Ukupekanya Kukamwafwa Ukucita Ifipempu fya Kubwelelamo Ifisuma
1. Bushe umulimo wa kushimikila uwa Bena Kristu ba kubalilapo wali no kukula shani?
1 Yesu alisambilishe abasambi bakwe bwino pa kuti baleshimikila bwino bwino “imbila nsuma ya bufumu.” (Mat. 4:23; 9:35) Abasambilishe ilyo aleshimikila mu Palestine. Lelo, ilyo ashilaya ku muulu, Yesu alibebele ukuti umulimo wa kushimikila wali no kukula sana pa kuti ‘bakalenge aba nko shonse ukuba abasambi.’—Mat. 28:19, 20.
2. Bushe ukumfwila ifunde lya kwa Yesu ilya ‘kulenga abasambi’ kusanshamo finshi?
2 Pa kulenga abantu ukuba abasambi, tulingile ukubwelelako ku bantu abatemenwe imbila nsuma iya Bufumu bwa kwa Lesa no kubasambilisha ukubaka fyonse ifyo Kristu asosele. Pa kuti tubombe bwino mu kucita ifipempu fya kubwelelamo, tufwile ukupekanya bwino sana.
3. Nangu fye ni pa muku wa kubalilapo, cinshi napamo mwingacita pa kuti mukabwelele ku muntu mwalanshanya nankwe?
3 Pekanishisheni Libela: Bakasabankanya bamo nga bapwisha ukulanshanya no muntu, balamwipusha icipusho no kumulaya ukuti bakabwelelako pa kuti bakayeasuka cilya cipusho. Baasanga ukuti ukubomfya ifyebo fyaba mu citabo ca kuti Ico Baibolo Isambilisha kulabafwa ukutendeka isambililo lya Baibolo apo pene fye.
4. Mulandu nshi tushifwile ukulolela bamagazini ba mweshi ukonkelepo ilyo tushilaya ku fipempu fya kubwelelamo?
4 Ifi tukwata fye magazini ibili nelyo imo mu mweshi iya kushalika tacipilibula ukuti tufwile ukulolela mpaka twapokelela magazini ya mweshi ukonkelepo e lyo twaya ku fipempu fya kubwelelamo. Nalimo umwine wa ng’anda kuti atemwa ukusambilila na fimbi nga twalanshanya nankwe ifyebo fili muli magazini akwete.
5. Busuma nshi bwaba mu kuba no buyo ilyo mulebwelela ku bantu mwashimikileko?
5 Imikeni Ubuyo: Ilyo mushilabwelela ku muntu mwashimikileko, pitulukeni mu fyebo mwalembele e lyo no buyo mukwete. Ica kumwenako fye, kuti mwayalanshanya ifyebo fili mu lupapulo mwamushilile. Nelyo kuti mwamushila ulupapulo na lumbi ululelanda pa lyashi mwalanshenye nankwe umuku wafumineko. Nga ca kutila mwalimwipwishe icipusho, ubuyo bwenu bukaba bwa kuya-asuka icipusho. Ilyo mulelanda pe lembo lilekomaila pa fyo mulelanshanyapo, belengeni ilembo muli Baibolo.
6. Buyo nshi twakwata ubulenga ukuti tulebwelela ku bantu twashimikileko?
6 Ubuyo Bwesu: Kwena, ubuyo bwesu bwa kutendeka isambililo lya Baibolo. Munyinefwe umo abwelele ku muntu uo ashimikileko no kumweba ukutila kuti balesambilila nankwe Baibolo, lelo ulya muntu alikeene. Munyinefwe alibweleleko na bamagazini abapya kabili amwebele ukuti: “Tulelanshanya icipusho cimo ica mu Baibolo ico abantu muno nshiku baleipusha sana.” Pa numa ya kukutika ku fyo uyu mwaume alandilepo, munyinefwe abelengele ilembo na paragrafu iyalelanda pa fyebo balelanshanya mu citabo ca kutungululamo amasambililo ya Baibolo. Icafuminemo ca kuti alitendeke ukulasambilila Baibolo lyonse.
7. Bushe ukupekanya bwino kwamwafwa shani ukutendeka isambililo lya Baibolo?
7 Tukamwenamo icine cine nga tulepekanya bwino ifipempu fya kubwelelamo. Tukaba ne nsansa sana, kabili tukakwata ne shuko lya kwafwa ‘abalemenena ku bumi’ ukuba pa nshila ya ku mweo.—Imil. 13:48.