Muletontonkanya Lyonse pa Bushiku bwa kwa Yehova

¹ “Nabupalamo bushiku bukulu bwa kwa Yehova, nabupalama no kwangufyanisha.” (Sefa. 1:14) Sefania na bakasesema bambi abalembele amabuuku ya kulekelesha 11 ayaba mu Amalembo ya ciHebere lyonse baletontonkanya pa bushiku bwa kwa Yehova. Ukusambilila icitabo citila Muletontonkanya Lyonse pa Bushiku bwa kwa Yehova pe Sambililo lya Citabo kukatwafwa ukuipekanya ukupusuka ubu bushiku bwa kutiinya, pantu muli ici citabo balilondolola ifyebo fyapuutwamo ifyo aba bakasesema balembele.—Sefa. 2:2, 3.

² Ifyaba Muli ici Citabo: Icitabo ca Ubushiku bwa kwa Yehova tacilondolola sana umwalola ifyebo fyaba muli aya mabuuku 12 aya kusesema nelyo ukulondolola icikomo cimo na cimo. Cilondolola ifyo twingabomfya ifi fyebo fyapuutwamo mu mikalile yesu cila bushiku. Cikomaila pa kuti, lyonse fye tufwile ukulatontonkanya pa bushiku bwa kwa Yehova ubupaleme, kabili ukutontonkanyapo kufwile ukukuma fyonse ifyo tucita ne fyo tupingulapo pa fintu. Calilanda pa mikalile ya mu lupwa, ifya kumfwana na Bena Kristu banensu, ifya kusala ifya kuleseshamo icitendwe ne ncito twingapingulapo ukwingila.

³ Icipande ca kubalilapo ica ili buuku cilanda pali aba bakasesema 12 na pa fyebo balembele. Bushe aba bakasesema bali ni bani? Finshi ifyalecitika mu nshiku shabo ifyapalana ne filecitika muno nshiku? Icipande calenga bubili cilanda sana pali Yehova na pa mibele yakwe. Finshi aba bakasesema balanda ifingalenga twaishiba bwino Yehova ne mibele yakwe? Icipande calenga butatu cilanda sana pa mibele yesu ne fyo tucita. Finshi twingacita pa kuti tulesekesha Lesa cila bushiku? Icipande calenga bune cilondolola ifyo twingaba ne nsansa ilyo tulelolela ubushiku bwa kwa Yehova.

⁴ Pekanyeni ino ine Nshita pa Kuti Mukanonkelemo: Pekanyeni ino ine nshita ukucita icili conse icilingile pa kuti mukanonkelemo mu kusambilila icitabo ca Ubushiku bwa kwa Yehova ico tukatendeka ukusambilila mu mulungu wa August 4, 2008! Mukalesangwa ku kulongana kwe Sambililo lya Citabo cila mulungu. Lyonse mukalepekanya isambililo bwino bwino, ukubelenga amalembo no kumona ifyo yampene ne fyo mulesambilila. Mukaletontonkanya pa fyo mulebelenga no kuyipusha ukuti, ‘Bushe ifi fyebo nasambilila kuti nafibomfya shani pa ng’anda, ku sukulu, ku ncito, mu mulimo wa mwi bala, na lintu ndi na Bena Kristu banandi?’ Mukalepekanya ukwasukapo pe sambililo lya citabo pa kuti mulekoselesha bambi.—Rom. 1:12.

⁵ Shi ukusambilila icitabo ca Ubushiku bwa kwa Yehova kutupekanishishe nomba, ‘ukushipikisha’ “ubushiku bwa kwa Yehova ubukulu kabili ubwa kutiinisha.” Ca cine, ubu bushiku nabupalama nga nshi!—Yoele 2:11.