Bushe Umwana Wenu Kuti Atontonkanya Ngo Mukalamba?
1. Cinshi abana ba Nte sha kwa Yehova batontonkanya pa mulopa? Langilileni.
1 Ukutontonkanya ngo mukalamba pali finshi? Pa kubikwamo umulopa. Nga filya balembele mu Ulupungu lwa kwa Kalinda ulwa June 15, 1991 pa mutwe waleti “Endeni Nga Fintu Mwakambishiwa na Yehova,” abana ba Nte sha kwa Yehova limo limo kuti bakabila ukulatontonkanya pa fintu fimo nga bakalamba pa kuti cishibikwe ukutila balafwaya sana ukumfwila ifunde lya kwa Lesa pa mulandu wa mulopa nga filya fine fye abafyashi babo bomfwila. Bushe no mwana wenu kuti akabila ukucite co?
2. Bushe icilye cimo casosele shani pa musepela uwakeene ukubikwamo umulopa, kabili bushe abafyashi Abena Kristu na bana babo kuti basambililako cinshi kuli ci?
2 Amafunde ayasuminisha abantu ukucita ifyo basumina: Icilye cakulisha mu United States icapingulapo umulandu wa mwana uwakeene ukubikwamo mulopa nga filya abakalamba bakaana, cilye ca Illinois Supreme Court. Pa kupituluka mu mulandu wa kwa nkashi uwali ne myaka 17, icilye capingwile ukuti: “Cine cine uyu umukashana nga nakwata amano ya kwishiba ifingafuma mu fyo asalile ukucita no kuisalila ico alefwaya filya umukalamba acita, ninshi ali fye ngo mukalamba uwakwata insambu ya kusumina nelyo ukukaana ukundapa.” E ico nga ca kuti badokota nelyo abalashi balefwaya ukwishiba nampo nga umwana nakula ica kuti kuti aitontonkanishisha umwine nelyo iyo, kuti bafwaya ukumfwa ku mwana wine umulwele ico alekaanina ukubikwamo umulopa. Umwana afwile aishiba bwino bwino ifyo ubulwele bwakwe bukulile ne cingacitika nga asalapo ukundapa kumo kabili afwile ukulondolola bwino bwino ifyo ifunde lya kwa Lesa lilanda pa mulopa.
3. Fipusho nshi abafyashi bafwile ukutontonkanyapo sana, kabili mulandu nshi?
3 Cinshi Umwana Wenu Akalanda? Bushe abana benu baliyipekanya ukuilandila abene pali uyu mulandu? Bushe balisumina ukufuma pa nshi ya mitima yabo ukuti ‘ukutaluka ku mulopa’ lifunde lya kwa Lesa? (Imil. 15:29; 21:25) Bushe kuti balondolola ifyo basumina ukubomfya Amalembo? Bushe kuti balondolwela badokota ukwabulo mwenso pa fyo batontonkanya pa mulopa, nangu fye abafyashi babo tabalipo, nga ca kuti badokota balemona kwati kuti bafwa? Apo ‘inshita ne ca mankumanya filatuponena bonse,’ kuti mwapekanya shani abana benu ku mafya ya kwesha icitetekelo cabo ayesa ukwabulo kwenekela?—Luk. Mil. 9:11; Efes. 6:4.
4, 5. (a) Mulimo nshi uo abafyashi bakwata, kabili kuti bacita shani pa kuti babombe bwino uyu mulimo? (b) Finshi fyabako ifingafwilisha abafyashi?
4 Mwe Bafyashi, Cinshi Mwingacita? Mwalikwata umulimo wa kufunda abana benu ifyo Lesa alanda pa mulopa. (2 Tim. 3:14, 15) Ubulondoloshi bwaumfwika bwaba mu citabo ca Ukupelulula, amabula 387-391. Sambilileni ici cipande bwino bwino pamo no lupwa lwenu. Ukubomfya icipande citila “Nga umo Asosa Ukuti—” pe bula 391-393, lanshanyeni na bana benu pa kuti beshibe bwino ifyo bengalondololwela bambi ifyo basuminamo no mulandu basuminina ifyo. (1 Pet. 3:15) Mumbi umo twingasambilila pa mulopa ni muli broshuwa wa Ni Shani Fintu Umulopa Wingapususha Ubumi Bobe? na mu Ulupungu lwa kwa Kalinda ulwa June 15, 2004, amabula 14-24. Kabili, na mavidio yatila Transfusion-Alternative Health Care—Meeting Patient Needs and Rights na No Blood—Medicine Meets the Challenge, ayabako pa DVD ayakwata umutwe ukalamba uutila Transfusion Alternatives—Documentary Series, yalapeela ubulondoloshi bwafikapo pa fyo cawamina ukundapwa ukwabulo kubikwamo mulopa. Bushe ulupwa lwenu lwalitamba no kulanshanya ifi fyebo?
5 Afweni abana benu ‘ukushininkisha icabo kufwaya kwa kwa Lesa ukusuma, ukwapokelelwa kabili ukwapwililika’ pali uyu mulandu wa mulopa. Nga mwabafwa muli uyo musango e lyo bengapingula nga bakalamba kabili Yehova kuti abapaala.—Rom. 12:2.