Bushe Mulalubomfya Sana?
1 “Ndefwaya sana ukulubomfya mwi bala!” E fyalembele nkashi yesu umo ilyo apwishishe ukubelenga Ulupungu lwa kwa Kalinda ulwa January 1, 2008. Bushe mwalibebeta ifipande fimo fimo ifiba lyonse mu lupapulo lwa bantu bonse, kabili bushe mwalisangako inshila isuma iya kubomfya pa kulanshanya na bantu mu mulimo wa mwi bala?
2 “Ifyo Tusambilila Kuli Yesu”: Nalimo mwalisanga ukuti ici cipande cisuma sana ukutampilapo amasambililo ya Baibolo. Nga ca kuti tamulacitapo ifi, esheni ukubelengela umwine wa ng’anda umutwe wa lyashi uuli mu cipande e lyo lyena no kumulanga ifyo Yesu alandilepo, muli paragrafu ya kubalilapo iya ici cipande. Nga ca kuti ilyo line fye umuntu alangilila ukuti natemwa, esheni ukutwalilila ukulanshanya nankwe utumitwe twa malyashi, pantu twalikwata ifipusho ifilenga umuntu ukutontonkanya. Ebeni umuntu ukuti alandepo pa cipusho. Landenipo panono pa fikope, lyena kabiyeni muli paragrafu yakonkapo. Umuku wa kubalilapo fye limbi kuti mwalanshanya no muntu ukufika pa kati ka cipande e lyo no kwisapwisha icipande conse nga mwabwelelako. Mulingile ukuipekanya ukutwalilila ukusambilila no muntu mu citabo ca kuti Ico Baibolo Isambilisha.
3 “Ifingalenga Indupwa Ukuba ne Nsansa”: Aya malyashi ayesa ilyo papita imyeshi itatu, ya kwafwa abaupa, abaupwa, na bafyashi pa kuti bengamona ifya kukonka ifishinte fya mu Baibolo nga bakwata amafya ayengafulunganya umutende mu ng’anda. Na kabili kuti mwabomfya ifi fipande ukwafwa abashili Inte sha kwa Yehova pa kuti bengamona amano ayaba muli Baibolo.—2 Tim. 3:16, 17.
4 Ifipande fya Baice: Amalyashi ayaba mu ciputulwa citila “Icipande ca Baice” yalafwa sana uulebelenga ukufwaya ukwishiba sana pa lyashi limo ilya muli Baibolo. Kuti mwabomfya ifi ifipande ukwafwa imisepela iyo musanga mu mulimo ukwishiba ubucindami bwa kusambilila Icebo ca kwa Lesa. (Amalu. 119:9, 105) Ilyo mulelanda na bafyashi, limbi kuti mwalanda pa cipande ca kuti “Fundeni Abana Benu” iciba muli magazini pa numa ya mweshi umo. Ifi ifipande kuti fyayafwa abana abanono ukusambililako amasambililo ayakankaala ku bantu abalembwa mu Baibolo. Bushe mwalipekanya ukuti mwakulabelengela pamo na bana benu ifi fipande?
5 Ifipande Fimbi: Cila Mweshi, icipande ca kuti “Ababelenga Ino Magazini Bepusha Ukuti” cilalanda pa cipusho ico abantu abashili Nte limbi bengepusha. Nga muleya ku ng’anda ne ng’anda mu kushiila abantu magazini limbi kuti mwalandapo pali ici cipande. Icipande cimbi icitila “Kalata Ukufuma ku . . .” cisuma sana pantu cilalanda pa mafya ayo bamishonari na bakabomba bambi bakwata nga balebomba umulimo wa kushimikila. Ifi fipande kuti fyayafwa abafwaya ukumfwa ukwishiba ukuti kanshi imbila nsuma ilabilwa fye icalo conse, ku kufikilisha icishibilo ca kubapo kwa kwa Kristu.—Mat. 24:3, 14.
6 Icipande icibamo lyonse mu lupapulo lwa bantu bonse ca kuti “Palameni kuli Lesa,” icifuma mu kubelenga kwa Baibolo ukwa mwi Sukulu lya Butumikishi Ilya Bulesa, kuti calenga abafumacumi ukufwaya ukusambilila ifingi pali Yehova. Icipande ca kuti “Pashanyeni Icitetekelo Cabo,” icibamo imiku ine mu mwaka, cilafwa abantu ukulaelenganya ilyo balebelenga amalyashi ya mu Baibolo, cilalenga abantu ababelenga Baibolo muno nshiku ukumfwikisha bwino bwino ifyo abalembwa muli Baibolo balecita, ifyo balecimfya amafya, ne fyo bakwete icitetekelo.
7 Ala kwena tufwile twalitemwa nga nshi pa mulandu wa kuti, cila mweshi tulapokelela Ulupungu lwa kwa Kalinda lonse fye apo lwapela ulwa kubomfya mwi bala! E ico kanshi, lekeni tulelubelenga sana no kwishiba sana ifibamo e lyo no kulalubomfya sana mu mulimo.