Programu Ipya Iya Kulongana kwa Muputule

Bushe kuti cacitika ukwiminina uwakosa ku bantu abalwisha nga nshi ukupepa kwa cine? Kuti twacita shani pa kuti twingacimfya abalwani abesha na maka ukufwaya ukutubwesesha mu calo ca bantu abashipepa? Amalyashi ya pa kulongana kwa muputule ukwa mu mwaka wa mulimo uwa 2009 yakasuka ifi ifipusho fyacindama. Umutwe wa kulongana uleti ‘Mulecimfisha Ububi pa Kucita Ifisuma.’ (Rom. 12:21) Moneni ifyo ukulongana kukaba.

Kangalila wa citungu akalanda amalyashi ya kuti ‘Abaipangasha Ukucimfisha Ububi ku Busuma,’ “Cenjeleni ku Kuicetekela Kwacishamo!,” “Ububi Bonse Buli no Kupwa Nomba Line!,” e lyo ne lya kuti, “Ukukosha Icitetekelo Cesu pa Kuti Twingacimfya Icalo.” Kangalila wa muputule na o akalanda malyashi ayakalatila “Ino E Nshita ya Kushibuka mu Tulo!,” ilikafuma pa Abena Roma 13:11-13, e lyo ne lya kuti ‘Mwinenuka mu Bushiku bwa Macushi,’ ilikafuma pa Amapinda 24:10. Tukakutika ku lyashi na limbi ilya kwa kangalila wa muputule ilya kuti, “Ukukabila kwa Muputule.” Ilyashi na limbi ilisuma nga nshi likalatila, “Bushe Te Kuti ‘Mubike Umutima Pali Uyu Mulimo’—E Kutila Bupainiya?” Amalyashi ya kukonkana yakaba yabili. Ilya kubalilapo likalatila “Iminineni Ndi ku Kulwisha Imicenjelo ya kwa Kaseebanya.” Likatwafwa ukwishiba ubufi no bucenjeshi ifyo Kaseebanya abomfya ukupitila mu fya kupangapanga, mu fyangalo, e lyo na mu masambililo. Likalondolola ne fyo twingakaana imicenjelo ya kwa Kaseebanya. Ilyashi lya kukonkana limbi ilya kuti “Mube na Maka ya Kulwisha Umulwani mu Bushiku bwa Bubifi” likatusambilisha ifya kukonka bwino bwino ukufunda ukwaba pa Abena Efese 6:10-18.

Ukucimfya ububi bonse fye kumo na Kaseebanya e lyo no kubila ubukombe bwa Bufumu fyendela pamo. (Ukus. 12:17) E cilenga ukuti Satana elaikala na pa nshi ku kufwaya ukusansa Inte sha kwa Yehova! (Esa. 43:10, 12) Lelo kwena nangu cibe shani, Kaseebanya akatufilwa pantu twalikosapo ‘ukucimfisha ububi pa kucita icisuma.’ Mukaipekanye bwino bwino pa kuti mukalonganeko ukulongana kwa muputule inshiku shonse shibili akacelo na kasuba.