Sungeni

Bushe Mulabomfya Aya Amabroshuwa?

Bushe Mwalisanga Inshila Iitwala ku Mweo wa Muyayaya?

Iyi broshuwa yalembelwa abatemwa ifya mapepo

Ifya kushalika: “Apo ino nshita kwaliba imipepele iingi, bushe kuti mwaishiba shani imipepele iyo Lesa asuminisha?” Nga ba-asuka, kupukuleni pe bula 19. Lanshanyeni paragrafu 4, lyena ipusheni abo mulelanda nabo nga balesumina ukuti ukupepa kwa cine kufwile ukukwata abantu abatemwana no kutemwa abantu bambi. Belengeni Yohane 13:35 no kubashiila broshuwa.

Mukesheko ukucita ifi: Abo mulelanda nabo nga basumina ukupoka broshuwa, bebeni amuti, “Mu Lubali 7 muli ino broshuwa, mwaliba ifintu 6 ifingamwafwa ukwishiba imipepele ya cine. Nga nabwela kuti natemwa ukuti tukeselanshanya.”

Imipashi ya Bafwa—Bushe Kuti Yakwaafwa Nelyo Ukukucena? Bushe mu Cituntulu Eko Yaba?

Iyi broshuwa yalembelwa abakulila ukwaba abatiina sana abafwa. Na kabili kuti yatwafwa na ukulanshanya na bantu abasumina mu mulilo wa pe

Ifya Kushalika: “Kulaba amalyashi ayengi ayo abantu balanda aya kuti balalanshanya ne mipashi ya bafwa. Bushe kuti twalanda na bafwa? [Belengeni Lukala Milandu 9:5. Lyena lekeni basuke] Kupukuleni pe bula 4 no kulanshanya amaparagrafu ya kubalilapo 4. Ino broshuwa naikwata ifyebo na fimbi pali ili lyashi ilyacindama.”

Mukesheko ukucita ifi: Abo mulelanda nabo nga basumina ukupoka broshuwa, bebeni amuti, “Nomba bushe amashiwi abantu batila e yo bomfwa yafuma kwi?” Pekanyeni pa kuti mukayelanshanya amaparagrafu ya kubalilapo 8 ayali mu cipandwa icili pe bula 13 ilyo mukabwelelako.

Ilyo Untu Watemwa Afwa

Iyi broshuwa yalembelwa abafwililwe, nelyo abakwete balupwa ne fibusa abalekabila ukubasansamusha

Ifya kushalika: “Nga twafwilwa tulaba sana no bulanda. Abantu abengi tabaishiba ifyo bengasansamusha abafwililwe. Inga imwe bushe mwaishiba shani? Lekeni basuke. Lyena, kupukuleni pe bula 31, no kubalanga icikope ca bantu abalebuuka ku bafwa. Konkanyenipo ukulanda ukuti: Baibolo yalitulaya ukuti Lesa ali no kufumyapo amacushi nomba line fye. [Belengeni Imilimo 24:15] Lyena kupukuleni pe bula 30, no kubelenga amaparagrafu 2 na 3, e lyo mubashiile broshuwa.”

Mukesheko ukucita ifi: Abo mulelanda nabo nga basumina ukupoka broshuwa, bebeni amuti, “Muli aka kabuuku mwaliba ifyebo ifingi ifilanda pa fyo Lesa afwaya ukucita ku ntanshi. Ndefwaya nkabwele pa kuti tukeselanshanya.”

Kuti Mwaba Cibusa wa kwa Lesa!

Iyi broshuwa yalembelwa abashasambilila sana na bashaishibisha ukubelenga

Ifya kushalika: “Bushe fwe bantu kuti twaba ifibusa fya kwa Lesa? [Lekeni basuke. Lyena belengeni Yakobo 2:23.] Aka akabuuku ka kutwafwa ifyo twingaba ifibusa fya kwa Lesa nga filya Abrahamu aali.”

Mukesheko ukucita ifi: Bomfyeni ifyebo ifinono ifyaba mwi Sambililo 1 nelyo isambililo fye lyonse, balangeni ifya kusambilila Baibolo umuku wa kubalilapo fye mwakumana na bo nelyo ilyo mwabwelelako.