Imyeshi ya Kulumbanyamo Sana Yehova Naifulilako
1. Kupekanya nshi ukupya ukukalatwafwa ‘ukulumbanya sana Yehova’?
1 Ukutendeka mu March uno wine mwaka, bakasabankanya nga balefwaya, kuti babombako bupainiya bwa kwafwilisha ubwa ma-awala 30 mu March na mu April e lyo na mu mweshi kangalila wa muputule atandalila icilonganino babamo. Nga ca kuti umulungu waibela ukatendeka ku mpela ya mweshi no kuyapwila mu mweshi wakonkapo, ninshi abalefwaya ukubombako bupainiya bwa kwafwilisha kuti basalapo umweshi umo pali iyi ibili. Bonse abalebombako bupainiya bwa kwafwilisha kuti basangwako ku kukumana konse uko kangalila wa muputule akwata na bapainiya ba nshita yonse na bapainiya baibela. Kanshi nangu twafilwa ukubomba bupainiya bwa kwafwilisha ubwa ma-awala 50, kuti ‘twalumbanya sana Yehova’ pa kubombako ubwa ma-awala 30 imiku 4 mu mwaka!—Amalu. 109:30; 119:171.
2. Finshi abakalabombako bupainiya bwa kwafwilisha ilyo kangalila atandala bakalanonkelamo?
2 Ilyo Kangalila wa Muputule Atandala: Abengi nomba bakulabombako bupainiya bwa kwafwilisha mu mweshi kangalila wa muputule aletandalila icilonganino kabili bakulakoseleshiwa nga babomba nankwe mu mulimo wa kushimikila. (Rom. 1:11, 12) Ukwabula no kutwishika bapainiya abengi bakalalombako ubushiku bumo ku ncito pa kuti bengabombako na kangalila mu kati ka mulungu. Abaya ku ncito mu kati ka mulungu, kuti balomba ukubomba na kangalila wa muputule pa Cibelushi nelyo pa Mulungu. Kabili bapainiya ba kwafwilisha bakalakoseleshiwa sana nga basangwako ku kukumana pamo na bapainiya ba nshita yonse na baibela!
3. Mulandu nshi ciwamina ukubombako bupainiya bwa kwafwilisha mu nshita ya Cibukisho?
3 Mu March na mu April: Abalebombako bupainiya bwa kwafwilisha kale, ubwa ma-awala 30 pa mweshi umo fye mu nshita ya Cibukisho, nomba nabakwata ishuko lya ‘kutuula ilambo lya kulumbanya’ pa myeshi ibili! (Heb. 13:15) March na April, myeshi iisuma ukubombamo bupainiya bwa kwafwilisha. Pantu cila mwaka muli iyi myeshi, e lyo tukwata kampeni ya kwita abantu ku Cibukisho. Na kabili, apo muli iyi myeshi abengi balabombesha mu mulimo wa kushimikila, kuti twabombako na bakasabankanya abapusanapusana. E lyo kabili Icibukisho nga capita, tulaya mu kumona abasangilweko pa kuti twingabakoselesha ukusangwa ku lyashi lyaibela. Bushe mukabombako bupainiya bwa kwafwilisha muli iyi myeshi twalandapo?—Luka 6:45.