Mulepashanya Bakasesema—Yona
1. Mibele nshi iisuma iyo Yona akwete?
1 Finshi mutontonkanyapo nga mwaibukisha kasesema Yona? Abantu bamo, bamona kwati Yona ali ni kuuwe nelyo uwakosa umutima. Lelo ifyo acitile filangilila ukuti ali uwaicefya, uwashipa, e lyo kabili ali-ipeeleshe. Kuti ‘twapashanya’ shani Yona?—Yako. 5:10.
2. Kuti twaba shani abaicefya nga Yona?
2 Ukuicefya: Ilyo Lesa utumine Yona ukuyasoka abena Ninebe, Yona alibutwike no kuya ku cifulo cimbi. Te kuti tupape ico abutukiile pantu abena Ashuri bali abankalwe ica kuti umusumba wa Ninebe batampile ukuwita ati, “umusumba uusumya umulopa.” (Nahu. 3:1-3) Yona ali-icefeshe ilyo Yehova amusalapwile kabili alicitile ifyo bamwebele. (Amapi. 24:32; Yona 3:1-3) Nangu ca kuti pa kubala alibutwike, Yona asukile abomba umulimo Yehova amupeele. (Mat. 21:28-31) Bushe na ifwe tulatwalilila ukushimikila imbila nsuma nangu batusalapula nelyo mu cifulo tushimikilamo abantu tabafwaya ukukutika ku mbila nsuma?
3. Ni lilali tukabila ukuba abashipa no kuipeelesha mu mulimo wa kushimikila?
3 Ukushipa no Kuipeelesha: Ilyo Yona amwene ukuti abantu ali nabo mu bwato balafwa pa mulandu na filya alefwaya ukubutuka, ali-ipeleshe ukuti afwe mu nshita ya kwipaisha abantu bakaele. (Yona 1:3, 4, 12) Ilyo aile mu kusoka abena Ninebe, aile mu kati ka musumba kabili ailefwaya icifulo icisuma uko engatendekela ukubila ubupingushi bwa kwa Yehova. Yona nga ali ni kuuwe nga tacitile ifi fyonse, lelo ali ni kasesema wa kwa Lesa uwashipa! (Yona 3:3, 4) Na ifwe nga tulefwaya ukushimikila ukwabula umwenso ilyo baletukaanya, tufwile ukulomba Lesa ukuti atukoshe. (Imil. 4:29, 31) Ukuipeelesha, e kwingalenga ukuti tulebomfya inshita ne fyuma fyesu ku mulimo wa kushimikila.—Imil. 20:24.
4. Mulandu nshi tulingile ukulatontonkanishisha pa fyo bakasesema ba cinshinka aba kwa Yehova balecita?
4 Nga mulebelenga ifyacitikiile kasesema wa kwa Yehova uuli onse, e lyo mule-elenganya ukuti ni mwe filecitikila ninshi mukalanonkelamo sana. Muleyipusha amuti: ‘Bushe nga nine fyacitikiile nga nacitile shani? Kuti namupashanya shani?’ (Heb. 6:11, 12) Mu Ubutumikishi Bwesu Ubwa Bufumu, mwakulaba ifipande ifikalalanda pa fyo twingasambililako kuli bakasesema ba kwa Yehova aba cishinka.