Mulekoseleshanya Ilyo Muli mu Mulimo
1 Ifwe bonse tulatemwa umuntu nga atukoselesha ku “cebo icasoswa apayene.” (Amapi. 25:11) Bushe ilyo tulebombela pamo na banensu mu mulimo, kuti twacita shani pa kuti ilyashi tulelanda libe ilya kubakoselesha?
2 Ilyashi lya Kukoselesha: Ala cilakoselesha nga nshi nga ca kuti ilyo tulelanda ilyashi na bamunyinefwe na bankashi yesu tulelanda na malyashi ayengakosha bucibusa bwabo na Lesa! (Amalu. 37:30) Kuti twalanda pa fyo twacitendeka ukushimikila pa ng’anda nangu ukubashimikilako ifyacitike ilyo twali mwi bala. (Imil. 15:3) Bushe cishinka nshi icisuma ico twasambilile ilyo twalebelenga Baibolo, nangu ico twabelengele muli magazini ya nomba line, nangu ico twaumfwila pa kulongana? Kuti twalanshanya na pa fishinka ifyo twaumfwile nomba line mu lyashi lya cintubwingi mu Ng’anda ya Bufumu.
3 Limbi kuti twafuupuka nga ca kuti umwine wa ng’anda alanda ifyebo ifya kuti twafilwa no mwa kulosha. Kuti cawama nga ca kuti pa numa ya kufuma pali iyo ng’anda mwalanshanya no yo mulebomba nankwe pa kuti mwingeshiba ifyo mwingacita ku ntanshi nga ca kuti umuntu na umbi amwipusha icaba nge ci, nalimo kuti mwabelenga ifyaba mu citabo ca kuti Ukupelulula. E lyo kabili nga ca kuti twatemwapo inshila imo iyo munyinefwe acilandilamo pa kushimikila ku muntu, nga twamutasha mu bufumacumi kuti akoseleshiwa nga nshi.
4 Muleitendekelako: Bushe kuli bamo abo twaba na bo isambililo lya citabo limo, abo apo twabombeele pamo nabo napakokola? Nga ca kuti twabeba ukuti tulefwaya ukubomba na bo mu mulimo kuti ‘kwaba ukukoseleshanya.’ (Rom. 1:12) Bapainiya ba nshita yonse na ba kwafwilisha balatemwa sana nga bakwata uwa kubomba nankwe, maka maka mu lucelo nangu ku cungulo kasuba, ilyo kushiba sana bakasabankanya mwi bala. Kuti twatungilila bapainiya nga tuleipeelesha fwe bene ukubomba na bo mwi bala. Bushe mu cilonganino mwaliba kasabankanya uufilwa ukubomba sana umulimo wa kushimikila pa mulandu wa kulwalilila? Nga ca kuti twapangana no muntu wa musango yu ukuya nankwe mwi bala, nalimo mu kutungulula isambililo lya Baibolo, bonse babili kuti mwanonkelamo.—Amapi. 27:17.
5 Nga tuletasha abantu banensu ninshi kuti tulebakoselesha, nangu fye ni mu tuntu utunono. Tuleibukisha ifi lyonse ilyo tulebomba na banensu mu mulimo, pantu tufwaya ukuti ‘tulekuulana.’—1 Tes. 5:11.