Inyimbo Ishisansamusha
1 Inyimbo no kwimba kwalicindama mu kupepa kwa cine. Mu Israele wa pa kale, Asafi na bamunyina baimbile ati: “Tooteleni Yehova, . . . mwimbileni, mulumbeni, lumbuleni ifipesha amano fyakwe fyonse.” (1 Imila. 16:8, 9) Na leelo tulembila Yehova inyimbo cila mulungu pa kulongana. (Efes. 5:19) Ala mwandini lishuko lishaiwamina twaba na lyo ilya kulumbanya ishina lyakwe!—Amalu. 69:30.
2 Ukukutika ku ma Kingdom Melodies, ne inyimbo sha Bufumu ishakopelwa pa maseleti, kuti kwatulenga ukulatontonkanya pa fya ku mupashi. Nkashi umo atile: “Nga ndekutika ku ma Kingdom Melodies ntendeka ukwibukisha amashiwi ya nyimbo sha Bufumu. Mwandini ni nshila isuma iyinenga ukulatontonkanya pali Yehova lyonse ilyo ndekutika ku nyimbo!”—Fil. 4:8.
3 Inshita Mwingakutika: Ukulakutika ku ma Kingdom Melodies ilyo muli pa ng’anda kuti kwalenga pa ng’anda paba bumupashi ubulenga aba pa ng’anda ukuba no mutende. Ulupwa lumo lwatile: “Libili libili tulakutika ku nyimbo ishi ilyo tuli pa ng’anda nelyo tuli muli motoka. Tatutendwa ukukutika pantu shalikonkana bwino nga nshi.” “Ilingi line ama Kingdom Melodies yalatwafwa ukupekanya amatontonkanyo yesu ilyo ukulongana kwa Bwina Kristu kushilatendeka nelyo ilyo tuleya ku kulongana ukukalamba no kwa citungu.” Nkashi umo atile: “Ukukutika kuli ishi nyimbo ilyo ndebomba imilimo pa ng’anda kunenga ukubomba imilimo ne nsansa. Ala ifyo nsansamuka umuntu teti elenganye ukuti ndelonga ifya kufwala. Ubushiku nshisansamwike, ntendeka fye ukulisha ishi nyimbo. Ala shilacincimusha icine cine! . . . Ulwimbo lonse ulwayamba ukulila lundetela icimwemwe.” Bushe kuti kwaba inshita ilyo mwingamwenamo mu nyimbo sha musango uyu, ishipembesula?
4 Inyimbo ishingi bemba muno nshiku shiluminisha umupashi wa calo. Abafyashi kuti ba-afwa abana babo ukutemwa inyimbo ishisuma nga ca kuti balekutika sana ku ma Kingdom Melodies. Abasambi ba Baibolo abengi na balefwaya ukulasambilila Baibolo kuti batemwa ukwishiba ishi nyimbo shisuma isha bumupashi, ishicindika Yehova kabili ishisansamusha.—Amalu. 47:1, 2, 6, 7.