Programu Iipya Iya Kulongana kwa Muputule

Yehova alilinga ukuti tulemucindika. Bushe tumucindika shani? Bushe mafya nshi ayo bamo bakwata pa kumucindika? Bushe abacindika Lesa pali ino nshita bapaalwa shani? Programu ya kulongana kwa muputule mu mwaka wa mulimo uwa 2008 ikasuka bwino aya mepusho. Umutwe wa uku kulongana uleti: “Citeni Fyonse ku Kucindika Lesa.” (1 Kor. 10:31) Tontonkanyeni pa fyebo ubwingi ifyo Lesa akatusambilisha pali ishi nshiku shibili isho tukalongana.

Kangalila wa citungu akalanda amalyashi ayakalati “Mulandu Nshi Tulingile Ukucindika Lesa?” na “Beni Ica Kumwenako pa Kucita Ifyo Lesa Afwaya.” Akalanda ilyashi lya ku cintubwingi ilikwete umutwe wa kuti, “Ni Bani Bacindika Lesa?,” e lyo ilyashi lya kusondwelela likalati, “Twalikatana pa Kucindika Lesa mu Calo Conse.” Na kabili akatungulula Isukulu lya Butumikishi Ilya Bulesa. Kangalila wa muputule akalanda amalyashi ayakwete imitwe ya kuti “Bekelweni mu Kucindika Lesa,” “Ukukabila kwa muputule,” e lyo no mutwe wa kuti “Twalilileni Ukuba ‘Abaikashiwa mu Cine,’” ilikafuma pa 2 Petro 1:12. Na kabili, tukasambilila ifyo “Umulimo wa Bupainiya Ulenga Tulecindika Lesa.” Kukaba na malyashi ya kukonkana yabili. Ilya kubalilapo likwete umutwe wa kuti “Ukucindika Lesa Konse fye Uko Tuli,” likalanda sana pa mashiwi yaba pa 1 Korinti 10:31 no mo yalola. E lyo ilyashi lya kukonkana limbi ilikwete umutwe wa kuti “Ukubomba Umulimo Washila ku Kucindika Lesa” likalanda pa nshila tupepelamo Yehova. Kukaba no kusupawila kwa Ulupungu lwa kwa Kalinda e lyo no kulanshanya kwe lembo lya bushiku pa Mulungu. Na kabili kukaba abakabatishiwa.

Abantu abengi balakaana ukwishiba Lesa. Na kabili abengi tabapeela Yehova umucinshi pantu babika sana amano ku mapange ya bantu. (Yoh. 5:44) Lelo natucetekela ukuti tatwakonaule inshita ilyo tukaba pa kulongana kwa muputule tulesambilila ifya kucita fyonse ku kucindika Lesa. Mukwai pekanyeni ukuti mukasangweko inshiku shonse shibili.