Bushe Mulaitemenwa Ukwaluka?
1. Apo ifintu mu calo fileyafilealuka, ni muli finshi na ifwe tulingile ukula-aluka?
1 Pali 1 Abena Korinti 7:31 Baibolo ilanda pa fintu fya mu calo ukuti filaaluka-aluka. Apo ifintu filealuka sana mu calo, tulingile ukuitemenwa ukula-alula ifyo tushimikila, inshita tuya mu kushimikila, e lyo ne fyo tulanda na bantu. Bushe mulaitemenwa ukwaluka?
2. Pa kuti tule-endela pamo no kuteyanya kwa kwa Lesa, mulandu nshi tufwile ukula-alukila?
2 Inshila sha Kushimikililamo: Ukufuma fye na kale, icilonganino ca Bwina Kristu cila-aluka. Ilyo Yesu atumine abasambi bakwe mu kushimikila, pa kubala abelele ukuti besenda ifya kulya nelyo indalama. (Mat. 10:9, 10) Lelo ilyo amwene ukuti abantu baali no kutendeka ukucusha abasambi bakwe no kuti abasambi bali no kutendeka ukuya ku ncende ishaba ukutali mu kushimikila imbila nsuma, Yesu abebele ukuti nomba balesenda ifya kulya ne ndalama. (Luka 22:36) Pa myaka iingi, Inte sha kwa Yehova balebomfya inshila shapusanapusana isha kushimikililamo pamo nga ukupeela abantu amakardi apaleba ubukombe bwa mu Baibolo, ukushimikila pa milabasa, e lyo no kubomfya imyotoka ishalekwata ifisoselo. Apo abantu abengi muno nshiku tabasangwa sana pa mayanda, tulakoseleshiwa ukulashimikilako mu fifulo umusangwa sana abantu no kubombako ubunte bwa mu lyashi. E lyo abantu mu cifulo tushimikila nga balaya ku ncito, kuti cawama ukulashimikila ku ng’anda ne ng’anda icungulo kasuba ninshi nabenuka. Bushe mule-endela pamo ne celeta lya kwa Yehova?—Esek. 1:20, 21.
3. Bushe ukwalula ifyo twacipekanya ukulanda kuti kwatwafwa shani ukubomba bwino ilyo tuleshimikila?
3 Ifya Kulanda: Finshi filesakamika abekala mu ncende mushimikila? Bushe mikalile, mafya mu ndupwa, nelyo buntalamisoka? Cilawama sana ukwishiba ifilesakamika abekala mu cifulo tushimikila pantu e lyo twingapekanya ifingawama ukulanshanyapo nabo. (1 Kor. 9:20-23) Abene ba ng’anda nga batweba ifili ku mutima kuti cawama ukulanda pa fibakumine ukucila ukukutika fye ku fyo balanda no kutendeka ukulanda ifyo twacipekanya.
4. Mulandu nshi tufwile ukutendekela ukwaluka ino ine nshita?
4 Nomba line ubucushi bukalamba buli no kutendeka kabili cino calo cili no kupwa. “Inshita iisheleko naicepa.” (1 Kor. 7:29) Kanshi ino ine e nshita tufwile ukutendeka ukula-aluka mu fyo tushimikila pa kuti twingashimikila abantu abengi muli iyi nshita inono iisheleko!