Muleafwana Ilyo Muleshimikila
1. Busuma nshi bwaba mu kubomba na kasabankanya umbi mu mulimo wa kushimikila?
1 Inshita imo, Yesu atumine abasambi 70 ku kushimikila, kabili abatumine “babili babili.” (Luka 10:1) Tatuletwishika ukuti ukubomba babili babili kwalengele abasambi bakwe ukula-afwana no kukoseleshanya. Ilyo twaya na kasabankanya umbi mu kushimikila, kuti tuleafwana shani?
2. Ilyo abo tulebomba nabo baleshimikila umuntu, finshi tulingile ukucita kabili mulandu nshi tulingile ukukutikila?
2 Mulekutika: Mulekutika ilyo abo mulebomba nabo mu mulimo wa mwi bala balelanda no muntu. (Yako. 1:19) Nga balebelenga ilembo, na imwe bene mulekonkamo ukubomfya Baibolo yenu. Mulelolesha uulelanda, nampo nga untu muli nankwe nelyo mwine wa ng’anda. Nga mwabika amano ku fyo mulelandapo, no mwine wa ng’anda na o kuti abikako amano.
3. Ni lilali abo tulebomba nabo bengatemwa ukuti tulandepo na ifwe?
3 Muleishiba Ilyo Mulingile Ukulandapo: Nga tulebomba na bamo kabili batendeka ukushimikila umuntu, tulabacindika nga twaleka balelondolola. (Rom. 12:10) Tatulingile ukulabacilima ilyo balelanda. Nga balaba amashiwi, nelyo umwine wa ng’anda aipusha icipusho nelyo acilima, kabili abo tulebomba nabo batulomba ukuti tubafweko, tukafwaisha ukulunda pa fyo balandile ukucila ukuletapo ilyashi limbi fye ilipusene ne fyo tulelandapo. (Amapi. 16:23; Luk. Mil. 3:1, 7) Nga twalandapo, amashiwi yesu yalingile ukuba ya kulunda fye pa bunte tulepeela umuntu.—1 Kor. 14:8.
4. Cinshi cikalenga ukuti tukaleba ne nsansa no kubomba bwino ilyo tuleshimikila?
4 Ilyo abasambi 70 abalebomba babili babili bapwishishe ukushimikila, “babwelele bali ne nsansa.” (Luka 10:17) Na ifwe bene tukaba ne nsansa kabili tukalabomba bwino ilyo tuleshimikila nga ca kuti tulekutika no kwishiba ilyo tulingile ukulandapo pa kuti twafwe abo tulebomba nabo ukushimikila abantu pa mayanda.