“Wa Nsansa Umuntu Uushipikisha ica Kwesha”
1 Ifya kwesha filaponena Abena Kristu bonse fye. (2 Tim. 3:12) Ifya kwesha ifingabaponena kuti fyaba kulwala, ukukanakwata indalama, amatunko, ukupakaswa atemwa amacushi yambi fye. Ico Satana atwesesha, ni co afwaya ukuti tunenuke, tuleke ukubika amano ku mulimo twapeelwa fwe Bena Kristu, nelyo tuleke ukubombela Lesa. (Yobo 1:9-11) Bushe ukushipikisha amesho kutuletela shani insansa?—2 Pet. 2:9.
2 Ipekanyeni Ukushipikisha Ifya Kwesha: Yehova alitupeela Icebo cakwe umwaba icine, kabili ici cebo cilatweba pa bumi bwa kwa Yesu ne fyo asambilishe. Ukukutika ku fyo Yesu asambilishe e lyo no kulakonka ifyo fyebo, kulatukosha no kutwafwa ukuipekanya ukushipikisha amesho. (Luka 6:47-49) Kwaba na fimbi ifitukosha, ne fi ni bamunyinefwe na bankashi mu cilonganino, ukulongana, e lyo ne mpapulo shilanda pali Baibolo isho umusha wa cishinka kabili uwashilimuka atupeela. Lesa alitupeela ne shuko lya kupepa kuli ena cila nshita.—Mat. 6:13.
3 Yehova alitupeela ne subilo. Nga ca kutila twacetekela sana amalayo ya kwa Yehova, isubilo lyesu liba ni “nanga ya mweo, ilyashininkishiwa kabili ilyaikashiwa.” (Heb. 6:19) Mu nshita sha Baibolo, ingalaba tashalefuma pa cabu ukwabula inanga, nangu fye takuli icipuupu ca mwela. Nga ca kuti icipuupu ca mwela cabapumikisha fye, baleponya inanga pa kuti ingalaba taisendelwe ku mwela no kuyaipuma mu lulamba lwa mabwe. Na ifwe pali nomba nga twakwata icitetekelo mu malayo ya kwa Lesa, cikatwafwa ukushipikisha nga twaba na mafya. Amafya kuti yatuponena ilyo tushileyenekela. Nangu ca kutila pa kubala Paulo na Barnaba balibapokelele bwino ku Lustra ilyo baleshimikila, lintu abaYuda balesuusha baile kulya, ifintu fyalyalwike mu nshita fye inono.—Imil. 14:8-19.
4 Ukushipikisha Kulaleta Insansa: Ukutwalilila ukushimikila na lintu baletukaanya kulalenga twaba ne nsansa. Tulasansamuka nga ca kutila twalingwa ukuculila Kristu. (Imil. 5:40, 41) Ukushipikisha amesho kulatwafwa ukuba abaicefya, aba cumfwila, e lyo no kuba abashipa sana. (Amala. 8:16; Heb. 5:8; Yako. 1:2, 3) Kulatusambilisha ukucetekela Yehova, ukucetekela amalayo yakwe e lyo no kubutukila kuli ena ukuti atucingilile.—Amapi. 18:10.
5 Twalishiba ukuti ifya kwesha fya pa kashita fye akanono. (2 Kor. 4:17, 18) Ifya kwesha filatupeela ishuko lya kulanga ifyo twatemwa Yehova. Nga twashipikisha, kuti twashininina Satana ukuti wa bufi. E ico, tatunenuka! “Wa nsansa umuntu uushipikisha ica kwesha, pantu nga aba uwasuminishiwa akapokelela icilongwe ca bumi.”—Yako. 1:12.