Pashanyeni Umutima wa kwa Yesu
1. Mutima wa musango nshi uo Yesu akwete?
1 Nangu ca kutila tatwabala atumonapo Mwana Lesa, ifyalembwa pali Yesu no umulimo wakwe, e filenga ukumutemwa icine cine. (1 Pet. 1:8) Pa kuumfwila ukufwaya kwa kwa Wishi, ashile icifulo cakwe icapulamo mu muulu no kwisa pano isonde. Ilyo ali umuntunse, apyungile bambi no mweo onse na pa kulekelesha aipeele umwine pa mulandu wa bantunse. (Mat. 20:28) Icebo ca kwa Lesa citucincisha ukuti: “Mube no yu mutima muli imwe uwali na muli Kristu Yesu.” Kuti twapashanya shani ukuipeela kwakwe?—Fil. 2:5-8.
2. Bwafya nshi Abena Kristu abengi baba na bo, kabili cinshi cingabafwa ukubupwisha?
2 Ilyo Tunakile: Nangu Yesu aali uwapwililika, ukunaka kwena alenaka. Pa nshita imo, aashimikishe ku mwanakashi umwina Samaria nangu ca kutila ‘alinakile ku lwendo.’ (Yoh. 4:6) Abena Kristu abengi na bo balanaka. Pa numa ya kupikintika umulungu onse, cilakosa ukusanga amaka ya kubombako umulimo wa kubila. Lelo nga tuleubombako lyonse, tukasango kuti umulimo wa Bena Kristu ulatupembesula ku mupashi.—Yoh. 4:32-34.
3. Kuti twapashanya shani ukuitemenwa kwa kwa Yesu ku kusambilisha bambi?
3 Pa nshita imbi, Yesu na basambi bakwe baile ku ncende yaba yeka kukuyatuusha. Lelo, ibumba likalamba e ko lyabasangile no kubabutukila. Ukucila ukukalifiwa, Yesu “abekatilwe inkumbu” kabili atendeke “ukubasambilishe fintu ifingi.” (Marko 6:30-34) Ukutampa amasambililo ya Baibolo no kutungulula kano tuli no mutima uwapala uwa kwa Yesu. Tufwile ukuba no mute no kutemwa abantu. Nga tamwakwata isambililo lya Baibolo, twalilileni ukufwayafwaya mukasuka amulisanga.
4. Bupainiya bwa kwafwilisha kuti bwatwafwa shani ukupashanya umutima wa kwa Kristu?
4 Balilenipo Ifya ku Mupashi: Bupainiya bwa kwafwilisha kuti bwatwafwa ukupoosa sana amano ku fya ku mupashi. Nkashi umo umukashana alembele ati: “Banyina wa munandi umo bakoseleshe ine no mwana wabo ukubombako na bo bupainiya bwa kwafwilisha pa mweshi umo. Nintemwa icine cine pa kuti twalibombeleko. Naipakishe ukwishiba bwino aba bwananyina, kabili bwangu bwangu baali fye kwati lupwa lwandi. Kabili nalitemenwe pa kuba ne nshita ikalamba iya kulanda kuli bambi pali Yehova no kubasambilisha icine ca Bufumu icishaiwamina. Ici conse campalamike kuli Yehova na ku kuteyanya kwakwe.”—Amalu. 34:8.
5. Cinshi ico tufwile ukuibikilishishako pa kupashanya umutima wa kwa Yesu?
5 Ifwe bonse tulafwaisha ukutemuna Yehova, nomba umubili wesu uushapwililika wena taufwaya. (Rom. 7:21-23) Tufwile ukukaana umupashi wa ku calo uwa kukanafwaya ukubombesha. (Mat. 16:22, 23) Yehova kuti atwafwa ukutunguluka muli ci ukupitila mu mupashi wakwe uwa mushilo. (Gal. 5:16, 17) Ilyo tulepembelela ukulubulwa no kwingila mu calo cipya ica kwa Lesa ica bulungami, shi natupashanye umutima wa kwa Yesu pa kufwaya intanshi Ubufumu ne fikumine bambi ukucila ukubalilapo ukufwaya kwesu.—Mat. 6:33; Rom. 15:1-3.