Tuwisha Fyonse Ifyaba nga Malinga Yakosa
1 Pa myaka iingi, Satana alipofwisha imitima na matontonkanyo ya bantu abengi ukupitila mu kubasambilisha ubufi no kubabepa mu bucenjeshi. Alabepa abantu ukuti muli Lesa umo mwaba abene batatu, ukuti umweo taufwa, no kuti kwaliba umulilo wa pe. Alenga abantu ukulatwishika nga Kabumba e ko aba kabili balatwishika nga Lesa e walembele Baibolo. Akapaatulula, ukutemwisha icalo umuntu afyalilwamo na fyo filalenga abantu ukukaana icine. (2 Kor. 4:4) Kuti twawisha shani ifisumino fya musango yu ifyaba kwati malinga ayakosa?—2 Kor. 10:4, 5.
2 Abantu Balatemwa Sana Ifyo Basuminamo: Ilingi line abantu balatemwa sana ifyo basuminamo ifyo babasambilisha ukuti fya cine. Bamo basumina ifi fisambilisho fya bufi ukutula fye ku bwaice. Pa kwafwa abantu ba musango yu, ilyo tulelanda na bo tufwile ukubalanga ukuti natucindika ifyo basuminamo.—1 Pet. 3:15.
3 Kuti twalanga ukuti natubacindika nga twaleka balondolola ifyo basuminamo no mulandu basuminina muli ifyo fintu. (Yako. 1:19) Napamo icalenga ukusumina ukuti mu muntu mwaba icintu cimo icishifwa, mulandu wa kuti balifwilwa abantu babo kabili balafwaya sana ukubamona na kabili. Nelyo icilenga balesefya amaholide mulandu wa kuti e nshita bakwata iya kuba pamo na balupwa lwabo. Nga tulekutika ilyo balelondolola tukeshiba ifyo bomfwa kabili tukeshiba ne fyebo fya kulanda na bo ifingabafika pa mutima.—Amapi. 16:23.
4 Tulepashanya Yesu: Yesu atushiliile icipasho icisuma nga nshi ica kukonka ku fyo ayaswike umwaume uwaishibishe Amafunde. Yesu taebele ulya mwaume ifya kucita, nakalimo amweba ifya kucita nga alikeene pa mulandu wa kuti alitemenwe sana ifyo asuminemo. Lelo Yesu amwebele ifyo Amalembo yalanda, no kumuleka umwine alondolola ifyo aletontonkanya, lyena abomfeshe icilangililo pa kumwafwa ukwishiba ifyo alingile ukucita.—Luka 10:25-37.
5 Icebo ca kwa Lesa kuti calenga abantu ukuleka ukusumina ubufi ubo imipepele ya bufi ibasambilisha. (Heb. 4:12) Nga twatekanya ukubalondolwela icine icingabafika pa mutima, kuti twabafwa ukukaana ubufi no kusumina icine icingabalenga abantungwa.—Yoh. 8:32.