Langeni Ukuti Mulasakamana Abantu—Pa Kubepusha Amepusho no Kukutika
1 Abantu abengi balomfwa bwino ukulanda ifyo beshibe pa cintu cimo lelo tabafwaya ukubeba ifya kucita nelyo ukubepusha kwati mulebalubulwisha. Kanshi fwe Bena Kristu ababila imbila nsuma, tufwile ukwishiba ifya kwipusha abantu pa kuti balande ifyo baletontonkanya.—Amapi. 20:5.
2 Ifipusho fyesu fifwile ukulenga umuntu atontonkanya, te kulenga aumfwa ububi. Munyina umo nga aleshimikila abantu pa mayanda yabo, atemwa ukwipusha ati: “Bushe mulatontonkanyapo ukutila kukaba inshita ilyo abantu bakulacindikana?” Ukulingana ne fyo bayasuka alepusha na kabili ati: “Bushe cinshi mumona cingalenga abantu ukucindikana?” nelyo ati: “Cinshi mwasosela ifyo?” Nga aleshimika ubunte bwa mu lyashi mu fifulo fya cintubwingi, umbi munyina epusha abakwata abana ati: “Finshi fimuletela sana insansa pa kuba umufyashi?” E lyo aipusha no kuti: “Nge fimusakamika sana finshi?” Nga fintu mwamona, aya mepusho yalalenga abantu ukulanda ifili ku mutima ukwabula ukumfwa insoni. Apo ifintu filapusanapusana, limo tukaalula ifya kulandapo ne mipushishe pa kuti filinge ku bo twasanga ilyo tuleshimikila.
3 Ukulenga Balanda Ifili ku Mutima: Nga ca kutila abantu balefwaya ukumweba ifyo baletontonkanya, kutikeni mu mutima nteka ukwabula ukubapumfyanya. (Yako. 1:19) Balangeni ukuti bacita bwino ukumwebako ico cintu. (Kol. 4:6) Napamo kuti mwalanda fye ukuti “Caumfwika bwino ico. Natotela pa kunjebako ico cintu.” Apo calinga, batasheni ukufuma pa nshi ya mutima. Kuti mwabepushako amepusho na yambi pa kuti mwishibe ifyo balemona ne co baletontonkanishishe fyo. Landeni pa co mwingasuminishanya na bo. Nga mulefwaya bamone ifyo ilembo lisosa pa mulandu umo, nalimo kuti mwatila: “Bushe mwalimona ifyo ili lembo lilanda pali uyu mulandu?” Te kwesha ukuba ne fikansa.—2 Tim. 2:24, 25.
4 Imikutikile yesu e ilenga abantu ukwasuka ifyo basuka amepusho yesu. Abantu balamona nga natubikako amano ku fyo balelanda. Kangalila wa muputule atile: “Ilyo bambi balelanda, nga ulekutika nauteka no mutima, na bo balafwaya ukukutika kabili cilangilila fye ukuti walibatemwa.” Ukukutika ilyo bambi balelanda kulanga ukuti natubacindika, kabili kuti kwalenga na bo bakutika ilyo tulefwaya ukubashimikila imbila nsuma.—Rom. 12:10.