Isukulu Ilitufunda Ukucita Ifyo Tusambilila
1 Ilyo tukalasambilila ifyebo fili mwi Sukulu lya Butumikishi Ilya Bulesa ilya mu 2006, twakulaesha na maka ukukonka amasambililo ya mu Malembo mu mulimo wesu uwashila na mu mikalile yesu. Natupangile limo mu mitima yesu ukulacita ifyo tusambilila.—Yoh. 13:17; Fil. 4:9.
2 Ukulandapo pa Kulongana: Mu kutantika kwa uno mwaka, ibumba nalilundilwako miniti umo uwa kulanda pa fishinka fikalamba ifya mu Baibolo. E ico munyinefwe uupeelwe ifishinka fikalamba afwile ukupwisha ifyo apekenye mu maminiti 5 te mu maminiti 6 iyo. Abalelandapo mwi bumba bafwile ukulaibukisha inshita bafwile ukupoosa pa kulandapo. Nga ca kutila uuleasukapo alipekenye bwino, kuti alanda ifyebo fingafwa ibumba mu masekondi 30 nelyo fye ukucepako. Abantu mupepi na 10 kuti balandapo ifyebo fyaumfwika mu maminiti 5 ayo ibumba lipeelwe.
3 Amalyashi Ayatufunda: Ifishinka fikalamba ifya mu Baibolo ne lyashi lya kufunda fifwile ukukomaila pa fyo ifyebo fingatwafwa mu butumikishi bwesu na mu mikalile. Kalanda afwile ukulenga abo alelandako bafwaye ukubombela pa co baumfwa. Lelo te ico ceka. Afwile no kubeba ica kucita, afwile alondolola bwino bwino ifyo ico cingacitwa, kabili afwile alanda na pa busuma bwingafuma mu kucite co. Limbi kuti atila, “Ifi e fyo ili lembo lingatwafwa,” nelyo “Ifi e fyo twingabomfya ifi fikomo mu butumikishi.” Baeluda na babomfi batumikila abaishiba ifyaba incende baikalamo bafwile ukweshaesha ukulondolola bwino bwino ifyo ifyebo fingabomba.
4 Ukulanda pa fyalembwa mu Baibolo kuti kwamwafwa ukulondolwela abantu ifyo bengacita icilelandwapo. Nga mwalanda pali fimo ifyaba mu Malembo, kuti mwatila, “Na imwe bene ica musango yu kuti camucitikila.” Kalanda afwile ashininkisha ukutila ifya kumwenako fya mu Baibolo fyonse ifyo alelandapo nafilingana ne cishinka cilelandwapo, ne fyo Baibolo isambilisha, e lyo ne fyo “umusha wa cishinka kabili uwashilimuka” aalemba.—Mat. 24:45.
5 Uwa mano muntu uucita ifintu bwino bwino ukulingana ne fyo asambilila kabili ifyo aishiba. “Amano e cikankaala.” (Amapi. 4:7, NW) Ilyo tuletwalilila ukunonka amano mwi Sukulu lya Butumikishi Ilya Bulesa, imisambilishishe yesu na yo ifwile ukulawaminako.