Umukululo wa Mepusho

◼ Ni nshila nshi iyawamisha iyo twingatuminamo imisangulo kuli bamunyinefwe abali mu kukabila mu fyalo fimbi?

Limo limo tulomfwa ulwa bamunyinefwe mu calo cimbi abalekabila ifintu pa mulandu wa kulamatwa, ukuponenwa na kayofi, nelyo ubwafya fye bumbi. Bamunyinefwe bamo balatuma indalama kwi ofesi lya musambo kuli fyo fyalo, no kulombo kuti indalama batumine bashibomfye ku kwafwilisha kantwa, icilonganino ca kampanda, nelyo ubukuule bwa kuti na bwa kuti.—2 Kor. 8:1-4.

Kwena ukupoosa amano ku basumina banensu muli uyu musango cisuma sana, nomba kulaba ifikabilwa ukubombelwapo bwangu bwangu ukucila na pa fyo abo abatumine ndalama balefwaya bapeele balekabila. Limo limo, cisangwa ukutila ubwafya bwa abo balefwaya ukupeela isho ndalama bwalibombelwapo kale. Ukuba kwena, ico tufwile ukucetekela ca kuti imisangulo nga yatumwa kwi ofesi lya musambo ukuti ibomfiwe ku mulimo wa mwi sonde lyonse, ku Mayanda ya Bufumu, nelyo ku kukumbusuka abaponenwe na kayofi, iyo misangulo ikabomfiwa ukulingana no kufwaya kwa batumine isho ndalama.

Bamunyinefwe ababa pa misambo yonse balisambilishiwa bwino bwino ukubombela bwangu pa ficitika ukwabulo kwenekela. Lyonse fye, iofesi lya musambo lileba Ibumba Litungulula pa milandu ya musango yo. Nga ca kutila ubwafwilisho na bumbi bulekabilwa, Ibumba Litungulula kuti lyaeba amaofesi ya musambo ayabela mupepi ukwafwilisha nelyo limbi indalama kuti shatumwa fye mu kulungatika ukufuma ku maofesi yakalamba.—2 Kor. 8:14, 15.

E ico, imisangulo yonse iya kubomfya ku mulimo wa mwi sonde lyonse, ku makuule ya mu fyalo fimbi, nelyo ku kukumbusuka abaponenwe no tuyofi ifwile ukutumwa kwi ofesi lya musambo mu calo umo mwikala, ukupitila mu cilonganino atemwa mu kulungatika. Muli yu musango, e mo “umusha wa cishinka kabili uwashilimuka” abombela pa filekabila aba bwananyina isonde lyonse mu muyano, ukupitila mu kuteyanya kwacitwa ne Bumba Litungulula.—Mat. 24:45-47; 1 Kor. 14:33, 40.