Bushe Mwali-ipekanya Ukulabomba Ubunte bwa mu Lyashi?
1. Cakumwenako nshi icilanga ukuti mu bunte bwa mu lyashi mulafuma ifisuma?
1 Mu bunte bwa mu lyashi mulafuma ifisuma nga nshi. Mu Baibolo mwaba ababombeleko ubunte bwa mu lyashi kabili mwalifumine ifisuma. (Yoh. 4:7-15) Bushe kuti twacita shani pa kuti tulebombako ubunte bwa mu lyashi?
2. Bushe ifyo tufwele ne fyo tulemoneka kuti fyatwafwa shani ukushimikila bambi?
2 Ifyo Tufwala ne fyo Tumoneka: Ukulafwala bwino e lyo no kumoneka bwino inshita ili lyonse kuti kwalenga tuleshimikila ukwabula ubwafya. (1 Tim. 2:9, 10) Nga twamona ukuti ifyo tufwele tafilelanga ukuti tuli Nte ya kwa Yehova kuti nalimo calenga twafilwa ukushimikila. Lelo nga natufwala bwino kabili tulemoneka aba busaka kuti calenga bambi ukufwaya ukwishiba umulandu tulemonekela bwino. Inshita imo, ilyo umwaume umushilamu ali pa bulendo, aikele mupepi na baNte babili umulume no mukashi abafwele bwino sana kabili abalemoneka aba busaka. Ilyo uyu mwaume amwene ifyo aba babili balemoneka bwino alibepwishe nga ca kutila bali Bena Kristu. Ici calengele ukuti bamushimikile ifyaba mu Baibolo pa maawala yatatu.
3. Nga mwakonka ifyo Yesu acitile mutendeka shani ukulanshanya na bantu?
3 Ukutendeka Ukulanshanya na Bantu: Lintu Yesu ali pa cishima ca kwa Yakobo atendeke ukulanshanya no mwanakashi umwina Samaria pa kumulomba fye amenshi ya kunwa. Na ifwe bene ukuti twatendeka ukulanshanya na bantu pa kulanda fimo nelyo ukubepusha fye icipusho icayanguka. Nangu ca kutila limo kuti twaumfwa umwenso lelo nga twashintilila pali Yehova kuti ‘twashipa’ no kutendeka ukulanshanya na bantu.—1 Tes. 2:2.
4. Kuti twacita shani pa kuti tulebombako ubunte bwa mu lyashi?
4 Ifyo Mwingalatendeka Ubunte bwa mu Lyashi: Bakasabankanya abengi balishiba ifya kutendeka ubunte bwa mu lyashi. Tontonkanyeni pa fyo mucita na pa bantu abo nalimo mukumanya cila bushiku. Sendeni impapulo isho abantu mulekumanya bengatemwa ukubelenga e lyo na Baibolo. Mulelolekesha ifilecitika kabili bikeni amano ku bantu. Nga mwatontonkanya pa bantu abo nalimo mwalakumanya, kuti calenga mwabashimikila bwino.—Fil. 1:12-14; 1 Pet. 3:15.
5. Mulandu nshi tufwile ukulaipekanya ukubombako ubunte bwa mu lyashi?
5 Ifintu fibili ifingalenga tulebomba ubunte bwa mu lyashi, kutemwa Lesa na banensu. (Mat. 22:37-39) Apo inshita iya kubomba uyu mulimo wa kushimikila naicepa, kanshi tufwile ukulaipekanya ukubombako ubunte bwa mu lyashi. Tufwile lyonse ukulashimikila imbila nsuma iya Bufumu lino line ilyo kucili inshita ya kushimikila.—Rom. 10:13, 14; 2 Tim. 4:2.