Ifingatwafwa Ukushimikila Bwino—Ukubika Amano ku Bantu
Umulandu Cacindamina: Yesu alebika amano ku muntu umo umo. Ku ca kumwenako, inshita imo Yesu nalimo alimwene ukuti umwaume uwali impofu alyumfwile insoni, e ico alimufumishe pe bumba no kuyamundapila ukushali abantu. (Marko 7:31-35) Na kabili, alilangile ukuti alelangulukilako abasambi bakwe pantu talebeba ukucita ifyo bashingakumamo kabili talebeba ifyebo ifingi. (Yoh. 16:12) Nangu ni lintu ali ku muulu, Yesu alebika amano kuli bambi. (2 Tim. 4:17) Apo tuli basambi ba kwa Kristu, tufwile ukulamupashanya. (1 Pet. 2:21; 1 Yoh. 3:16, 18) E lyo kabili, nga tulebika amano ku bantu tulelanshanya nabo, no kulaishiba ifyo balepitamo, ifyo batemwa, ne fibasakamika, tukalashimikila bwino. Abantu kuti batemwa ukukutika nga bamona ukuti natubabikako amano te kubashimikila fye tulefwaya nelyo ukubashila impapulo.
Uno Mweshi Citeniko Ifi:
Esheniko ukucita ifi pa mapepo ya lupwa nelyo ilyo muleshimikila lanshanyeni ifyo mwingalula ifya kulanda pa kuti mulanshanye no mwine wa ng’anda pa lyashi alanda.
Inshita imo ilyo mukaba pa kukumana kwa kuya mukushimikila, munyina uuletungulula uku kukumana kuti alanda nelyo ukulangilila ifyo twingacita pa kuti tulange ukuti twalibika amano kuli bambi.