Umulimo Uusuma Uo Twingapanga Ukubombako mu Mwaka wa Mulimo Uupya
1. Mulimo nshi twingapanga ukubomba mu mwaka wa mulimo uupya?
1 Pa kuti tulepepa bwino Lesa tulingile ukupanga ifya kucita. Finshi mulepanga ukucita mu mwaka wa mulimo uupya? Umulimo uusuma uo mwingatontonkanyapo ukubomba wa bupainiya bwa kwafwilisha pa mweshi umo nangu ukucilapo. Ilingi line pa kubomba uyu mulimo usuma kano twapekanishisha kabela, kanshi ino e nshita isuma ya kutendeka ukupekanya. Mulandu nshi tulingile ukupanga ukubombako bupainiya bwa kwafwilisha?
2. Mulandu nshi twingafwaila ukubombako bupainiya bwa kwafwilisha?
2 Umulandu wa Kubombela Bupainiya bwa Kwafwilisha: Bupainiya bwa kwafwilisha bulalenga tuletemuna Shifwe wa ku muulu “mu kufikapo” ukupitila mu kubomba amaawala ayengi mu mulimo wa mwi bala. (1 Tes. 4:1) Nga twatontonkanya pali fyonse ifyo Yehova atucitila, imitima yesu ikatulenga twafwaisha ukwebako bambi pali ena. (Amalu. 34:1, 2) Yehova alamona ifyo tuipusula pa kuti fye tubombeshe mu mulimo wa mwi bala kabili alatasha. (Heb. 6:10) Tulasansamuka nga twaishiba ukuti tuletemuna Yehova ilyo tulebombesha.—1 Imila. 29:9.
3, 4. Bushe tunonkelamo shani mu mulimo wa bupainiya bwa kwafwilisha?
3 Ilingi line, nga tulebomba icintu cimo cine lyonse, cilanguka kabili tulatendeka ukucitemwa. Nga muleshimikila lyonse cikanguka ukulanda na bantu ku ng’anda ne ng’anda. Mukeshiba ifya kutendeka ukulanda na bantu ne fya kubomfya Baibolo. Icitetekelo cenu cikakosa sana nga lyonse muleebako abantu bambi ifyo mwacetekela. Bakasabankanya abengi abashaletungulula isambililo lya Baibolo, basukile batendeka ukusambilila no muntu umo Baibolo ilyo balebomba bupainiya bwa kwafwilisha.
4 Bupainiya bwa kwafwilisha na kabili kuti bwalenga umuntu ukukosa mu kupepa. Uwali kale painiya wa nshita yonse uwalemona kwati alebika sana amano ku ncito, apingwilepo ukubombako bupainiya bwa kwafwilisha pa mweshi umo. Atile: “Nalipapile ifyo ulya mweshi fye umo walengele nkose mu kupepa! Nasalilepo ukutendeka bupainiya bwa kwafwilisha pa myeshi iingi, ica kuti mu kuya kwa nshita nasukile natendeka bupainiya bwa nshita yonse na kabili.”
5. Finshi twingacita nga ca kuti tuleimona kwati te kuti tubombe bupainiya bwa kwafwilisha?
5 Ifyo Twingacita pa Kuti Tatufupwike: Bamo nalimo kuti baletiina ukulembesha bupainiya bwa kwafwilisha pantu baimona kwati tabaishiba ukusambilisha. Nga ca kuti e fyo mutontonkanya, Yehova kuti amwafwa nga filya ayafwile Yeremia. (Yer. 1:6-10) Nangu ca kutila Mose aali “uwafina akanwa kabili uwafino lulimi,” Yehova alimubomfeshe ukucita ico alefwaya ukuti cicitike. (Ukufu. 4:10-12) Nga mwamona kwati tamufikilepo ukubomba, pepeni kuli Yehova pa kuti amukoshe.
6. Bushe kuti twacita shani pa kuti tubombeko bupainiya bwa kwafwilisha nga ca kuti tulalwalilila nelyo twalikwata ifya kucita ifingi?
6 Bushe mulatiina ukulembesha bupainiya bwa kwafwilisha pa mulandu wa kuti limo mulalwalilila nelyo mwalikwata ifingi ifya kucita? Nga ca kuti mulalwalilila, nalimo kuti mwabomba nga mwatantika ukulabombako panono panono ukufika apapelele amaka yenu. Nga ca kuti mwalikwata ifya kucita ifingi, imilimo iishacindama sana nalimo kuti mwatantika ukuibomba mu mweshi umbi. Bamo nabo pa kuti fye babombeko bupainiya bwa kwafwilisha balapoka cuti ku ncito uwa bushiku bumo nangu shibili.—Kol. 4:5.
7. Mulandu nshi cawamina ukupepa nga mulefwaya ukubombako bupainiya bwa kwafwilisha?
7 Ifyo Mwingacita: Nga mulefwaya ukubomba bupainiya bwa kwafwilisha, pepeni. Lombeni kuli Yehova ukuti apaale ukufwaisha kwenu ukwa kusandulula bukapyunga bwenu. (Rom. 12:11, 12) Kuti amwafwa ukupingula bwino ifya kwalula inshita yenu ne milimo yenu. (Yako. 1:5) Nga ca kuti tamutontonkanyanapo pa kubomba bupainiya bwa kwafwilisha, lombeni kuli Yehova ukumwafwa ukutemwa umulimo wa kubila imbila nsuma.—Luka 10:1, 17.
8. Bushe ukukonka ukufunda ukwaba pa Amapinda 15:22 kuti kwalenga shani mwabomba bupainiya bwa kwafwilisha?
8 Lanshanyeni no lupwa pa buyo bwa bupainiya bwa kwafwilisha. (Amapi. 15:22) Nalimo umo mu lupwa kuti abombako bupainiya bwa kwafwilisha e lyo bambi balemwafwilisha. Lanshanyeni na bambi mu cilonganino ukutila mulefwaya ukubomba bupainiya, maka maka lanshanyeni na balya abo imibele yapalana ne yenu. Ici kuti calenga na bambi ukufwaya ukubomba.
9. Myeshi nshi mwingasala ukubombamo bupainiya bwa kwafwilisha?
9 Ilyo mulepituluka mu fyo mulepanga ukucita mu mwaka wa mulimo uupya, ni lilali muletontonkanya ukubombako bupainiya bwa kwafwilisha? Nga mulabomba nangu mulaya ku sukulu, napamo kuti mwafwaya ukubomba mu myeshi umuba amaholide nangu umuba Ifibelushi fisano ne nshiku sha pa Mulungu shisano. Ku ca kumwenako, mu September, mu December, mu March, na mu August mukaba Ifibelushi fisano ne nshiku sha pa Mulungu shisano. Umweshi wa May ukwete Ifibelushi fisano, e lyo uwa June ukwete inshiku sha pa Mulungu shisano. Nga mulalwalilila, tontonkanyeni ukubomba mu myeshi umo ilingi line imicele ibako bwino. Na kabili kuti mwafwaya ukubomba bupainiya mu mweshi kangalila wa muputule akatandalila icilonganino cenu. Ilyo akatandala, mukakwata ishuko lya kusangwa ku ciputulwa ca kubalilapo mu kukumana kwa bapainiya ba nshita yonse. Apo Icibukisho cikabako pa March 22 uyu mwaka, kanshi mu March, mu April, na mu May kuti mwawama ukubombamo bupainiya bwa kwafwilisha. Nga mwasala umweshi nangu imyeshi isho mulefwaya ukubombamo bupainiya bwa kwafwilisha, tendekeni ukulemba ifyo mukatantika inshita pa kuti mukakumanye amaawala yafwaikwa.
10. Cinshi mwingacita nga ca kuti teti mubombeko bupainiya bwa kwafwilisha?
10 Nga namumona ukuti te kuti mubombeko bupainiya bwa kwafwilisha mu mwaka wa mulimo uuleisa, na lyo line kuti mwatwalilila ukubombesha mu mulimo wa mwi bala. Twalilileni ukubomba umulimo wa kushimikila ukufika apapela amaka yenu, uku ninshi namucetekela ukutila Yehova nasansamuka pa milimo yonse iyo mulemubombela no mweo wenu onse. (Gal. 6:4) Afwilisheni abalebombako bupainiya bwa kwafwilisha kabili mulebakoselesha. Nalimo kuti mwayalula inshita yenu pa kuti mwabombako ubushiku na bumbi mu mulungu pamo na bakasabankanya abalebomba bupainiya.
11. Mulandu nshi tulingile ukumwena ukuti inshita naicepa?
11 Abantu ba kwa Yehova balishiba ukutila inshita naicepa. Kuli umulimo uo tulingile ukubomba, no yu mulimo wa kubila imbila nsuma. Abantu kuti bafwa nga tabomfwile imbila nsuma, kabili inshita isheleko naicepa. (1 Kor. 7:29-31) Ukutemwa twatemwa Lesa na bantu banensu kukalenga tulebombesha mu mulimo wa kubila ukufika apapela amaka yesu. Nga twabombesha kabili twapekanya bwino, kuti twabombako bupainiya bwa kwafwilisha nangu fye umweshi umo mu mwaka wa mulimo uupya. Mukaba ne nsansa nga mwabombako uyu mulimo!