilila bwino bwino, ca kutila umulimo wa kusansa uubombwa na ba pali bakabalwe ulatungililwa na Lesa. (Ukus. 9:13-15) Umulimo wa mwi sonde lyonse ubombwa ku maka ya mupashi wa kwa Lesa, te ku mano ya bantunse nelyo amaka yabo iyo. (Seka. 4:6) Yehova alebomfya bamalaika ku kutungulula uyu mulimo. (Ukus. 14:6) E ico, Yehova alapeela ukwafwa kwa ku muulu no kubombela pamo na baNte pe sonde ukuleta abafuuka ku mwine.—Yoh. 6:45, 65.
6 Takuli uwingalesha abantu ba kwa Yehova pantu balikanshiwa, ukupangashiwa bwino, kabili batungululwa na bamalaika pa kulanda ubukombe bwa kwa Lesa. Shi natutwalilile ukubombako mu kufishapo uku kusesema kwa cimonwa ca kucincimusha.