Bamunyinefwe, Bushe Mulafwaya Ukubombako Imilimo mu Cilonganino?
1. Ni lilali munyinefwe wacaice engatendeka ukukonka ukufunda kwaba pali 1 Timote 3:1?
1 “Umuntu nga alefwaya ukuba kangalila, ninshi alefwaya umulimo uusuma.” (1 Tim. 3:1) Aya mashiwi ayalembelwe ukupitila mu mupashi wa mushilo, yakoselesha bamunyinefwe ukulafwaisha ukubombako imilimo ya mu cilonganino. Bushe pa kuti ubombeko imilimo mu cilonganino ufwile ukuba umukalamba? Iyo, na kuba inshita isuma iyo ufwile ukutendeka ukufwaisha ukubomba ni lilya ucili umusepela. Nga caba ifi ninshi kuti wasambilila imilimo no kulanga ukuti walifikapo ukuba umubomfi uutumikila nga wakulako. (1 Tim. 3:10) Nga ni we munyinefwe uwacaice uwabatishiwa, kuti walanga shani ukuti ulafwaisha ukubombako imilimo mu cilonganino?
2. Bushe bamunyinefwe kuti balanga shani ukuti bali-ipeelesha?
2 Ukuipeelesha: Muleibukisha ukuti ico mulefwaisha kubomba imilimo mu cilonganino, te kufwaya ukukwata icifulo. Kanshi mulefwaisha ukwafwa bamunyina na bankashi. Kuti mwacita ifi nga mulepashanya Yesu. (Mat. 20:28; Yoh. 4:6, 7; 13:4, 5) Lombeni Yehova ukuti amulenge ukufwaisha ukwafwa aba bwananyina. (1 Kor. 10:24) Bushe kuti mwayafwilishako abakoloci nelyo abalwalilila mu cilonganino. Bushe mulaipeelesha ukukuumpako icani, ukupyanga, nelyo ukubombako imilimo imbi pa Ng’anda ya Bufumu? Bushe kuti mwalanda ilyashi mwi Sukulu nga ca kuti umwine teshile? Mukasanga ukuti nga muleipeelesha ukwafwilisha bambi, mukaba ne nsansa.—Imil. 20:35.
3. Bushe ukuba na bucibusa busuma na Lesa kwacindama shani, kabili kuti twacita shani pa kuti tube icibusa cakwe?
3 Bucibusa Bwenu na Lesa: Icacindamisha ku mubomfi wa mu cilonganino kuba na bucibusa busuma na Lesa te kuba uwacenjela mu kucita ifintu. Umuntu uwakwata bucibusa busuma na Lesa alesha na maka ukulamona ifintu nga filya Yehova na Yesu bafimona. (1 Kor. 2:15, 16) Alalanga ukuti alikwata “ifisabo fya mupashi.” (Gal. 5:22, 23) Alicincila mu kushimikila kabili alibika imilimo ya Bufumu pa ntanshi. (Mat. 6:33) Kuti mwakwata imibele iisuma nga muleisambilisha lyonse. Ukucita ifi kusanshamo ukubelenga Baibolo cila bushiku no kubelenga Ulupungu lwa kwa Kalinda na Loleni!. Cimbi icingamwafwa kulapekanya ukulongana no kusangwako. (Amalu. 1:1, 2; Heb. 10:24, 25) Ilyo alekoselesha Timote uwacaice ukuti alelunduluka, Paulo alembele ukuti: ‘Lyonse ulesakamana ifyo ulesambilisha.’ (1 Tim. 4:15, 16) Kanshi mulepekanya bwino amalyashi bamipeela mwi Sukulu. Mulepekanya ilyo mushilaya mu kushimikila kabili lyonse mulebomba umulimo wa kushimikila. Mulepangila libela ifya kucita kabili mulebombesha ukufika pa buyo bwenu. Pali aya mabuyo kuti paba ukuba painiya, ukuya bombela pa Bethel, nelyo ukusangwa kwi Sukulu lya Bamunyinefwe Abashimbe (BSSB). Ukuba na bucibusa busuma na Lesa kuti kwamwafwa “ukufulumuka ulunkumbwa lwa mu bulumendo.”—2 Tim. 2:22.
4. Mulandu nshi cacindamina ukuba abacetekelwa kabili abacishinka?
4 Mufwile Ukuba Abacishinka Kabili Abacetekelwa: Pa mulandu wa kuti bamunyinefwe abapeelwe umulimo wa kwakanya ifya kulya ku Bena Kristu abapiina bali “abacetekelwa,” kabili baishibikwe ukuti bali abacishinka, abatumwa tabalesakamana nampo nga bali no kubomba umulimo nelyo iyo. Ici calengele ukuti balebika amano ku milimo imbi iyacindama. (Imil. 6:1-4) Kanshi nga bamupeela umulimo mu cilonganino, ubombeni na maka yenu yonse. Pashanyeni Noa, uwakonkele bwino bwino ifyo Lesa amwebele pa kukuula icibwato. (Ukute. 6:22) Umuntu uwaba ne cishinka e o Yehova atemwa sana kabili ninshi alikula ku mupashi.—1 Kor. 4:2; moneni akabokoshi kaleti “Ubusuma Bwaba mu Kusambilisha Bambi Imilimo.”
5. Mulandu nshi bamunyinefwe abacaice balingile ukulafwaisha ukubombako imilimo mu cilonganino?
5 Nga filya fine ubusesemo bulanda, Yehova alelenga umulimo wa kulonganika abantu ukubombwa bwangu bwangu. (Esa. 60:22) Cila mwaka abantu ukucila pali 250,000 balabatishiwa. Apo abantu abengi baleisa mu kupepa kwa cine, abaume abafikapo balekabilwa pa kuti balebomba imilimo mu cilonganino. Pali ino nshita, e lyo imilimo ifulile mu kuteyanya kwa kwa Yehova. (1 Kor. 15:58) Mwe bacaice bushe mulalanga ukuti mulafwaisha ukubombako? Nga ni fyo ninshi mulafwaya ukubomba umulimo uusuma icine cine!
[Amashiwi pe bula 2]
Apo abantu abengi baleisa mu kupepa kwa cine, abaume abafikapo balekabilwa pa kuti balebomba imilimo mu cilonganino
[Akabokoshi pe bula 3]
Ubusuma Bwaba mu Kusambilisha Bambi Imilimo
Bamunyinefwe abacaice abafikapo balanonkelamo nga ca kuti baeluda babapeela imilimo no kubasambilisha. Pa numa ya kulongana, kangalila wa muputule aikele pa cisebele alekoselesha kasabankanya. Lyena amwene munyinefwe uwacaice naiminina mupepi, e ico amwipwishe nga alefwaya ukulanda nankwe. Uyu wacaice alandile ukuti alefwaya ukuwamya pa cisebele pantu e mulimo bamupeela ukubomba lyonse ukulongana nga kwapwa. Nangu ca kuti abafyashi bakwe bali mupepi no kuya ku ng’anda, ena talefwaya ukubwelelamo ukwabula ukubomba umulimo bamupeela. Kangalila wa muputule aliselelepo pa cisebele. Pa numa atile: “Baeluda muli cilya cilonganino balipoosako sana amano ku kusambilisha bamunyinefwe bacaice ilyo babapeela imilimo mu cilonganino. Ici calengele ukuti ilingi nga natandalila icilonganino cabo baletasha bamunyinefwe abacaice ukuba ababomfi batumikila.”